ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ވެރިކަން ހިންގާ އެމްޑީޕީއަށް ލިބިނުވަރުގެ ބޮޑު ކާމިޔާބީއެއް، ރިޔާސީ ދައުރުގެ މެދު ތެރެއިން ބޭއްވި އިންތިހާބެއްގައި, ކުރިން އައި އެއްވެސް ސަރުކާރަކަށް ލިބިފައިނުވާ ކަމަށާއި ނަމަވެސް އިންތިހާބުން ރައްޔިތުންގެ ކަންބޮޑުވުންތަކެއް ހުރިކަން ހާމަވެގެން ގޮސްފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ސޯލިހު ވިދާޅުވީ މިހާތަނަށް ގުނި ވޯޓުން އެމްޑީޕީ 49 ޕަސެންޓް ގޮނޑި ހޯދާފައިވާ ކަމަށެވެ.
"90 ޕަސެންޓް ވޯޓު ގުނިއިރު ވޯޓުގެ 49 ޕަސެންޓް ވޯޓު މި ވަނީ އެމްޑީޕީއަށް ކާމިޔާބު ކުރެވިފަ. އަޅުގަނޑު ހިތުން މިޑް-ޓާމް އިލެކްޝަނެއްގައި މިވަރުގެ ކާމިޔާބީއެއް އަދި މިހާތަނަށް އެއްވެސް ސަރުކާރަކަށް ހާސިލް ކުރެވިފައެއް ނެތް،" ރައީސް ސޯލިހު ވިދާޅުވި އެވެ.
ރައްޔިތުންގެ ކަންބޮޑުވުންތައް ހައްލު ކުރުމަށް ސަރުކާރުން މަސައްކަތް ކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.
އެހެންކަމުން މިޑް-ޓާމް އިލެކްޝަނެއްގައި މި ލިބުނު ކާމިޔާބީ ފާހަގަ ކުރުމާއެކު އެޅުގަނޑު މި ދެންނެވި ކަންބޮޑުވުންތަކާ އެކީގައި ރައްޔިތުންގެ އިހްސާސްތަކާ އެއްގޮތަށް ކަންތައްތައް ކުރުމަށް ކުރަންޖެހޭ ކަންތައްތައް ކުރަމުންގެންދާނެ ވާހަކަ އަޅުގަނޑު މި ފުރުސަތުގައި ދަންނަވަން. --ރައީސް
މާލެ ސިޓީއިން ވަރަށް ބޮޑު ބަދަލެއް ފެނިފައިވާ ކަމަށް ފާހަގަ ކުރައްވާ ރައީސް ވިދާޅުވީ ރައްޔިތުންގެ އިހްސާސްތައް ދަނެގަންނަން މަސައްކަތް ކުރައްވާނެ ކަމަށެވެ.
ނިމިދިޔަ އިންތިހާބުގައި އެންމެ ފާހަގަ ކުރެވުނު ކަމަކީ މާލޭ ސިޓީ ކައުންސިލްގެ ނަތީޖާ. އެ ކައުންސިލަށް އައި ބަދަލާ ދޭތެރޭ އެބަޖެހޭ ވިސްނަން. އަޅުގަނޑަށް ފާހަގަ ކުރެވޭ މާލޭ ސިޓީގެ ރައްޔިތުންގެ ކަންބޮޑުވުންތަކެއް ހުރިކަން. އަޅުގަނޑު އިރާދަކުރެއްވިއްޔާ މިއަދުވެސް މި ޔަގީންކޮށް އަރުވަނީ މާލޭ ސިޓީގެ އަދި ދިވެހިރާއްޖޭގެ ހުރިހާ ރައްޔިތުންގެ ކަންބޮޑުވުންތައް، އިހްސާސްތައް ދަނެގަނެ، އެކަންތައްތައް ހާސިލް ކޮށްދިނުމަށް މި ސަރުކާރު އިރާދަކުރެއްވިޔާ ދެމިއޮންނާނެ،" ރައީސް ވިދާޅުވި އެވެ.
