ކޮވިޑުގެ ބަލިމަޑުކަން އިތުރަށް ގޯސްވުމަށް މަގުފަހިވީ ޗައިނާއިން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އަށް އެއްބާރުލުން ނުދިނުމުން ކަމަށާއި މުޅިން އަލަށް ފެނުނު މި ވައިރަހުގެ އަސްލު ދެނެގަންނަން ޖެހޭ ކަމަށް އެމެރިކާއިން ބުނެފި އެވެ.
އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކެން އެފަދަ ގޮތަކަށް ޗައިނާއަށް ފާޑުވިދާޅުވެފައި ވާއިރު، އާ ރައީސް ޖޯ ބައިޑެންގެ ސަރުކާރުގެ ގިނަ މެމްބަރުން ގެންދަވަނީ ކޮވިޑް ބަލިމަޑުކަމުގެ މައްސަލާގައި ޗައިނާއަށް ބަހުގެ ހަމަލާތައް އަމާޒު ކުރަމުންނެވެ.
އެންބީސީ ޗެނަލްގެ "މީޓް ދަ ޕްރެސް" ޝޯއަށް ދެއްވި އިންޓަވިއުގައި ބްލިންކެން ވިދާޅުވީ ބައިނަލްއަގްވާމީ ތަޖުރިބާކާރުންނަށް ޗައިނާއިން އެއްބާރުލުން ދީފައި ނުވާ ކަމަށާއި ހާމަކަން ބޮޑު ދެ ފުށް ފެންނަ ދިރާސާ ކުރަން މައުލޫމާތު ވެސް ހިއްސާ ނުކުރާ ކަމަށެވެ.
"އޭގެ ނަތީޖާއެއްގެ ގޮތުން ވައިރަސް ކޮންޓްރޯލުން ނެއްޓީ މާ އަވަހަށް،" ބްލިންކެން ވިދާޅުވި އެވެ.
ޑަބްލިއުއެޗްއޯގެ ޑިރެކްޓަރު ޖެނެރަލް ޓެޑްރޯސް އަދަނޮމް މިދިޔަ މާޗް މަހު ވިދާޅުވީ ކޮވިޑުގެ ހަގީގަތް ތަހުގީގު ކުރަން ޗައިނާއަށް ދަތުރު ކުރި ޓީމަށް ޗައިނާ ސަރުކާރުން މައުލޫމާތު ނުދީ ހިފެހެއްޓި ކަމަށެވެ.
ޗައިނާގެ ސައިންސްވެރިންނާ ގުޅިގެން ޑަބްލިއުއެޗްއޯއިން އޭރު ނެރުނު ރިޕޯޓުގައި ބުނެފައިވަނީ މި ވައިރަސް އިންސާނުންގެ ހަށިގަނޑަށް އެތެރެވެފައި ވަނީ ވާލުގެ ހަށިގަނޑުން ކޮންމެވެސް އެހެން ޖަނަވާރަކަށް އަސަރުކޮށްގެން ޒަރިއްޔާއިން ކަމަށް ބެލެވޭ ކަމަށެވެ. އަދި މިއީ ލެބޯޓަރީއެއްގައި އުފެއްދި ވައިރަހެއް ލީކުވުމުން ފެތުރުނު ބަލިމަޑުކަމެއްގެ ގޮތުގައި ނުބެލެވޭ ކަމަށް ވެސް ފާހަގަކޮށްފައި ވެއެވެ.
ނަމަވެސް އެކަން ޔަގީންކުރަން އިތުރު ތަހުގީގުތައް ކުރަން ޖެހޭ ކަމަށް އަދަނޮމް ވިދާޅުވެފައި ވެއެވެ.
އެ ރިޕޯޓު ނެރުމާއެކު އެމެރިކާ އާއި ޔޫރަޕިއަން ޔޫނިއަން އަދި ހުޅަނގުގެ އެހެން ގައުމުތަކުން ވެސް ވަނީ ޑަބްލިއުއެޗްއޯގެ ތަހުގީގަށް ފުރިހަމަ އެއްބާރުލުން ދިނުމަށް ޗައިނާއަށް ގޮވާލާފަ އެވެ.
