ހަލުވިކަމާއެކު ކޮވިޑް ފެތުރެމުންދާ އިންޑިއާއިން ބްރެޒިލް ފަހަތަށް ވައްޓާލުމަށް ފަހު އެ ބަލީގެ ހާލަތު ދެ ވަނައަށް އެންމެ ގޯސް ގައުމަކަށް ވެއްޖެ އެވެ.
ހެލްތު މިނިސްޓްރީގެ ތަފާސްހިސާބަށް ބަލާއިރު، މިއަދު އިންޑިއާއިން ވަނީ 168،912 މީހަކު ކޮވިޑަށް ޕޮޒިޓިވްވެފަ އެވެ. އެއާއެކު އިންޑިއާގައި މިހާތަނަށް ޖުމްލަ 13.53 މިލިއަން މީހުން މި ބައްޔަށް ޕޮޒިޓިވްވެފައި ވެއެވެ، ބްރެޒިލްގައި މި އަދަދު އުޅެނީ 13.45 މިލިއަން ގައެވެ.
ކޮވިޑުގެ ހާލަތު އެންމެ ގޯސް ގައުމެއްގެ ގޮތުގައި ޖުމްލަ 31.2 މިލިއަން ޕޮޒިޓިވް ކޭސްއާއެކު އަދިވެސް އޮތީ އެމެރިކާ އެވެ.
އިއްޔެ އިންޑިއާގައި މި ބަލި ޖެހިގެން 904 މީހަކު މަރުވެފައި ވެއެވެ. އެހެންކަމުން މަރުވި މީހުންގެ ޖުމްލަ އަދަދު ވަނީ 170،179 އަށް އަރާފަ އެވެ.
އިންޑިއާއިން މި ވަގުތު މަސައްކަތް ކުރަމުން ދަނީ ކޮވިޑުގެ ދެވަނަ ރާޅު ކޮންޓްރޯލް ކުރުމަށެވެ. ދުވާލެއްގެ މައްޗަށް 100،000 އެއްހާ މީހުން ޕޮޒިޓިވްވަމުން ދާއިރު، 800 އެއްހާ މީހުން ކޮންމެ ދުވަހަކު ވެސް މި ބަލީގައި މަރުވެ އެވެ.
އޭގެ އިތުރުން އިންޑިއާއަށް ވަނީ ވެކްސިނުގެ ދަތިކަމާ ވެސް ކުރިމަތިލާން ޖެހިފަ އެވެ. ބައެއް ސްޓޭޓުތަކުގައި ސްޓޮކް ނެތް ކަމަށް ބުނި ނަމަވެސް މައި ސަރުކާރުން ބުނީ ސްޓޮކް ހުންނާނެ ކަމަށެވެ.
ސްޓޮކް ނެތް ކަމަށް ބުނެ ފަތުރަނީ ދޮގު ވާހަކަތަކެއް ކަމަށާއި 40 މިލިއަން ޑޯޒް ރައްކާކޮށްފައި ހުންނާނެ ކަމަށް ބޮޑުވަޒީރު ނަރެންދްރަ މޯދީގެ ސަރުކާރުން ބުނެފައި ވެއެވެ.
އިންޑިއާގެ އަމާޒަކީ ޖުލައި މަހުގެ ކުރިން 250 މިލިއަން މީހުންނަށް ވެކްސިން ދިނުމެވެ. އެ ލަނޑުދަނޑިއަށް ވާސިލްވުމަށް ވެކްސިން ޕްރޮގްރާމުގެ ދުވެލި އަވަސް ކުރަން ޖެހޭ ކަމަށް ތަޖުރިބާކާރުން ބުނެ އެވެ.
