ޔުނައިޓެޑް އަރަބް އެމިރޭޓްސް (ޔޫއޭއީ) ގެ އަމީރާ ލަތީފާ ބިންތި މުހައްމަދު އަލް މަހްތޫމް ދިރިހުންނެވި ކަން އެ ގައުމުން ސާބިތުކޮށްދީފައި ނުވާތީ އދ. އިން ކަންބޮޑުވުން ފާޅުކޮށްފި އެވެ.
ދުބާއީގެ ވެރިޔާ މުހައްމަދު އަލް މަހްތޫމްގެ ދަރިކަނބަލުން އިންނަވަނީ ބަންދުކޮށްފައި ކަމަށް ވިދާޅުވާ ވީޑިއޯއެއް ފެބްރުއަރީ މަހު ވަނީ ބީބީސީއިން އާއްމުކޮށްފަ އެވެ.
އެ ވީޑިއޯގައި ލަތީފާ ވިދާޅުވީ އޭނާ އިންވަނީ ބަންދުކޮށްފައި ކަމަށާއި ސިއްހީ އެހީތެރިކަން ވެސް ނުލިބޭ ކަމަށެވެ. ބީބީސީއިން ދެއްކި އެ ވީޑިއޯއަކީ ސިއްރުން ރިކޯޑްކޮށްފައިވާ ކުރެއްވި ވީޑިއޯ އެކެވެ.
އެކަމާ ގުޅިގެން އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހުން ވަނީ އެކަމަނާ ދިރިހުންނެވި ކަން ސާބިތުކޮށްދިނުމަށް ޔޫއޭއީގައި އެދިފަ އެވެ. ނަމަވެސް ޔޫއޭއީއިން ޖަވާބެއް ދީފައެއް ނުވެ އެވެ.
ލަތީފާ ވަނީ 2018 ވަނަ ގައުމުން ފިއްލަވަން މަސައްކަތް ކުރައްވާފަ އެވެ. އެކަމަނާ އަނބުރާ ޔޫއޭއީއަށް ގެންދިޔެއީ އިންޑިއާ ކަނޑުގައި އޮތް މަނަވަރެއްގެ ތެރެއިން ހައްޔަރު ކުރުމަށް ފަހު އެވެ.
ލަތީފާގެ ބައްޕާފުޅަކީ ޔޫއޭއީގެ ނައިބު ރައީސް އަދި ދުބާއީގެ ވެރިޔާ އެވެ. އެމަނިކުފާނަކީ ދުނިޔޭގެ އެންމެ މުއްސަނދި ވެރިންގެ ތެރޭގައި ހިމެނޭ ވެރިއެކެވެ.
ދުބާއީއަކީ އިގްތިސާދީ ގޮތުން ކާމިޔާބު ސިޓީއެއް ނަމަވެސް އެތަނުގައި އިންސާނީ ހައްގުތައް، ވަކިން ހާއްސަކޮށް އަންހެނުންގެ ހައްގުތައް، ހިފެހެއްޓިފައިވާ ކަމަށް ބައިނަލްއަގްވާމީ ޖަމިއްޔާތަކުން ބުނެ އެވެ.
އެކުވެރިންގެ އެހީތެރިކަމާއެކު ލަތީފާ 2018 ވަނަ އަހަރު ދުބާއީއިން ފިއްލަވަން މަސައްކަތް ކުރެއްވީ ވެސް އެހެންވެ އެވެ. އެކަމަނާ ބޭނުންވެ ވަޑައިގެންނެވީ މިނިވަންކަމާއެކު އުޅެވޭނެ ގޮތެއް ހޯދުމަށެވެ.
