ކޮވިޑާ ދެކޮޅަށް ވެކްސިން ދިނުމަށް ގައުމުތަކުގައި ހިންގާ ޕްރޮގްރާމުތަކުގެ ތެރެއިން އެންމެ އަވަހަށް 100 މިލިއަން ޑޯޒް ދިން ގައުމަކަށް އިންޑިއާ ވެއްޖެ އެވެ.
އެ ގައުމުގެ ހެލްތު މިނިސްޓްރީން ބުނީ އިންޑިއާއަކީ އެންމެ އަވަހަށް 100 މިލިއަން ޑޯޒް ދިން ގައުމު ކަމަށެވެ. އެ ގައުމުން 100 މިލިއަން ޑޯޒް ދިނީ 85 ދުވަހުގެ ތެރޭގަ އެވެ.
އެމެރިކާއިން 100 މިލިއަން ޑޯޒް ދިނީ 89 ދުވަހުގެ ތެރޭގަ އެވެ. އަދި ޗައިނާއަށް އެކަން ހާސިލްކުރެވުނީ 102 ދުވަހުންނެވެ.
އިންޑިއާ ހެލްތު މިނިސްޓްރީން އެކަން އިއުލާނުކޮށްފައި މިވާ ދަނޑިވަޅަކީ ކޮވިޑުގެ ދެވަނަ ރާޅެއްގައި ގައުމުގެ ހާލަތު ވަރަށް ބޮޑަށް ގޯސްވެފައިވާ ދަނޑިވަޅަކެވެ.
އެގޮތުން ދުވާލެއްގެ މައްޗަށް 100،000 އެއްހާ މީހުން ޕޮޒިޓިވްވަމުން ދާއިރު، 800 އެއްހާ މީހުން ކޮންމެ ދުވަހަކު ވެސް މި ބަލީގައި މަރުވެ އެވެ.
އޭގެ އިތުރުން އިންޑިއާއަށް ވެކްސިނުގެ ދަތިކަމާ ވެސް ކުރިމަތިލާން ޖެހިފަ އެވެ. ބައެއް ސްޓޭޓުތަކުގައި ސްޓޮކް ނެތް ކަމަށް ބުނި ނަމަވެސް މައި ސަރުކާރުން ބުނީ ސްޓޮކް ހުންނާނެ ކަމަށެވެ.
ސްޓޮކް ނެތް ކަމަށް ބުނެ ފަތުރަނީ ދޮގު ވާހަކަތަކެއް ކަމަށާއި 40 މިލިއަން ޑޯޒް ރައްކާކޮށްފައި ހުންނާނެ ކަމަށް ބޮޑުވަޒީރު ނަރެންދްރަ މޯދީގެ ސަރުކާރުން ބުނެފައި ވެއެވެ.
އިންޑިއާގެ އަމާޒަކީ ޖުލައި މަހުގެ ކުރިން 250 މިލިއަން މީހުންނަށް ވެކްސިން ދިނުމެވެ. އެ ލަނޑުދަނޑިއަށް ވާސިލްވުމަށް ވެކްސިން ޕްރޮގްރާމުގެ ދުވެލި އަވަސް ކުރަން ޖެހޭ ކަމަށް ތަޖުރިބާކާރުން ބުނެ އެވެ.
މިހާތަނަށް އިންޑިއާގައި 12 މިލިއަން މީހުންނަށް ކޮވިޑް ޖެހިފައި ވާއިރު، 167،000 މީހުން ވަނީ މަރުވެފަ އެވެ. އެމެރިކާ އާއި ބްރެޒިލްއަށް ފަހު އަދަދުތައް އެންމެ މަތިކޮށް އުޅެނީ އިންޑިއާގަ އެވެ.
