ރާއްޖެ ހިމެނޭ ދެކުނު އޭޝިއާ ސަރަހައްދުން ކޮވިޑް ޖެހިގެން މިހާތަނަށް 15 މިލިއަނަށް ވުރެ ގިނަ މީހުން މަރުވެފައިވާ ކަމަށް ރޮއިޓާޒްގެ ތަފާސްހިސާބުން ދައްކައިފި އެވެ.
ދެކުނު އޭޝިއާގައި ހިމެނެނީ ރާއްޖެ، އިންޑިއާ، ބަންގްލަދޭޝް، ބޫޓާން، ނޭޕާލް އަދި ސްރީ ލަންކާ އެވެ. ދުނިޔޭގައި ކޮވިޑް ޖެހުނު މީހުންގެ 11 ޕަސެންޓު ނިސްބަތްވަނީ އެ ގައުމުތަކަށެވެ. އަދި ކޮވިޑުގައި މަރުވި މީހުންގެ ހަ ޕަސެންޓު ވެސް ނިސްބަތްވަނީ މި ހަ ގައުމަށެވެ. މި ސަރަހައްދުގައި ދިރިއުޅެނީ ދުނިޔޭގެ ޖުމްލަ އާބާދީ ކަމުގައިވާ 7.59 ބިލިއަން މީހުންގެ 23 ޕަސެންޓެވެ.
ތިން ވަނައަށް އެންމެ ގިނަ ޕޮޒިޓިވް ކޭސް ފެނިފައިވާ އިންޑިއާ ހިއްސާކުރަނީ ދެކުނު އޭޝިއާގެ ޖުމްލަ ކޭސްތަކުގެ 84 ޕަސެންޓެވެ.
ދުނިޔޭގެ ދެ ވަނައަށް އެންމެ އާބާދީ ބޮޑު އިންޑިއާގައި މިއަދު ވެސް 145،384 މީހުން ޕޮޒިޓިވްވެ، 794 މީހުން މަރުވި އެވެ. ކޭސްތައް އިތުރުވީ ރައްކާތެރިކަމުގެ ފިޔަވަޅުތަކަށް އަމަލު ނުކުރާތީ ކަމަށް އިންޑިއާ ސަރުކާރުން ބުނެ އެވެ.
ދެކުނު އޭޝިއާގައި ދެ ވަނައަށް އެންމެ ހާލަތު ގޯސް ޕާކިސްތާނުގައި ޖުމްލަ 700،000 ކޭސް ރިޕޯޓުކޮށްފައި ވާއިރު 15،000 މީހުން މަރުވެފައި ވެއެވެ.
ބަންގްލަދޭޝުން ފެންނަމުންދަނީ ދުވާލަކު 7،000 އެއްހާ ޕޮޒިޓިވް މީހުންނެވެ. އެ ގައުމުން މިހާތަނަށް 678،937 މީހުންނަށް މި ބަލި ޖެހިފައި ވެއެވެ.
ރޮއިޓާޒްއިން ރިޕޯޓުކުރާ ގޮތުގައި މިދިޔަ ހުކުރު ދުވަހުގެ ނިޔަލަށް ދެކުނު އޭޝިއާގައި މަދުވެގެން 94.1 މިލިއަން މީހުންނަށް ވަނީ ކޮވިޑް ވެކްސިނުގެ ފުރަތަމަ ޑޯޒް ޖަހާފަ އެވެ.
