އިންޑިއާގެ ވެސްޓް ބެންގޯލް ސްޓޭޓުގައި މިއަދު ކުރިއަށް ދިޔަ އިންތިހާބުގައި ހަމަނުޖެހުން ހިނގާ ބަޑިޖެހުމުގެ ސަބަބުން ފަސް މީހުން މަރުވެފައިވާ ކަމަށް ފުލުހުން ބުނެފި އެވެ.
ސަލާމަތީ ބާރުތަކުން ބަޑި ޖެހީ ވޯޓުލާ މަރުކަޒެއް ކައިރީގައި ހަމަނުޖެހުން ހިންގުމުން ކަމަށް ފުލުހުން ބުނެފައި ވެއެވެ. ނަމަވެސް ހަމަނުޖެހުން ހިނގި ސަބަބު ހާމަކޮށްފައެއް ނުވެ އެވެ.
އެހެން ހާދިސާއެއްގައި ކޮން ބަޔެއް ކަން ނޭނގޭ ހަތިޔާރު އެޅި ބަޔަކު ވަނީ ވޯޓުލާ މަރުކަޒެއް ކައިރިއަށް ގޮސް އާއްމުންގެ ގަޔަށް ބަޑި ޖަހާފަ އެވެ. އެ ހާދިސާ ތަހުގީގު ކުރަމުންދާ ކަމަށް ފުލުހުން ބުނެ އެވެ.
ނުވަދިހަ މިލިއަން މީހުންނާ އެކު އިންޑިއާގެ ހަތަރު ވަނައަށް އެންމެ އާބާދީ ބޮޑު ވެސްޓް ބެންގޯލްގައި ލޯކަލް އިންތިހާބު ބާއްވަނީ އަށް މަރުހަލާއަކަށް ބަހާލައިގެންނެވެ.
ވެސްޓް ބެންގޯލްގެ އިތުރުން އެހެން ތިން ސްޓޭޓެއް ހިމެނޭހެން ވޯޓުލުން ފަށާފައިވަނީ މާޗް މަހުގެ ފަހުކޮޅު އެވެ. މަރުހަލާތަކަށް ކުރިއަށް ގެންދާތީ ވޯޓުލައި ނިންމުމަށް މަސް ދުވަސް ނަގާނެ އެވެ. އިންތިހާބުގެ ނަތީޖާ އިއުލާނު ކުރާނީ މޭ ދެ ވަނަ ދުވަހު އެވެ.
