މިޔަންމާގެ ބަގާވާތަށް ފަހު ހިނގަމުންދާ ހަމަނުޖެހުމުން ސަލާމަތް ވާން އެ ގައުމުގެ ގިނަ އަދަދެއްގެ ރައްޔިތުން ބޯޑަރު ހުރަސްކޮށް އިންޑިއާއަށް ހިޖުރަ ކުރަން ފަށައިފި އެވެ.
ބީބީސީއިން ރިޕޯޓުކޮށްފައިވާ ގޮތުގައި ގިނައިން ހިޖުރަ ކުރަމުން ދަނީ ދެ ގައުމުގެ ގުޅޭ ބޯޑަރު ސަރަހައްދުގައި ދިރިއުޅޭ މީހުންނެވެ. އެ މީހުން އިންޑިއާއަށް އެތެރެވާން ބޭނުން ކުރަނީ ޖަންގަލި ތެރޭގައި ހަދާފައިވާ މަގުތަކެވެ.
މިޔަންމާގެ އަސްކަރިއްޔާއިން ފެބްރުއަރީ އެއްވަނަ ދުވަހު ބަގާވާތް ކުރުމަށް ފަހު އިންތިހާބީ ލީޑަރު އަންގް ސަން ސޫ ކީ އާއި އެހެން ވެރިން ވަނީ ހައްޔަރުކޮށްފަ އެވެ. އެއާއެކު ރައްޔިތުން އަންނަނީ މެދުކެނޑުމެއް ނެތި މުޒާހަރާ ކުރަމުންނެވެ.
ލޭއޮހޮރުން ބޮޑުވެފައިވަނީ މުޒާހަރާގެ ބައިވެރިންނަށް އަމާޒުކޮށް ސަލާމަތީ ބާރުތަކުން ބަޑިޖަހަމުން ދާތީ އެވެ. މިހާރު ވެސް މުޒާހަރާގެ ތެރެއިން 600 އަށް ވުރެ ގިނަ މީހުން މަރުވެއްޖެ އެވެ.
އޭގެ އިތުރުން ވެސް ސިފައިން ދަނީ ގެތައް ލޫޓުވާ، މީހުން ރޭޕް ކުރުމާއި ކުޑަކުދިން މެރުން ފަދަ ޖަރީމާތައް ހިންގަމުން ކަމަށް މިޔަންމާގެ ރައްޔިތުންނާ ހަވާލަދީ ބީބީސީގައި ރިޕޯޓުކޮށްފައި ވެ އެވެ.
ނަމަވެސް އަސްކަރިއްޔާއިން ވަނީ އެ ތުހުމަތުތައް ދޮގުކޮށްފަ އެވެ. އަދި އެފަދަ ޖަރީމާއެއް ހިންގައިފި ނަމަ ތަހުގީގު ކުރާނެ ކަމަށް ބުނެފައި ވެއެވެ.
މިޔަންމާގައި ހިނގަމުންދާ ހަމަނުޖެހުމާ ގުޅިގެން ބައިނަލްއަގްވާމީ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. އިންޑިއާއިން އެންމެ ފުރަތަމަ ނިންމީ މިޔަންމާއިން އަންނަނ ރެފުއިޖީން އަނބުރާ ފޮނުވާލުމަށެވެ.
އެކަމަކު އާއްމުންގެ ކަންބޮޑުވުން ހުރި މިންވަރު ފާހަގަވުމުން މިހާރު ނިންމާފައިވަނީ "އިންސާނިއްޔަތަށްޓަކައި ފިޔަވަޅު އަޅާ" އެމީހުންނަށް ރައްކާތެރިކަން ދިނުމަށެވެ.
މިޔަންމާގެ ރެފިއުޖީން ބުނެފައި ވަނީ އެ މީހުން އަނބުރާ ގައުމަށް ދާނީ ހާލަތު ރަނގަޅުވުމުން ކަމަށެވެ. އޭގެ އިތުރުން ބޯޑަރު ކައިރީގައި އުޅޭ އިންޑިއާގެ އާއްމުން ވެސް ބޭނުންވަނީ އެ މީހުންނަށް އެހީވުމަށެވެ.
ނަމަވެސް ގަވާއިދާ ހިލާފަށް ގައުމަށް މީހުން އެތެރެވާ މައްސަލަ އިންޑިއާގައި ވަނީ ދާދި ފަހުން ހޫނުވެފަ އެވެ. އެހެންކަމުން ވެސްޓް ބެންގޯލް އާއި އައްސާމް ސްޓޭޓުގެ އިންތިހާބު ކުރިއަށް އޮތުމާއެކު މިޔަންމާގެ ރެފިއުޖީން ތިބީ އެ މީހުންނަށް ވާނެ ގޮތަކާ މެދު ކަންބޮޑުވެފައި ކަމަށް ބީބީސީގައި ވެއެވެ.
