ވެރިކަންކުރާ އެމްޑީޕީ އާއި އިދިކޮޅު ޕީޕީއެމްގެ މެދުގައި ވާދަވެރިކަން ބޮޑު ލޯކަލް ކައުންސިލް އިންތިހާބުގެ ވޯޓުލުން މުޅި ރާއްޖޭގައި މިއަދު ހެނދުނު ފަށައިފި އެވެ.
ލާމަރުކަޒީ ގާނޫނުގެ ދަށުން ރާއްޖޭގެ ހަތަރު ވަނަ ކައުންސިލް އިންތިހާބު މި ބާއްވާނީ ކޮވިޑް-19އާ ގުޅިގެން އަހަރަކަށް ދިގު ދެންމުމަށް ފަހު އެވެ. ގާނޫނުއަސާސީ އާއި ގާނޫނަށް ބަދަލުގެނެސްގެން ބާއްވާ މި އިންތިހާބުގެ ކެމްޕޭން އިއްޔެ ނިންމާލި އިރު ބަލީގެ ހާލަތާ ހެދި މާ ފޯރިގަދަ ކެމްޕޭނެއް ކުރިއަކަށް ނުދެ އެވެ.
އެކަމަކު، އިންތިހާބުގެ ވޯޓުލުން މިއަދު ހަތެއް ޖެހިއިރު ފެށިއިރު، ވޯޓުލާ މަރުކަޒުތަކުގައި 5:30 އިން ފެށިގެން ވަނީ ކިއޫ ހަދައިފަ އެވެ.
މި އިންތިހާބުގައި ވޯޓުލުމުގެ ހައްގު 273،128 މީހުންނަށް ލިބިގެންވެ އެވެ. މާލެ އާއި ރަށްތަކުގައި ޖުމްލަ 713 ވޯޓުފޮށި ބަހައްޓާފައިވެ އެވެ.
މި އިންތިހާބު އެމްޑީޕީ އާއި ޕީޕީއެމަށް މުހިއްމުވަނީ، ލާމަރުކަޒީ ގާނޫނުން ކައުންސިލްތަކަށް ބޮޑެތި ބާރުތައް ދިނުމަށް ފަހު ބާއްވާ އިންތިހާބަށް ވާތީ އެވެ. ދެ ޕާޓީގެ ވެސް އަމާޒަކީ ބޮޑެތި ސިޓީތަކާ އެކު ކައުންސިލްތަކުގެ މެޖޯރިޓީ ނެގުމެވެ.
ފަސް އަހަރުގެ ވެރިކަމުގެ ދައުރުގެ މެދުތެރެއިން މި އޮންނަ އިންތިހާބަކީ އެމްޑީޕީ ޕީޕީއެމަށް މުހިއްމު ވަނީ 2023 ގެ ރިޔާސީ އިންތިހާބާއި ދެ ޕާޓީގެ ވެސް ސިޔާސީ ކުރިމަގާއި ގުޅިފައި އޮތް އިންތިހާބަކަށް ވާތީ އެވެ.
ގާނޫނުން ދީފައިވާ ބާރުތައް
- ދައުލަތުގެ އާމްދަނީގެ ފަސް ޕަސެންޓް ކައުންސިލްތަކަށް
- ބިމާއި ރަށާއި ފަޅާއި ފަރު ފަދަ ތަންތަނުން ލިބޭ ކުލީގެ އާމްދަނީގެ 40 ޕަސެންޓް
- މީހުން ދިރިއުޅޭ ރަށްރަށުގެ އިހްތިސާސްގައިވާ ބިމުގެ ކުލި.
- ކައުންސިލްތަކުން ނަގާ ފީ.
- ކުންފުންޏާއި ކޯޕަރޭޓިވްސް އުފައްދައިގެން ވިޔަފާރި ކުރުމާއި އާމްދަނީ ހޯދުން.
- ފަސް މިލިއަނަށް ވުރެ ދަށުގެ ޕީއެސްއައިޕީ މަޝްރޫއުތައް ހިންގުން.
އެކުގައި ބާއްވާ ދެ އިންތިހާބު: 1912 ކެންޑިޑޭޓުން އިންތިހާބުކުރާނެ
ރަށު ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކަށް ޖުމްލަ 982 މެމްބަރުން އިންތިހާބު ކުރަންޖެހެ އެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ޖުމްލަ 930 މެމްބަރުން އިންތިހާބު ކުރާނެ އެވެ.
- ރަށު ކައުންސިލްތަކަށް: 918
އަތޮޅު ކައުންސިލްތަކަށް: 18
ސިޓީ ކައުންސިލްތަކަށް: 46
އަންހެނުންގެ ކޮމިޓީތަކަށް: 930
ވޯޓުފޮށިތަކުގެ ތަފްސީލު
މާލެ، ހުޅުމާލެ، ވިލިމާލެ: 242
ތިން ސިޓީ (ކުޅުދުއްފުށި، އައްޑޫ، ފުވައްމުލައް) 325
ރިސޯޓް: 137
ޖަލު: 4
އިންޑިއާ: 1
ސްރީ ލަންކާ: 4
ބުރަބޮޑު، ތަފާތު އިންތިހާބެއް
ރާއްޖޭގައި ބޭއްވި އެހެން އިންތިހާބުތަކާ އަޅާބަލާއިރު މި އިންތިހާބަކީ އިލެކްޝަންސް ކޮމިޝަނަށް ބުރަ ބޮޑު އިންތިހާބެކެވެ. ކޮވިޑުގެ ހާލަތަށް ވުމާއެކު ރައްކާތެރިކަމާ އެކު މި އިންތިހާބު ބޭއްވުމުގެ ގޮތުން ގިނަ ފިޔަވަޅުތަކެއް ވަނީ އަޅަން ޖެހިފަ އެވެ. އޭގެތެރޭގައި ވޯޓު ކިޔޫ ދުރުދުރުގައި ހެދުމާއި ދުރުދުރުގައި ވޯޓު އޮފިޝަލުން ތިބެން ޖެހުމުން ދެ ގުނަ އިތުރަށް އޮފިޝަލުން ހޯދުން ހިމެނެ އެވެ.
އިލެކްޝަންސްގެ އޮފިޝަލުން ވޯޓުލާ މަރުކަޒެއްގައި ހަރަކާތްތެރިވަނީ. -- ފޮޓޯ : ހުސެއިން ވަހީދު / އަދަދު
މިއީ، މިހާތަނަށް ބާއްވާ އެންމެ ހަަރަދު ބޮޑު ކައުންސިލް އިންތިހާބެވެ.
ހަރަދު ބޮޑުވި ސަބަބުތަކުގެ ތެރޭގައި ވޯޓްލާ މަރުކަޒުތައް އެތައް ގުނައެއް އިތުރުވުން ހިމެނެ އެވެ. ކުރިން ނިންމީ 532 ވޯޓްލާ މަރުކަޒެއް ހަދާށެވެ. އެކަމަކު، ފަހުން އެ އަދަދު 700 އަށް ވުރެ އިތުރު ކުރަން ޖެހުނީ އެޗްޕީއޭގެ މިންގަނޑަށް ތަބާވުމުގެ ގޮތުން ކަމަށް އިލެކްޝަންސް ކޮމިޝަނުން ބުނެ އެވެ.
