ތ. ކަނޑޫދޫ ކައުންސިލްގެ ރައީސް ކަމަށް ވާދަކުރި ޕީޕީއެމްގެ ކެންޑިޑޭޓްގެ ކެންޑިޑެންސީ ކޯޓުން ބާތިލު ކުރުމުން އޭނާއާ ދެން ވާދަ ކުރި ކެންޑިޑޭޓް އޮޓޯއިން ހޮވުނު މައްސަލަ އެ ރަށުގެ ބައެއް ރައްޔިތުންގެ ފަރާތުން ހައިކޯޓަށް ހުށަހަޅައިފި އެވެ.
ޕީޕީއެމްގެ ކެންޑިޑޭޓް ހަސަން މޫސާގެ ކެންޑިޑެންސީ އިލެކްޝަން ކޮމިޝަނުން ބާތިލް ކުރުމުން އޭނާ އެ މައްސަލަ ސުޕްރީމް ކޯޓަށް ހުށަހެޅުމުން ފުރަތަމަ އެ ކޯޓުން ހުކުމް ކޮށްފައިވަނީ އޭނާގެ ކެންޑިޑެންސީ ބާތިލް ކުރީ ގޯސްކޮށް ކަމަށެވެ. ނަމަވެސް، އަނެއްކާވެސް އިލެކްޝަން ކޮމިޝަނުން މައްސަލަ ސުޕްރީމް ކޯޓަށް ހުށަހެޅި އެވެ.
ދެވަނަ ފަހަރަށް ސުޕްރީމް ކޯޓުގައި މައްސަލަ ކުރިއަށް ގެންގޮސް، އެ ކޯޓުން ނިންމީ ކެންޑިޑެންސީ ބާތިލް ކަމަށެވެ. އެއީ، ހަސަން މޫސާގެ މައްޗަށް ދަރިންގެ ސާބިތު ހަރަދުގެ މައްސަލައިގައި ފައިސާ ނުދައްކައިގެން ހުކުމެއް ކޮށްފައިވާތީ އެވެ.
ހަސަން މޫސާގެ ކެންޑިޑެންސީ ބާތިލު ކުރުމާއެކު އޭނާއާ ވާދަ ކުރި އެމްޑީޕީގެ ކެންޑިޑޭޓް އަހުމަދު ރީހާން ވަނީ ކަނޑޫދޫ ކައުންސިލްގެ ރައީސް ކަމަށް ހޮވިފަ އެވެ. ގާނޫނު ބުނާ ގޮތުން އެއް ކެނޑިޑޭޓަކު ވާދަ ކުރާނަމަ އެ މީހަކު އޮޓޮމެޓިކުން ހޮވެ އެވެ.
ކަނޑޫދޫއަށް ނިސްބަތްވާ ގާނޫނީ ވަކީލް މުހައްމަދު ތަސްލީމް، "އަދަދު"އަށް ވިދާޅުވީ ވޯޓަކާ ނުލައި ކައުންސިލްގެ ރައީސް ހޮވުމުން ރަށުގެ ވެރިޔާ ކަނޑައެޅުމުގެ ހައްގު އެރަށު ރައްޔިތުންނަށް ގެއްލޭ ކަމަށެވެ. އެހެންކަމުން އެ މައްސަލަ ރަށުގެ 100 އަށް ވުރެން ގިނަ މީހުންގެ ފަރާތުން ހައި ކޯޓަށާއި ހިއުމަން ރައިޓްސް ކޮމިޝަންއަށް ހުށަހަޅާފައިވާ ކަމަށް އޭނާ ވިދާޅުވި އެވެ.
އިއްޔެ ހައި ކޯޓަށް އެ މައްސަލަ ހުށަހެޅިއިރު އެ މައްސަލަ ބަލައިގެން ކަމެއް ނުވަތަ ނޫން ކަމެއް އަދި ނާންގަ އެވެ.
ގާނޫނީ ވަކީލް ވިދާޅުވީ ހަސަން މޫސާގެ ކެންޑިޑެންސީ ބަލައިގަތުމަށް ފަހު ފަހުން ބާތިލް ކުރުމުން އެކަމުގައި ދައުލަތުގެ އިހުމާލުވާ ކަމަށެވެ.
"ގާނޫނީ ގޮތުން އިޖުރާތްތައް ފުރިހަމަ ކުރި، އިދާރީ އޮޅުންތަކެއް އެބައޮތް މި މައްސަލާގައި. އޭގެ ސަބަބުން އިތުރު މީހަކަށް ކުރިމަތިލުމުގެ ފުރުސަތު ވެސް ގެއްލުނު،" ތަސްލީމް ވިދާޅުވި އެވެ.
ކަނޑޫދޫގައި މިހާރު ފަސް ކައުންސިލަރުން ތިބޭއިރު އޭގެ ތެރެއިން ހަތަރު މެމްބަރުން ނިސްބަތް ވަނީ އެމްޑީޕީއަށެވެ. އަނެއް ކައުންސިލަރު ނިސްބަތް ވަނީ ޕީޕީއެމަށެވެ.
