އިނގިރޭސިވިލާތުގެ ރާނީ އެލިޒަބަތު ދެވަނައިގެ ފިރިކަލުން، އަމީރު ފިލިޕް އުމުރުފުޅުން 99 އަހަރުގައި އަވަހާރަވެއްޖެ އެވެ.
ފިލިޕް އާއި ރާނީ އަލިޒަބަތު ކައިވެނި ބައްލަވައިގެންނެވީ 1947 ވަނަ އަހަރު އެވެ. އެއީ އެކަމަނާ ރާނީއަށް ވެވަޑައިގެންނެވުމުގެ ފަސް އަހަރު ކުރި އެވެ.
ފިލިޕްއަށް ވަނީ ހަތަރު ދަރިކަލުންނާއި، އަށް ކާފަ ދަރިކަލުންނާއި، 10 މުނިކާފަ ދަރިކަލުން ލިބިވަޑައިގެންފަ އެވެ.
އެ ދެ ކަނބަލުންގެ ފުރަތަމަ ދަރިކަލުން ޗާލްސް އުފަންވެ ވަޑައިގެންނެވީ 1948 ގައެވެ. އޭގެ ފަހުން 1950 ގައި އޭން އާއި 1960 ގައި އެންޑްރޫ އަދި 1964 ގައި އެޑްވާޑް އުފަންވެ ވަޑައިގެންނެވި އެވެ.
ރާނީ އާއި ފިލިޕްގެ ކައިވެނި ހަފްލާ.
ފިލިޕް އަވަހާރަވެ ވަޑައިގެންނެވި ކަން ޝާހީ ގަނޑުވަރު ބަކިންހަމް ޕެލެސްއިން އިއުލާނުކޮށްފައި ވާއިރު، މީގެ ދުވަސްކޮޅެއް ކުރިން އެމަނިކުފާނަށް ވަނީ ހޮސްޕިޓަލުގައި ފަރުވާ ދެއްވާފަ އެވެ.
އޭރު ފަރުވާ ދެއްވާފައި ވަނީ ކުރިން ދިމާވެފައިވާ ހިތުގެ މައްސަލައަކާ ގުޅިގެންނެވެ. ގާތްގަނޑަކަށް މަސް ދުވަސް ހޮސްޕިޓަލުގައި ހޭދަކުރެއްވުމަށް ފަހު އެނބުރި ގަނޑުވަރަށް ވަޑައިގެންނެވީ މިދިޔަ މަހު އެވެ.
ބަކިންހަމް ޕެލެސްއިން މިއަދު ނެރުނު ބަޔާނުގައި ބުނީ ފިލިޕް އަވަހާރަވެ ވަޑައިގެންނެވީ ރާނީއާ އެކު ދިރިއުޅުއްވާ ވިންޑްސާ ކާސްލްގައި ކަމަށެވެ.
ފިލިޕް އުފަންވެ ވަޑައިގެންނެވީ 10 ޖޫން، 1921 ގައި ގްރީސްގެ ރަށެއް ކަމުގައިވާ ކޯފޫގަ އެވެ. އެމަނިކުފާނުގެ ބައްޕާފުޅަކީ ގްރީސް އާއި ޑެންމާކުގެ އަމީރު އެންޑްރޫ އެވެ.
އެމަނިކުފާނުގެ މަންމާފުޅަކީ ކުރީގެ އިނގިރޭސި ރާނީ ވިކްޓޯރިއާގެ މުނިމާމަ ދަރިކަނބަލުން އަމީރާ އެލިސް އެވެ.
