ވެރިކަންކުރާ އެމްޑީޕީ އާއި އިދިކޮޅު ޕީޕީއެމްގެ މެދުގައި ވާދަވެރި ލޯކަލް ކައުންސިލް އިންތިހާބަށް އެއް ދުވަހަށް ވެފައި ވަނިކޮށް ދައުލަތުގެ މީޑިއާ، ޕީއެސްމްގެ މިއަދުގެ ހުރިހާ ވަގުތެއް ވިޔަފާރި އުސޫލުން އެމްޑީޕީން ގަނެފި އެވެ.
އަންނަ ހޮނިހިރު ދުވަހު އޮންނަ އިންތިހާބަށް އެމްޑީޕީން ކުރި ކެމްޕޭން މިއަދު ނިންމާލުމުގެ ގޮތުން މުޅި ދުވަހުގެ ހަރަކާތްތަކެއް ކުރިއަށް ގެންދަން އޮތީ ރާވައިފަ އެވެ. ހެނދުނު އެ ހަރަކާތްތައް ފެށީ ކެމްޕޭން ނިންމާލުމުގެ ޖަލްސާ އއ. ރަސްދޫގައި ބާއްވަން، އެ ޕާޓީގެ ލީޑަޝިޕްގެ ބޭފުޅުން ސަފާރީީ އާއި ކަންނެލި އޮޑިއެއްގައި ފުރާވަޑައިގަތް ހިސާބުންނެވެ.
މި އިވެންޓުގެ ލައިވް ކަވަރޭޖުން ފެށިގޮތަށް މެދުކެނޑުމެއް ނެތި އެމްޑީޕީގެ ކެމްޕޭން ޕީއެސްއެމުން އަންނަނީ ލައިވްކޮށް ގެނެސްދެމުންނެވެ. މި ޓެލެތޯންގައި އެމްޑީޕީގެ ސިޔާސަތުތަކާއި ވައުދުތަކާ ގުޅޭ ގޮތުންނާއި އެމްޑީޕީއަށް މި އިންތިހާބު މުހިއްމުވާ ސަބަބުތަކާ ގުޅޭ ގޮތުން އެކި ބޭފުޅުން ދައްކަވާ ވާހަކަތައް ހިމެނޭ ޕެނަލް ޑިސްކަޝަންތައް ހިމެނެ އެވެ.
އެ ޕެނަލް ޑިސްކަޝަނުގައި އެމްޑީޕީގެ މޭޔަރު ކެންޑިޑޭޓް އަނަސް އަބްދުއްސައްތާރާއި އިކޮނޮމިކް މިނިސްޓަރު ފައްޔާޒު އިސްމާއިލާއި އެޑިއުކޭޝަން މިނިސްޓަރު އައިޝަތު އަލީގެ އިތުރުން އެމްޑީޕީގެ ބައެއް މަޖިލިސް މެންބަރުން ބައިވެރިވެވަޑައިގެންނެވި އެވެ.
ދޭތެރެއަކުން އެމްޑީޕީގެ ކެމްޕޭން ލަވަ ވެސް އަންނަނީ ގެނެސްދެމުންނެވެ.
ދައުލަތުގެ މީޑިއާގެ މުޅި ދުވަސް ކެމްޕޭނަށް ހާއްސަކޮށްފައިވާ ސަބަބާ ގުޅޭ ގޮތުން "އަދަދު"ން ސުވާލު ކުރުމުން ޕީއެސްއެމްގެ ސީއީއޯ އަލީ ހާލިދު ވިދާޅުވީ އެމްޑީޕީގެ ކެމްޕެއިން ހަރަކާތްތައް ޕީއެސްއެމްއިން ގެނެސްދެނީ ވިޔަފާރި އުސޫލުން ވަގުތު ވިއްކައިގެން ކަމަށެވެ.
އޭނާ ވިދާޅުވި ގޮތުގައި، އެމްޑީޕީއިން ވަނީ މިރެއާ ހަމައަށް ވަގުތު ޕީއެސްއެމްއިން ގަނެފަ އެވެ. މިއީ، އެހެން ހުރިހާ ޕާޓީތަކަކަށް ވެސް އޮތް ފުރުސަތެއް ކަމަށް އޭނާ ވިދާޅުވި އެވެ.
އަލީ ވިދާޅުވީ އެމްޑީޕީއަށް ވަގުތު ވިއްކީ ޕީއެސްއެމްގައި އެކަމަށް ކަނޑައަޅާފައިވާ އުސޫލުގެ ތެރެއިން، އާންމުކޮށް އިއުލާންކޮށްފައިވާ ރޭޓުގައި ކަމަށެވެ.
މިއީ، ޕީއެސްއެމްގައި އެންމެންނަށް ހަމަހަމަކަމާ އެކު އޮތް ފުރުސަތެއް، --އަލީ ހާލިދު
ވިޔަފާރި އުސޫލުން ޕީއެސްއެމްއިން ވަގުތު ވިއްކާ ރޭޓްތައް އެކުލެވޭ ފޮތެއް އެ ކުންފުނީގެ ވެބްސައިޓްގައި ޝާއިއުކޮށްފައިވެ އެވެ. އޭގައި ސިޔާސީ ގޮތުން އަދި ކޮމާޝަލީ ވަގުތު ވިއްކާނެ ރޭޓްތައް ސާފުކޮށްދީފައި އެބައޮތެވެ.
އިންތިހާބުތަކާ ބެހޭ އާންމު ގާނޫނުގެ ގާނޫނުގެ 30 ވަނަ މާއްދާގެ (ނ)ގައި ބުނެފައިވާ ގޮތުގައި، ކެންޑިޓޭޓުންނަށް ހާއްސަ ކުރާ ވަގުތުގެ ތެރެއުން އެއް ކެންޑިޑޭޓަކަށް ދޭން ކަނޑައަޅާ ވަގުތަށްވުރެ 10 ޕަސެންޓަށް ވުރެ އިތުރު ވަގުތު، އެއް ކެންޑިޑޭޓަކަށް ނުވަތަ އެއް ސިޔާސީ ޕާޓީއަކަށް ނުވަތަ ނުވަތަ އެއް ކެންޑިޑޭޓަކަށާއި އެ ކެންޑިޑޭޓު ނިސްބަތްވާ ސިޔާސީ ޕާޓީއަށް ދީ ނުވަތަ ވިއްކައިގެން ނުވާނެ ކަމަށެވެ.
އެމްޑީޕީގެ ކެމްޕެއިން ހަރަކާތްތައް ބާރަށް ކުރިއަށް ގެންދަމުންދާއިރު، އިދިކޮޅުން ވަނީ ކެމްޕެއިން ކުރުމަށް އެކަށީގެންވާ ފުރުސަތުތަކެއް ލިބެމުން ނުދާ ކަމަށް ބުނެ ކަންބޮޑުވުން ފާޅުކޮށްފަ އެވެ.
ކައުންސިލް އިންތިހާބަށް ޕީޕީއެމްއިން ކަނޑައަޅާފައިވާ ކެމްޕެއިން މެނޭޖަރު މުއާޒު ރަޝީދު މިއަދު ވިދާޅުވި ގޮތުގައި، އެމްޑީޕީއިން ގެންދަނީ ނާޖައިޒު ގޮތުގައި ބާރުގެ ބޭނުންކޮށްގެން ކެމްޕެއިން ހިންގަމުންނެވެ. ދައުލަތުގެ މީޑިއާ ބޭނުންކޮށްގެން ވެސް ފެންނަނީ އިންތިހާބަށް ނުފޫޒު ފޯރުވަމުންދާ ތަން ކަމަށް ވިދާޅުވި އެވެ.
"އަޅުގަނޑުމެންނަށް ކެމްޕެއިން ކުރުމުގެ ހަމަހަމަ ފުރުސަތުތަކެއް ލިބެމަކުން ނުދޭ،" މުއާޒު ރަޝީދު ވިދާޅުވި އެވެ.
ރަސްދޫ ފަޅު ތެރޭގައި މިރޭ އެމްޑީޕީން ކެމްޕޭން ނިންމާ ޖަލްސާގައި ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ބައިވެރިވެވަޑައިގަންނަވާ ގޮތަށް ވަނީ ހަމަޖައްސައިފަ އެވެ.
