ކޮވިޑް-19 އިން ރައްކާތެރިވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ކަނޑައަޅާފައިވާ ގައިޑްލައިންތަކާ ހިލާފަށް އެމްޑީޕީން ކެމްޕޭން ކުރާތީ އިދިކޮޅު ޕީޕީއެމް/ޕީއެންސީ ކޯލިޝަނުން މިއަދު ކަންބޮޑުވުންފާޅުކޮށްފި އެވެ.
އިދިކޮޅު ކޯލިޝަނުގެ ކެމްޕޭނު މެނޭޖަރު އަދި ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެމްބަރު މުއާޒް މުހައްމަދު ރަޝީދު ވިދާޅުވީ، އެމްޑީޕީގެ ކެމްޕޭނަށް އެޗްޕީއޭގެ ގައިޑްލައިންތަކާ ހިލާފަށް އޮޑި ދޯނި ފަހަރުގައި ރަށްރަށަށް ދަތުރުކުރަމުންދާ ކަމަށެވެ.
މުއާޒް އެ އިޝާރާތް ކުރެއްވީ، އެމްޑީޕީގެ ކެމްޕޭން ލާމަރުކަޒުކޮށް ނިންމާލުމަށް ކަމަށް ބުނެ އެ ޕާޓީގެ ލީޑަޝިޕް އއ. ރަސްދުުއަށް މިއަދު ފެއްޓެވި ދަތުރަށެވެ.
އެމްޑީޕީގެ "ރަށްވެހި ފަތިސް" ކެމްޕޭން ނިންމުން މިރޭ ބާއްވަން ހަމަޖައްސާފައި އޮތީ ރަސްދޫ ފަޅު ތެރޭގަ އެވެ. ތިން ސަފާރީ އާއި ކަންނެލި އޮޑިއެއްގައި މިރޭ ބާއްވާ ޖަލްސާގައި ރައީސް އިބްރާހިމް މުހައްމަދު ސޯލިހް ވެސް ބައިވެރިވެވަޑައިގަންނަވާނެ އެވެ.
އެޗްޕީއޭގެ ގައިޑްލައިން އޮތީ ރަސްދުއަށް އަރައިފި ނަމަ ކަރަންޓީންވާން ޖެހޭ ގޮތަށެވެ. އެހެންވެ އެމްޑީޕީގެ ނިންމުމަކީ އެއްވެސް މީހަކު ރަށަށް ނުފައިބައި ސަފާރީތަކުގައި ތިބެ ލައިވްކޮށް ކެމްޕޭން ނިންމުމުގެ ޖަލްސާ ބޭއްވުމެވެ.
ނަމަވެސް، ސަފާރީތަކުގައި ލަވަ ޖަހައިގެން، ވަރަށް ފޯރީގައި އެމްޑީޕީގެ އިސްވެރިންނާއި ބައެއް ވަޒީރުން ވެސް ތިއްބެވިއިރު، ތިން ފޫޓުގެ ގައިދުރުކުރުމުގެ ފިޔަވަޅަށް އިހުތިރާމްކުރާ ތަނެއް ނުފެނެ އެވެ.
އެ ޝަކުވާ ކުރައްވަމުން މުއާޒް ވިދާޅުވީ އެ ދޯނި ފަހަރުތަކުގައި އެމްޑީޕީގެ އިސް ބޭފުޅުން ހިމެނޭ ގޮތަށް، ގިނަ އަދަދެއްގެ މެމްބަރުން ޖަމާވެ ތިބީ، އެޗްޕީއޭގެ ގައިޑްލައިނާ ހިލާފަށް ކަމަށެވެ.
"މިހާރުވެސް އެދަނީ ކެމްޕޭނު ކުރަމުން. ކޮބައިތޯ އެޗްޕީއޭ؟ ކޮބައިތޯ ގައިޑްލައިން؟،" މުއާޒް ސުވާލުކުރެއްވި އެވެ.
އިންތިހާބަށް އެމްޑީޕީން ނުފޫޒު ފޯރުވާއިރު، ކެމްޕޭނު ކުރުމަށް ހަމަ ފުރުސަތު ނުލިބޭކަމަށް މުއާޒް ތަކުރާރުކޮށް ވިދާޅުވި އެވެ.
އެހެންކަމުން މި އިންތިހާބަކީ، މިނިވަން އިންސާފުވެރި އިންތިހާބަށް ވާނެކަމާމެދު ޝައްކު ކުރެވޭ ކަމަށާއި، އިލެކްޝަންސް ކޮމިޝަނަށް ވެސް އިތުބާރެއް ނެތް ކަމަށް އިތުރަށް ވިދާޅުވި އެވެ.
މުއާޒް ވިދާޅުވީ އިންތިހާބަށް ނުފޫޒު ފޯރުވިޔަސް ވޯޓުން އެމްޑީޕީ މިފަހަރު ބަލިކޮށްލާނެ ކަމަށެވެ. ރައްޔިތުން ތިބީ މާޔޫސްވެ، ވޯޓު ފޮށި އަތުޖެހޭނެ އިރެއްގެ އިންތިޒާރުގައި ކަމަށް އޭނާ ވިދާޅުވި އެވެ.
ކޮވިޑް-19އާ ގުޅިގެން މި އިންތިހާބުގައި ތަފާތު ގޮތަކަށް ވޯޓުލާން ނިންމާފައިވާ އިރު މާސްކް އަޅައިގެން ގޮސް މަކަރު ހަދާފާނެތީ ސަމާލުވުމަށް އޭނާ ޕީޕީއެމްގެ ސަޕޯޓަރުންގެ ކިބައިން އެދިވަޑައިގަތެވެ.
ޕީޕީއެމާއި ޕީއެންސީން އެދުނީ އިންތިހާބު އޮންނަ ދުވަހުގެ 12 ޖެހުމުގެ ކުރިން އެ ދެ ޕާޓީގެ ސަޕޯޓަރުން ނުކުމެ ވޯޓުލުމަށެވެ. އޭގެ ފަހުން އިންތިހާބު ރަނގަޅަށް މޮނިޓާކުރަން ވެސް ގޮވާލި އެވެ.
