އިންޑިއާގައި ރިކޯޑު އަދަދަކަށް ކޮވިޑް ކޭސް އިތުރުވެފައިވާ މި ދަނޑިވަޅުގައި ބޮޑުވަޒީރު ނަރެންދްރަ މޯދީ ވެކްސިން ފުރިހަމަ ކުރައްވައިފި އެވެ.
މިއަދު އެ ގައުމުން 126،789 ޕޮޒިޓިވް ކޭސް ފެނިފައިވާ ކަމަށް ހެލްތު މިނިސްޓްރީގެ ތަފާސްހިސާބުން ދައްކަ އެވެ. އޭގެ އިތުރުން 685 މީހުން މަރުވެފައި ވާއިރު މިއީ ނޮވެމްބަރަށް ފަހު އެއް ދުވަހެއްގައި އެހާ ގިނަ މީހުން މަރުވި ފުރަތަމަ ފަހަރެވެ.
އިންޑިއާގައި ޖުމްލަ 12.9 މިލިއަން މީހުން ކޮވިޑަށް ޕޮޒިޓިވްވެފައި ވާއިރު، 166،862 މީހުން މިހާތަނަށް ވަނީ މި ބަލީގައި މަރުވެފަ އެވެ. އެމެރިކާ އާއި ބްރެޒިލްއަށް ފަހު އަދަދުތައް އެންމެ މަތީ އިންޑިއާގަ އެވެ.
ކޮވިޑް ކޭސްތައް އިތުރުވުން ކޮންޓްރޯލުން ނެއްޓުމުން އިންޑިއާއިން މިހާރު މަސައްކަތް ކުރަނީ ވެކްސިން ޕްރޮގްރާމުގެ ދުވެލި އަވަސް ކުރާށެވެ. އެގޮތުން ބޮޑުވަޒީރު މޯދީ ވަނީ ވެކްސިނުގެ ދެވަނަ ޑޯޒް ޖައްސަވާފަ އެވެ.
"ވެކްސިން ޖެހުމަކީ ވައިރަސް ބަލި ކުރުމަށް އޮތް މަދު ގޮތްތަކުގެ ތެރެއިން އެއް ގޮތް. ވެކްސިން ޖެހުމަށް ޝަރުތު ހަމަވާނަމަ އަވަހަށް ވެކްސިން ޖައްސަވާ،" ވެކްސިން ފުރިހަމަ ކުރެއްވުމަށް ފަހު މޯދީ ޓްވީޓު ކުރެއްވި އެވެ.
މޯދީ ޖައްސަވާފައި ވަނީ އިންޑިއާ ކުންފުނި ބާރަތު ބަޔޯޓެކުން އުފެއްދި ކޯވެކްސިނެވެ. މީގެ ފުރަތަމަ ޑޯޒް އެމަނިކުފާނު ޖެއްސެވީ މާޗް އެއްވަނަ ދުވަހެވެ.
އިންޑިއާގެ ވެކްސިން ޕްރޮގްރާމް މިދިޔަ ޖެނުއަރީ މަހު ފެށި ފަހުން މިހާތަނަށް 90 މިލިއަނަށް ވުރެ ގިނަ ސިއްހީ މަސައްކަތްތެރިންނާއި އުމުރުން 45 އަހަރުން މަތީގެ މީހުން ވަނީ އެއް ޑޯޒް ޖަހާފަ އެވެ.
އޭގެ ތެރެއިން ވެކްސިނުގެ ދެ ޑޯޒް ޖަހާ، ފުރިހަމަކޮށްފައިވަނީ 11 މިލިއަން މީހުންނެވެ. އިންޑިއާއިން ބޭނުންވަނީ އެ ގައުމުގެ 1.3 ބިލިއަން މީހުންނަށް ވެކްސިން ދީ ކޮވިޑް ފެތުރުން ކޮންޓްރޯލް ކުރާށެވެ.
