ލާމަރުކަޒީ ގަނޫނަށް ސަރުކާރުން ގެނައި އިސްލާހުތަކުގެ ދަށުން، ކައުންސިލްތަކަށް ބޮޑެތި ބާރުތަކާއި މާލީ މިނިވަންކަން ލިބިދީފައިވާއިރު، އެ ހިސާބުން ކައުންސިލްތައް ދޫކޮށްނުލެވޭނެ ކަމަށާއި، ކައުންސިލްތަކަށް ބޭނުންވާ ފަންނީ އެހީތެރިކަން ފޯރުކޮށްދޭންޖެހޭ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ)އިން ބުނެފި އެވެ.
މި ސަރުކާރުން ވަނީ ލާމަރުކަޒީ ގާނޫނަށް ގެނައިި ބަދަލުތަކާއެކު ކައުންސިލްތަކުގެ އަތްމައްޗަށް ބޮޑެތި ބާރުތަކެއް ދޫކޮށްލައިފަ އެވެ. އެތައް އަހަރެއް ވަންދެން ކައުންސިލްތަކުން އެދެމުންދިޔަ މާލީ ބާރުވެރިކަން ވަނީ ހޯދައިދީފަ އެވެ.
ކޮވިޑް-19ގެ ބަލިމަޑުކަމާއެކު ލޯކަލް ކައުންސިލް އިންތިހާބު ނުބޭއްވި، ނިޒާމަށް ގެނެވުނު ބަދަލުތަކުގެ ނަފާ ލިބެން އޮތް އިންތިޒާރު އަހަރެއްހާ ދުވަހަށް ދިގުލީ އެވެ. ނަމަވެސް، މާދަމާ ރައްޔިތުން ވޯޓުލާން ނުކުންނަ އިރު، ކައުންސިލުތަކަށް ދެވުނު ބާރުތަކުގެ ބުރަ އުފުލޭނެކަމާމެދު އޮތް ކަންބޮޑުވުން ބޮޑެވެ.
ހާއްސަކޮށް ރަށްރަށުގެ ލޭންޑް ޔޫސް ޕްލޭނާއި ތަރައްގީގެ ޕްލޭން ހެދުމާއި މާލީ ހިސާބުތައް ބަލަހައްޓައި، ޒިންމާދާރުކަމާއެކު ހިދުމަތް ކުރުމުގެ އިލްމީ އަދި ފަންނީ ގާބިލުކަން ކައުންސިލްތަކުގައި ހުންނާނެތޯ ކުރެވޭ ސުވާލުތަކެވެ.
ހަގީގީ ބާރުވެރިކަން
- ދައުލަތުގެ އާމްދަނީގެ ފަސް ޕަސަންޓް ކައުންސިލްތަކަށް
- ބިމާއި، ރަށާއި، ފަޅާއި، ފަރު ފަދަ ތަންތަނުން ލިބޭ ކުލީގެ އާމްދަނީގެ 40 ޕަސަންޓް
- މީހުން ދިރިއުޅޭ ރަށްރަށުގެ އިހްތިސާސްގައިވާ ބިމުގެ ކުލި
- ކައުންސިލްތަކުން ނަގާ ފީ
- ކުންފުންޏާއި ކޯޕަރޭޓިވްސް އުފައްދައިގެން ވިޔަފާރި ކުރުމާއި އާމްދަނީ ހޯދުން
- ފަސް މިލިއަނަށް ވުރެ ދަށުގެ ޕީއެސްއައިޕީ މަޝްރޫއުތައް ކައުންސިލްތަކަށް ހިންގޭނެ
އެފަދަ ކަންބޮޑުވުންތަކަށް އިޝާރާތް ކުރައްވައި، ކައުންސިލްތަކުގެ ބެލެނިވެރި ފަރާތް ކަމަށްވާ އެލްޖީއޭގެ ސީއީއޯ ފާތިމަތު އަފްޝަން ލަތީފް ވިދާޅުވި ގޮތުގައި ކައުންސިލުތަކުގެ އިދާރީ އޮނިގަނޑު މިހާރު އެކުލަވާލެވިފައިވާ ގޮތުން ޕްރޮގްރާމް އަދި ބަޖެޓު އޮފިސަރުން ފަދަ މަގާމުތަކަށް އިތުރު މުވައްޒަފުން ހަމަޖެއްސޭނެ ކަމަށެވެ.
މީގެ އިތުރުން ކައުންސިލްތަކުގެ ފަންނީ ގާބިލުކަން އިތުރުކުރުމަށް ދައުލަތުގެ ކަމާބެހޭ އިދާރާތަކުގެ އިތުރުން ބައިނަލްއަގުވާމީ ޖަމިއްޔާތަކާ ގުޅިގެން މިހާރުވެސް ގިނަ މަސައްކަތްތަކެއް ކުރެވެމުންދާ ކަމަށް އަފްޝަން ވިދާޅުވި އެވެ.
"ކޮވިޑް އައިސްގެން އެ މަސައްކަތް ކުޑަކޮށް މަޑުޖެހުނު. އެކަމަކު އަޅުގަނޑުމެން މި ދަނީ ކައުންސިލުތަކުގައި ތިއްބެވި އިދާރީ މުވައްޒަފުންނަށް ކެޕޭސިޓީ ބިލްޑިން ޕްރޮގްރާމްތައް ހިންގަމުން. މާލިއްޔަތު ގާނޫނަށް އަހުލުވެރިކުރުން ފަދަ ގާނޫނުތަކާއި ގަވައިދުތަކަށް އަހުލުވެރިކުރަން،" އޭނާ ވިދާޅުވި އެވެ.
ނަމަވެސް، ކައުންސިލްތަކަށް ފޯރުކޮށްދޭންޖެހޭ އެހީތެރިކަމަކީ އެއް ފަހަރު ކޮށްލާފައި ނިންމާލެވޭނެ ކަމެއް ނޫން ކަން އޭނާ ފާހަގަކުރެއްވި އެވެ.
ރައްޔިތުންގެ ޒަމާންވީ އުއްމީދުތައް ގުޅިފައިވާ ބަދަލެއްގެ ކާމިޔާބީ ޔަގީންކުރުމަށްޓަކައި، ދައުލަތުގެ ހުރިހާ އިދާރާތަކެއްގެ އެހީތެރިކަމާއި އެއްބާރުލުން ކައުންސިލްތަކަށް ބޭނުންވާނެ ކަމަށް އަފްޝަން ވިދާޅުވި އެވެ.
"ކައުންސިލްތަކަށް ހަމައެކަނި ބާރުދީފައި ދޫކޮށްނުލެވޭނެ. ކައުންސިލްތަކަށް ބޭނުންވާ ފަންނީ އަދި އެހެނިހެން އެހީތެރިކަން ފޯރުކޮށްދެމުން ދާންޖެހޭނީ. އޭރުން މިކަން ކާމިޔާބުވާނީ. އޭރުން ރައްޔިތުން އުއްމީދުކުރާ ވަރުގެ ނަތީޖާއެއް ފެންނާނީ."
