މައްސަލާގައި ހިމެނޭ ފަރާތްތަކުގެ ޣައިރު ހާޒިރުގައި ހުކުމް ކުރި ސިވިލް ކޯޓުގެ ގާޒީއެއްގެ ސުލޫކީ މައްސަލަ ބަލަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ޖޭއެސްސީއިން ބަލަން ނިންމީ ސިވިލް ކޯޓުގެ ގާޒީ ޒުބައިރު މުހައްމަދުގެ މައްސަލައެކެވެ. އެ ކޮމިޝަނަށް އޭނާއާ ގުޅޭ ގޮތުން ހުށަހަޅާފައިވާ ޝަކުވާ ބުނެފައިވަނީ ހުކުމް ތަންފީޒު ކުރުމުގެ މައްސަލައެއް ގާޒީ ނިންމެވީ އެއްވެސް ހަސްމަކު ހާޒިރުނުކޮށް ކަމަށެވެ.
ގާޒީ ޒުބައިރުގެ ސުލޫކީ މައްސަލަ ތަހުގީގު ކުރުމަށް ޖޭއެސްސީއިން މިހާރު ވަނީ ތަހުގީގީ ކޮމިޓީއެއް ހަދާފަ އެވެ.
ސިވިލް ކޯޓުން އެއް ހަސްމެއްގެ ޣައިރު ހާޒިރުގައި ހުކުމް ކުރުމަކީ، އާންމު ކަމެއް ކަމަށްވީ ނަމަވެސް ދެ ހަސްމުންގެ ޣައިރު ހާޒިރުގައި ހުކުމް ކުރުމެއް ނޯވެ އެވެ.
މިފަހުން ސުޕްރީމް ކޯޓުން ވަނީ ސިވިލް ކޯޓުން ޣައިރު ހާޒިރުގައި ކުރާ ހުކުމްތަކާ ގުޅިގެން މުހިންމު ނިންމުމެއް ވެސް ނިންމަވާފަ އެވެ. ސުޕްރީމް ކޯޓުން ބުނެފައިވަނީ ޣައިރު ހާޒިރުގައި ހުކުމް ކުރުމަކީ އިންސާފު ގާއިމް ކުރުމަށް އެޅޭ ހުރަހެކެވެ.
