އެންމެ ގިނަ ބިލިއަނަރަން ދިރިއުޅޭ ސިޓީއަކީ ޗައިނާގެ ބެއިޖިން ކަމަށް ކޮންމެ އަހަރަކު ވެސް ފޯބްސް މަޖައްލާއިން ޝާއިއުކުރާ އެންމެ މުއްސަނދި މީހުންގެ ލިސްޓުން ދައްކައިފި އެވެ.
ނަމަވެސް ބެއިޖިންއަށް އެ ލަގަބު ލިބުނީ އެމެރިކާގެ ނިއުޔޯކްއާ ވާދަކޮށްގެން ވަރަށް ކުޑަ ތަފާތަކުންނެވެ. ބެއިޖިންގައި 100 ބިލިއަނަރުން އުޅޭއިރު ނިއުޔޯކުގައި އުޅެނީ 99 ބިލިއަނަރުންނެވެ.
ފާއިތުވި ހަތް އަހަރު ވެސް އެ ލިސްޓުގެ އެންމެ ކުރީގައި އޮތީ ނިއުޔޯކެވެ. މި އަހަރު ބެއިޖިން ލިސްޓުގެ އެއްވަނައަށް އެރީ 2020 އަށް ވުރެ 33 ބިލިއަނަރުން އިތުރުވެގެންނެވެ.
ނިއުޔޯކަށް ވުރެ ގިނަ ބިލިއަނަރުން ބެއިޖިންގައި އުޅުނު ނަމަވެސް އަދިވެސް އެންމެ މުއްސަނދި ބިލިއަނަރުން އުޅެނީ ނިއުޔޯކުގަ އެވެ.
ބެއިޖިންގައި އުޅޭ އެންމެ މުއްސަނދި ބިލިއަނަރަކީ ޓިކްޓޮކްގެ ފައުންޑަރު އަދި ބައިޓްޑާންސް ކުންްފުނީގެ ޗީފް އެގްޒެކްޓިވް ޖާންގް ޔިމިންގް އެވެ. އޭނާގެ މުއްސަނދިކަން އުޅެނީ 35.6 ބިލިއަން ޑޮލަރުގަ އެވެ.
ނިއުޔޯކުގައި އުޅޭ ބިލިއަނަރުންގެ ތެރެއިން އެންމެ މުއްސަނދި މީހާއަކީ 59 ބިލިއަން ޑޮލަރާއެކު ކުރީގެ މޭޔަރު މައިކަލް ބްލޫމްބާގް އެވެ.
ޗައިނާ، އެމެރިކާއާ އަރާ ހަމަކުރަނީ
މިދިޔަ އަހަރު އެހެން ގައުމުތަކާ އަޅާ ބަލާއިރު އެންމެ ގިނަ ބިލިއަނަރުން އުފެދިފައިވަނީ ޗައިނާގަ އެވެ. އެގޮތުން ފޯބްސްގެ ލިސްޓަށް މުޅިން އަލަށް ޗައިނާގެ 210 ބިލިއަނަރުން އަރާފައި ވެއެވެ.
ޗައިނާގެ ބިލިއަނަރުންގެ ތެރެއިން ދެބައިކުޅަ އެއްބައި މީހުންނަކީ ޓެކްނޮލޮޖީއާ ގުޅޭ ވިޔަފާރީގެ ބޮޑުންނެވެ. އޭގެ ތެރޭގައި އީ ސިނގިރޭޓް ވިއްކައިގެން ބިލިއަނަރަކަށްވި ކޭޓް ވޭންގް ފަދަ ބައެއް އަންހެން ވިޔަފާރިވެރިން ވެސް ހިމެނެ އެވެ.
ޖުމްލަ 698 ބިލިއަނަރުންނާއެކު ޗައިނާއިން ދަނީ އެމެރިކާގެ އަދަދުތަކާ އަރާ ހަމަކުރުމަށް ގާތްވަމުންނެވެ. އެމެރިކާގައި ތިބީ ޖުމްލަ 724 ބިލިއަނަރުންނެވެ.
މިދިޔަ އަހަރު މުޅިން އަލަށް 493 މީހަކު ބިލިއަނަރުންނަށް ވެފައި ވެއެވެ. އެމެރިކާ އާއި ޗައިނާއަށް ފަހު ދެން ބިލިއަނަރުން އެންމެ ގިނައީ އިންޑިއާގަ އެވެ. އެ ގައުމުގައި 140 ބިލިއަނަރުން އުޅެ އެވެ.
ފޯބްސްއިން ބުނި ގޮތުގައި ދުނިޔޭގެ އެންމެ މުއްސަނދި މީހެއްގެ ގޮތުގައި އަދިވެސް ހުރީ އެމޭޒަން ކުންފުނީގެ ފައުންޑަރު އަދި ޗީފް އެގްޒެކްޓިވް ޖެފް ބެޒޯސް އެވެ. މިދިޔަ އަހަރު އޭނާގެ މުއްސަނދިކަން ވަނީ 64 ބިލިއަން ޑޮލަރު އިތުރުވެ، ޖުމްލަ 177 ބިލިއަން ޑޮލަރަށް އަރާފަ އެވެ.
