ޖިންސީ އަނިޔާގެ މައްސަލަތައް އިތުރުވަނީ އަންހެނުން ހެދުން އަޅާ ގޮތުގެ ސަބަބުން ކަމަށް ޕާކިސްތާނުގެ ބޮޑުވަޒީރު އިމްރާން ހާން ވިދާޅުވުމާއެކު ފާޑުކިޔުން އަމާޒުވެއްޖެ އެވެ.
ޓީވީ މެދުވެރިކޮށް ވަގުތުން ދެއްކި އިންޓަވިއުއެއްގައި އިމްރާން ހާން ވަނީ ފިރިހެނުންގެ އެދުންވެރިކަން ކޮންޓްރޯލް ކުރަން އެހީވުމަށް އަންހެނުން ރަނގަޅަށް ހަށިގަނޑު ފޮރުވުމަށް ނަސޭހަތްތެރިވެ ވަޑައިގެންފަ އެވެ.
"ފާހިޝް ކަންކަން އާއްމުވެފައިވާ މުޖުތަމައެއްގައި އެކަމުގެ ނުބައި ނަތީޖާ ފެންނާނެ،" އިމްރާން ހާން ވިދާޅުވި ކަމަށް ބީބީސީގައި ވެއެވެ.
އޭގެ އިތުރުން އިމްރާން ހާން ވިދާޅުވީ ނިވާކަން ކުޑަ ހެދުން ލައި އުޅުމަކީ އިންޑިއާ އާއި ހުޅަނގުގެ ގައުމުތަކާއި ހޮލީވުޑުގެ ސަބަބުން އައިސްފައިވާ ކަމެއް ކަމަށާއި ޖިންސީ އަނިޔާ އުފެދެނީ ނިވާކަން ކުޑަ ހެދުން ލާތީ ކަމަށެވެ.
އެ އިންޓަވިއުއާ ގުޅިގެން އިންސާނީ ހައްގުތަކަށް މަސައްކަތް ކުރާ ފަރާތްތަކުގެ ފާޑުކިޔުން އިމްރާން ހާނަށް އަމާޒުވެފައި ވާއިރު، މައާފަށް އެދިވަޑައިގެންނެވުމަށް ގޮވާލާ އެތައް ސަތޭކަ ބަޔަކު ވަނީ ޕެޓިޝަނެއްގައި ސޮއިކޮށްފަ އެވެ.
ހަމަހަމަކަމާއި ރައްކާތެރިކަމުގެ މިންގަނޑުތަކަށް ބަލާއިރު ޕާކިސްތާނަކީ ދުނިޔޭގެ ގައުމުތަކުގެ ތެރެއިން އަންހެނުންނަށް އެންމެ ނުރައްކާތެރި އެއް ގައުމެވެ.
