މާފުށީ ޖަލު ހުކުމް ތަންފީޒުކުރައްވަމުން ގެންދަވާ ކުރީގެ ރައީސް އަބްދުالله ޔާމީން ގޭބަންދަށް ބަދަލުކޮށްދޭން އެދި އިދިކޮޅު ޕީޕީއެމާއި ޕީއެންސީން މިއަދު ރައީސް އިބްރާހިމް މުހައްމަދު ސޯލިހްއާ ބައްދަލުކޮށްފި އެވެ.
ރައީސް އޮފީހުގައި އޮތް ބައްދަލުވުމުގައި އިދިކޮޅު ކޯލިޝަންގެ ވަގުތީ ލީޑަރު އަބްދުއްރަހީމް އަބްދުالله (އަދުރޭ) އާއި ޕީއެންސީގެ ނައިބު ރައީސް, މާވަށު ދާއިރާގެ މެމްބަރު މުހައްމަދު ސައީދު ބައިވެރިވެވަޑައިގަތެވެ.
އެ ބައްދަލުވުމަށް ފަހު އަބްދުއްރަހީމް ނޫސްވެރިންނަށް ވިދާޅުވީ އިދިކޮޅު ލީޑަރު ޖަލުގައި ބޭއްވުމަކީ ވަރަށް ބޮޑު ކަންބޮޑުވުމެއް ކަމަށް ރައީސް ސޯލިހަށް ދެންނެވި ކަމަށެވެ.
"އަޅުގަނޑުމެންގެ މުޅި ދެ ޕާޓީގެ އެދުމަކީ ރައީސް ޔާމީން ވީހާވެސް އަވަހަށް ގެއަށް ބަދަލުކުރެވޭނެ ގޮތެއް ހައްދަވައި ދެއްވުމޭ," އަދުރޭ ވިދާޅުވި އެވެ.
ރައީސް ދެއްވި ޖަވާބަކީ, އަދުރޭ ވިދާޅުވި ގޮތުގައި, ގާނޫނީ އިމުގެ ތެރެއިން އެމަނިކުފާނަށް ކުރެއްވެން އޮތް ކަމެއް ކޮށްދެއްވާނެ ކަމެވެ. މި ބައްދަލުވުމުގެ ނަތީޖާ ފެންނާނެ ކަމަށް އުއްމީދު ކުރައްވާ ކަމަށް އަދުރޭ ވިދާޅުވި އެވެ.
ޔާމީން ގެއަށް ބަދަލުކޮށް ދިނުމަށް އާއިލާ އިން ވަނީ ހޯމް މިނިސްޓްރީގައި އެދިފަ އެވެ. އެމަނިކުފާނު ގެއަށް ބަދަލު ކުރަން ޖެހެނީ ސިއްހީ ހާލުކޮޅު ހުރި ގޮތުން ކަމަށް އާއިލާ އިން ވަނީ ބުނެފަ އެވެ.
ޔާމީނަށް ޖަލު ހުކުމެއް އައީ ދައުލަތަށް ލިބެން ޖެހޭ އެއް މިލިއަން ޑޮލަރު އަމިއްލަ އެކައުންޓަށް ޖަމާކޮށް އަސްލު އޮޅުވާލައި މަންފާ ހޯދިކަން ސާބިތުވެގެންނެވެ. ފަސް އަހަރަށް އިއްވި މި ހުކުމް އިންސާފުވެރި ނޫން ކަމަށް އިދިކޮޅުން ދަނީ ބުނަމުންނެވެ.
އެމަނިކުފާނުގެ މައްޗަށް މަނީ ލޯންޑްރިންގެ އިތުރު ދައުވާއަކާއި ރިޝްވަތު ހިފުމުގެ ދައުވާއެއް ވެސް ވަނީ އުފުލައިފަ އެވެ.
