ކުރީގެ ޓޫރިޒަމް މިނިސްޓަރު އަލީ ވަހީދު މިހާރު ދިރިއުޅުއްވަމުން ގެންދަވާ އެޑްރެސް ހޯދުމަށް ޕްރޮސިކިއުޓާ ޖެނަރަލް އޮފީހަށް ހައިކޯޓުން ދިން މުއްދަތުގައި އެ އެޑްރެސް ނުހޯދުމުން މައްސަލަ މިއަދު ބޭރުކޮށްލައިފި އެވެ.
ހައި ކޯޓުގައި އޮތް މައްސަލަ ކުރިއަށް ގެންދަން, އަލީ ވަހީދު ދިރިއުޅުއްވާ ތަނެއް ހޯދަން ޕްރޮސިކިއުޓަ ޖެނެރަލް އޮފީހަށް ދިން މުއްދަތު އިއްޔެގެ ނިޔަލަށް ވަނީ ހަމަވެފަ އެވެ. އޭނާ އުޅުއްވާ ތަނެއް ފުލުހުންނަކަށް ވެސް ނޭނގުނު ކަަމަށް ޕްރޮސިކިއުޓާ ޖެނަރަލްގެ އޮފީހުން ވަނީ ބުނެފަ އެވެ.
ޕްރޮސިކިއުޓާ ޖެނަރަލްގެ އޮފީހުން ހައިކޯޓުގައި އެދިފައިވަނީ އަލީ ވަހީދުގެ ޣައިރު ހާޒިރުގައި ނަމަވެސް މައްސަލަ ކުރިއަށް ގެންގޮސްދިނުމަށެވެ. އެއީ، އަދުލު އިންސާފު ގާއިމް ކުރުމަށްޓަކައި މުހިންމު ކަމެއް ކަމަށް ވަނީ ފާހަގަ ކުރައްވާފަ އެވެ.
ހައިކޯޓުން މިއަދު ޕްރޮސިކިއުޓާ ޖެނަރަލްގެ އޮފީހަށް ފޮނުވާފައިވާ އެ ކޯޓުގެ ނިންމުމުގައިވާ ބުނެފައިވާ ގޮތުގައި، ޖިނާއީ މައްސަލައެއްގައި ދައުވާ ލިބޭ މީހާގެ ޣައިރު ހާޒިރުގައި ކުރިއަށް ގެންގޮސް މައްސަލަ ނިންމޭނެ އުސޫލެއް ޖިނާއީ އިޖުރާއަތުގެ ގާނޫނުގައި ނެތްކަން ސުޕްރީމް ކޯޓުން ފާހަގަކޮށްފައިވާ ކަމަށެވެ.
"ދައުވާ ލިބޭ މީހާގެ ޣައިރު ހާޒިރުގައި މި މައްސަލަ ކުރިއަށް ގެންގޮސްދިނުމަށް އެދި ޕްރޮސިކިއުޓާ ޖެނަރަލްގެ ފަރާތުން ހައިކޯޓުގައި އެދުނު ނަމަވެސް ދައުވާ ރައްދުވާ ފަރާތުގެ ޣައިރު ހާޒިރުގައި މި މައްސަލަ ކުރިއަށް ގެންދިޔުމަކީ ގާނޫނީ ގޮތުން ކުރެވޭނެ ކަމެއް ނޫން،" ހައިކޯޓު ނިންމުމުގައިވެ އެވެ.
އެހެންނަމަވެސް، ދައުވާ ލިބޭ މީހާގެ އެޑްރެސް އަލުން ސާފުކުރުމަށްފަހު މައްސަލަ އަނބުރާ ހުށަހެޅުމުގެ ފުރުސަތު ޖިނާއީ އިޖުރާއަތުގެ ގަވައިދުން ލިބިދޭތީ އެ ފުރުސަތު މި މައްސަލާގައި ވެސް ދޭން ހައިކޯޓުން ވަނީ ނިންމަވާފަ އެވެ.
ޓޫރިޒަމް މިނިސްޓްރީގެ މުވައްޒަފުންތަކަކަށް ފުރައްސާރަ ކުރި މައްސަލާގައި އަލީ ވަހީދުގެ މައްޗަށް ބޮޑެތި ދައުވާތަކެއް ވަނީ އުފުލާފަ އެވެ. އެ ދައުވާތައް އެހެން އޮތްވައި އޭނާގެ ފުރައިގެން ދިޔުމަކީ ގިނަ ބަޔަކު ކަންބޮޑުވުން ފާޅުކުރި ކަމެކެވެ.
އޭނާއަށް ފުރުމުގެ ހުއްދަ ދެއްވި ގާޒީ ހަސަން ސައީދުގެ ސުލޫކީ މައްސަލަ ވެސް ޖުޑީޝަލް ސާވިސް ކޮމިޝަން (ޖޭއެސްސީ)އިން ދަނީ ބަލަމުންނެވެ. ރައްޔިތުންގެ މަޖިލީހުން ވެސް އަލީ ވަހީދުގެ މައްސަލައަށް ފާރަވެރިވުމަށް ވަނީ ފާސްކޮށްފަ އެވެ.
މައުލޫމާތު ލިބިފައިވާ ގޮތުގައި، މައިބަދައިގެ އާލާސްކަންފުޅެއްގައި ކަމަށް ވިދާޅުވެ، އަލީ ވަހީދު ފުރަތަމަ ވަޑައިގެންފައިވަނީ ތުރުކީއަށެވެ. އޭނާ މަސައްކަތް ކުރެއްވީ ތުރުކީ މަގުން އިނގިރޭސިވިލާތަށް ވަޑައިގެންނެވުމަށް ކަމަށް ވެސް އެނގިފައިވެ އެވެ.
އަލީ ވަހީދުގެ އޭނާއަށް ކުރާ ތުހުމަތުތައް ދޮގުކުރައްވާފައިވީ ނަމަވެސް، ފުރައިގެން ވަޑައިގެންނެވި ފަހުން އެއްވެސް އެއްޗެއް ވިދާޅުވެފައެއް ނުވެ އެވެ.
މި މައްސަލައަކީ، އަލީ ވަހީދު ފްރޭމް ކުރުމުގެ ގޮތުން ފެންމަތިކޮށްގެން އުޅޭ މައްސަލައެއް ކަމަށް އަޑު ފަތުރާފައިވާއިރު އެފަދަ ކަމެއް ތަހުގީގަށް ފާހަގަވެފައި ނެތްކަން ރައީސް އިބްރާހިމް މުހައްމަދު ސޯލިހު ވެސް ވަނީ ވިދާޅުވެފަ އެވެ.
