ބަންގްލަދޭޝްގެ ރަށްފުށު ހިސާބުގަނޑުގައި ކޮވިޑް ކޮންޓްރޯލް ކުރުމުގެ ފިޔަވަޅުތައް ތަންފީޒު ކުރަމުންދާ ގޮތާ މެދު ހިތްހަމަނުޖެހި ކުރި މުޒާހަރާއެއް ހޫނުވެއްޖެ އެވެ.
އެ ހާދިސާ ހިނގީ ބަންގްލަދޭޝްގެ މެދުތެރޭގައި އޮންނަ ފަރީދްޕޫރު ޑިސްޓްރިކްޓުގެ ސަލްތާ އަވަށުގަ އެވެ. އެ ތަނުގައި މުޒާހަރާ ކުރަން ފެށީ ފުލުހުންގެ ސަބަބުން މީހަކަށް އަނިޔާވި ކަމުގެ އަޑުތައް ފެތުރުމުންނެވެ.
ފުލުހުންނާ ހަވާލަދީ އަލްޖަޒީރާގައިވާ ގޮތުން އެތައް ހާސް މީހުން ވަނީ މަގުތަކަށް ނިކުމެ، ފުލުސް ސްޓޭޝަނަށް ހަމަލާދީ، ސަރުކާރުގެ ބައެއް އޮފީސްތަކަށް ވެސް ގެއްލުން ދީފަ އެވެ.
ރައްދުގައި ފުލުހުން ބަޑި ޖެހުމުގެ ސަބަބުން ތިން މީހެއްގެ ހާލު ސީރިއަސްވެ ފަރުވާދެމުންދާ ކަމަށް ފަރީދްޕޫރް މެޑިކަލް ކޮލެޖް ހޮސްޕިޓަލުގެ ޑޮކްޓަރަކު ބުނެފައި ވެއެވެ.
މިދިޔަ ހޯމަ ދުވަހު ބަންގްލަދޭޝުން ވަނީ އަނެއްކާވެސް ލޮކްޑައުންގެ ފިޔަވަޅުތައް ތަންފީޒު ކުރަން ފަށާފަ އެވެ. މި ވަގުތު ދެކުނު އިރުމަތީ އޭޝިއާގައި ކޮވިޑުގެ ސަބަބުން ލޮކްޑައުންކޮށްފައި އޮތް ހަމައެކަނި ގައުމަކީ ބަންގްލަދޭޝް އެވެ.
މިދިޔަ އާދީއްތަ ދުވަހު ވެސް 7،087 މީހަކު ޕޮޒިޓިވްވެފައި ވާއިރު، މިއީ މާޗް 2020 ގައި ފުރަތަމަ ފަހަރަށް ބަންގްލަދޭޝުން ކޮވިޑް ފެނުނު ފަހުން އަދަދުތައް މިހާ މައްޗަށް ދިޔަ ފުރަތަމަ ފަހަރެވެ.
