އިންޑިއާގެ ޖަންގަލިތަކުގެ ތެރޭގައި އުޅޭ ވައަތު ފިޔައިގެ ހަނގުރާމަވެރި "މާއޯއިސްޓުންނާ" ދެކޮޅަށް ހިންގާ އޮޕަރޭޝަންތައް ވަރުގަދަކޮށްފި އެވެ.
އޮޕަރޭޝަންތައް ވަރުގަދަކޮށްފައި ވަނީ ނިމިދިޔަ ހަފްތާ ބަންދުގައި މާއޯއިސްޓުން ދިން ހަމަލާތަކުގެ ސަބަބުން ފުލުހުންގެ 22 މީހަކު މަރުވެފައި ވާތީ އެވެ.
ފުލުހުންގެ އިސް އޮފިޝަލަކާ ހަވާލަދީ އަލްޖަޒީރާ ނޫހުން ރިޕޯޓުކޮށްފައިވާ ގޮތުގައި 22 ފުލުހުން މަރުވެފައި ވާއިރު، އިތުރު 30 ފުލުހުން ޒަހަމްވެފައި ވެއެވެ.
ވަކިވެގަނެގެން އުޅޭ ހަނގުރާމަވެރި މާއޯއިސްޓުން ފިލައިގެން އުޅެނީ އިންޑިއާގެ މެދުގައި އޮންނަ ޗައްޓިސްގަރް ސްޓޭޓުގެ ޖަންގަލި ތެރޭގަ އެވެ.
މިދިޔަ ހޮނިހިރު ދުވަހު އެ މީހުންނާއި ސަލާމަތީ ބާރުތަކާ ދެމެދު ހަތަރު ގަޑިއިރު ވަންދެން ހަމަލާ ބަދަލުކޮށްފައި ވެއެވެ. އެއީ މިދިޔަ ހަތަރު އަހަރުގެ ތެރޭގައި އެ މީހުންނާއެކު ހިނގި އެންމެ ބޮޑު ކުރިމަތިލުމެވެ.
ސަރުކާރާގެ ފައުޖުތަކާ ދެކޮޅަށް މާއޯއިސްޓުން ހަނގުރާމަ ކުރާތާ އެތައް އަހަރެއް ވެއްޖެ އެވެ. އެ މީހުން ބުނާ ގޮތުގައި އެ މީހުން މަސައްކަތް ކުރަނީ ފަގީރުންގެ ހައްގުގަ އެވެ.
އިންޑިއާ ސަރުކާރުން ދެކޭ ގޮތުގައި މާއޯއިސްޓުންނަކީ އެ ގައުމުގެ ދާހިލީ ސަލާމަތަށް އޮތް އެންމެ ބޮޑު ނުރައްކަލެވެ.
