ގެވެށި އަނިޔާ ހުއްޓުވުމުގެ ގާނޫނާއި ޖިންސީ ކުށުގެ ގާނޫނަށް ޝަރުއީ ދާއިރާގެ މުވައްޒަފުން އަހުލުވެރިކުރުވުމުގެ ބައެއްގެ ގޮތުން މި މައުލޫއާ ގުޅޭ ސެންސިޓައިޒޭޝަން ސެޝަންތަކެއް ކުރިއަށް ދާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ބުނެފި އެވެ.
މި ސެޝަންތައް ކުރިއަށް ދާނީ މި މަހުގެ ތިންވަނަ ދުވަހުން ފެށިގެން ހައެއް އޭޕްރިލްގެ ނިޔަލަށެވެ.
ޕްރޮގްރާމްގައި، ގެވެށި އަނިޔާ ހުއްޓުވުމަށްޓަކައި، އަދި ޖިންސީ ކުށްތައް ހުއްޓުވުމަށްޓަކައި މުޖުތަމައުގައި އުޅޭއިރު ވިސްނަންޖެހޭ ކަންކަމާއި، އަދި ޝަރުއީ ދާއިރާގެ ހިދުމަތްތައް ފޯރުކޮށްދިނުމުގައި، މިދާއިރާގެ މުވައްޒަފުން ވިސްނުން މުހިންމު ކަންތައްތަކަށް އަލިއަޅުވާލާނެކަމަށް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެ އެވެ.
ގެވެށި އަނިޔާ ހުއްޓުވުމުގެ ގާނޫނާއި ޖިންސީ ކުށުގެ ގާނޫނަށް ޝަރުއީ ދާއިރާގެ މުވައްޒަފުން އަހުލުވެރި ކުރުވުމަށް ހިންގޭ މި ޕްރޮގްރާމަކީ، ބްރިޓިޝް ހައިކޮމިޝަންގެ ސަޕޯޓާއެކު ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ)އިން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއަށް ފޯރުކޮށްދެމުންދާ އެހީގެ ދަށުން ކުރިއަށް ގެންދާ ޕްރޮގްރާމެކެވެ.
މި ޕްރޮގްރާމްގައި ސެޝަންތައް ނަންގަވައިދެއްވަނީ ޔޫއެންޑީޕީއިން ހަމަޖައްސަވާދެއްވާފައިވާ ކޮންސަލްޓަންޓް އަލްއުސްތާޒާ އާމިނަތު އަރީޖް ހުސައިނެވެ. މި ޕްރޮގްރާމްގައި ޖުޑީޝަރީގެ 80 މުވައްޒަފުން ބައިވެރިވާކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ވިދާޅުވެއެވެ.
ޝަރުއީ ދާއިރާގައި ޖިންސީ ފުރައްސާރަކުރާ މިންވަރު ބަލަން ދިރާސާއެއް ކުރަން ޖުޑީޝަލް ސާވިސް ކޮމިޝަނުން ނިންމީ ޖުލައި 2019 ގައެވެ. އޭރު އެ ކޮމިޝަނުން ބުނެފައިވަނީ، ފަނޑިޔާރުންގެ ސުލޫކީ މައްސަލަތަކާއި ގުޅިގެން ކޯޓުތަކުގައި އުފެދިފައިވާ ޖިންސީ ފުރައްސާރައާ ގުޅޭ ޝަކުވާތައް އިތުރުވާ ކަން ފާހަގަ ކުރެވޭތީ، ކޯޓުތަކުގެ ތެރޭގައި ހުރި މިންވަރު ދެނެގަތުމަށް ދިރާސާ ކުރަން ފެށީ ކަމަށެވެ.
ޝަރުއީ ދާއިރާގެ މުވައްޒަފުންނަށް ޖިންސީ ފުރައްސާރަ ކުރި ކަމަށް ތުހުމަތު ކުރެވި ބައެއް މެޖިސްޓްރޭޓުންގެ މައްސަލަތައް މީގެ ކުރިން ޖުޑީޝަލް ސާވިސް ކޮމިޝަނުން ބަލާފައިވެ އެވެ. އަދި އެފަދަ ބައެއް މައްސަލަތައް ސާބިތުވެ ފިޔަވަޅު އަޅާފައިވެ އެވެ.
ޖުޑީޝަލް އެޑްމިނިސްޓްރޭޝަންއިން މިހާރު ކުރިއަށް ގެންދާ ޕްރޮގްރާމްގައި، ޖެންޑާ މިނިސްޓްރީ އަދި ފެމިލީ ޕްރޮޓެކްޝަން އޮތޯރިޓީގެ ޓެކްނިކަލް ބޭފުޅުންގެ އެހީވެސް ހޯއްދަވާފައިވާ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ބުނެ އެވެ.
