ފަސިންޖަރުންގެ ހުއްދަ ނުލިބި ޓެކްސީގައި އަޑު ނުކުންނަ އެއްވެސް ބާވަތެއްގެ އާލާތެއް ބޭނުން ކުރުމަކީ މަނާ ކަމެއް ކަމަށް ޓެކްސީގެ ގަވާއިދުގައި ހިމަނައިފި އެވެ.
މޯލްޑިވްސް ޓްރާންސްޕޯޓް އޮތޯރިޓީ އިން ޓެކްސީ ގަވާއިދަށް ގެނައި ހަތް ވަނަ އިސްލާހު ގައި ވަނީ ޓެކްސީގެ ހިދުމަތް ދޭ ފަރާތުން ބޭނުން ކުރާ މުއާސަލާތީ ނިޒާމު ނޫން އެހެން އެއްވެސް އަޑު ނުކުންނަ އާލާތެއް ޓެކްސީގައި ބޭނުން ކުރުމަކީ މަނާ ކަމެއް ކަމަށެވެ. ނަމަވެސް ފަސިންޖަރުންގެ ހުއްދަ ލިބިގެން ޓެކްސީ ގައި ރޭޑިއޯ، ޓީވީ، ލަވަ ޖަހާ ސެޓު އަދި މި ނޫން ބާވަތްތަކުގެ އާލާތްތައް ބޭނުން ކުރެވޭނެ އެވެ.
މީގެ އިތުރުން ވެސް ޓެކްސީ ސެންޓަރާއި ހިދުމަތްދޭ އުޅަނދާ ދެމެދު މޯލްޑިވްސް ޓްރާންސްޕޯޓް އޮތޯރިޓީ ހުއްދަ ކުރާ މުއާސަލާތީ ނިޒާމެއް ހުންނަން ވާނެ ކަމަށާއި އަދި މި ކަމަށް ހުއްދަ ނަގަން ޖެހޭ ނަމަ، ހުއްދަ ނެގުމަށް ފަހު މޯލްޑިވްސް ޓްރާންސްޕޯޓް އޮތޯރިޓީ އަށް ހުށަހަޅަން ވާނެ ކަމަށް ގެނެވުނު އިސްލާހުގައިވެ އެވެ.
މިފަދަ މުއާސަލާތީ ނިޒާމެއްގެ ބޭނުން ހިފަންޖެހޭނީ ރިވެތި އަދަބުތަކާއި އިހްތިރާމާއި އެކު ރިވެތި ބަހުން ކަމަށް ޓްރާންސްޕޯޓް އޮތޯރިޓީ އިން ވަނީ ބުނެފަ އެވެ.
