އިންޑިއާގައި ރިކޯޑު އަދަދަކަށް ކޮވިޑު ކޭސްތައް އިތުރުވެ، އެއް ދުވަހުގެ ތެރޭގައި 100،000 އަށް ވުރެ ގިނަ މީހުން ޕޮޒިޓިވްވެއްޖެ އެވެ.
މިއީ އެމެރިކާއަށް ފަހު އެއް ދުވަހެއްގެ ތެރޭގައި 100،000 އަށް ވުރެ ގިނަ މީހުން ގައުމެއްގައި ޕޮޒިޓިވްވި ފުރަތަމަ ފަހަރެވެ.
މިއަދުގެ ތަފާސްހިސާބުން ދައްކާ ގޮތުގައި 103،558 ޕޮޒިޓިވް ކޭސް ވަނީ ފާހަގަވެފަ އެވެ. އެއާއެކު ބަލިމަޑުކަން ފެށުނު ފަހުން ޖުމްލަ ޕޮޒިޓިވް އަދަދު ވަނީ 12.6 މިލިއަނަށް އަރާފަ އެވެ.
މިއަދު 478 މީހަކު މަރުވެފައި ވާއިރު، މަރުވި މީހުން ޖުމްލަ އަދަދު ވަނީ 165،101 އަށް އަރާފަ އެވެ. ނަމަވެސް މިއީ އާބާދީގެ ނިސްބަތުން ބަލާއިރު ކުޑަ މިންވަރެކެވެ.
މިދިޔަ ހަފްތާގައި އެންމެ ގިނަ ޕޮޒިޓިވް ކޭސް ފެނުނު ގައުމަކީ ވެސް އިންޑިއާ އެވެ. އެހެންކަމުން އެންމެ ހާލަތު ގޯސް އެމެރިކާ އާއި ބްރެޒިލްއަށް ވުރެ އިންޑިއާގެ އަދަދުތައް މަތިވެދާނެ ކަމުގެ ބިރު އެބަ އޮތެވެ.
ފެބްރުއަރީ މަހު ކޭސްތައް ވަރަށް ބޮޑަށް މަދުވުމަށް ފަހު މިހާރު ވަނީ ކުއްލި އިތުރުވުމެއް އައިސްފަ އެވެ. އެއާއެކު ކަމާ ބެހޭ ފަރާތްތަކުން އަންނަނީ ހަރުކަށި ފިޔަވަޅުތައް އަޅަމުންނެވެ.
އިންޑިއާގެ ސްޓޭޓުތަކުގެ ތެރެއިން އެންމެ ހާލަތު ގޯސްވެފައި ވަނީ ހުޅަނގުގައި އޮންނަ މަހަރާޝްތްރަ ގައެވެ. މިދިޔަ ދެ ހަފްތާގައި މުޅި އިންޑިއާއިން ރިކޯޑު ކުރި ކޭސްތަކުގެ 55 ޕަސަންޓު ނިސްބަތް ވަނީ އެ ސްޓޭޓަށެވެ.
އެހެންކަމުން އެ ސްޓޭޓުގެ ސަރުކާރުން ވަނީ ކާފިއު އިއުލާނުކޮށް، ލޮކްޑައުނަށް ދާން ވެސް ނިންމާފަ އެވެ. މިއަދު ހަވީރުން ފެށިގެން އެ ސްޓޭޓުގެ ހިދުމަތްތައް ބަންދުވާނެ އެވެ.
ބައެއް ތަޖުރިބާކާރުން ބުނާ ގޮތުގައި ކުއްލިއަކަށް ކޭސް އިތުރުވެފައި ވަނީ ހަލުވިކަމާއެކު ފެތުރޭ ކޮވިޑު ވައިރަހުގެ ވޭރިއެންޓުތަކުގެ ސަބަބުންނެވެ. އޭގެ އިތުރުން ވެކްސިނުގެ ފުރަތަމަ ޑޯޒަށް ފަހު ބައެއް މީހުން މާސްކު އެޅުން ހުއްޓާލާފައި ވުމަކީ ވެސް ސަބަބެއް ކަމަށް އެ މީހުން ބުނެ އެވެ.
އިންޑިއާއިން ވަނީ ވެކްސިން ޕްރޮގްރާމުގެ ދުވެލި އަވަސްކޮށް، ދުވާލެއްގެ މައްޗަށް ތިން މިލިއަން މީހުންނަށް ވެކްސިން ދޭން ފަށާފަ އެވެ.
