މެންޗެސްޓާ (އޭޕްރީލް 5) - އިނގިރޭސި ޕްރިމިއާ ލީގުގައި ރޭ ބްރައިޓަން އަތުން ފަހަތުން އަރައި 2-1 އިން މޮޅުވެ މެންޗެސްޓާ ޔުުނައިޓެޑުން ލީގުގެ ދެ ވަނައިގައި ލީޑެއް ނަގައިފި އެވެ.
ލީގުގެ ތިން ވަނައިގައި އޮތް ލެސްޓާ ސިޓީ ހޮނިހިރު ދުވަހުގެރޭ ވަނީ އަމިއްލަ ދަނޑުގައި އެއް ވަނައިގައި އޮތް މެންޗެސްޓާ ސިޓީ އަތުން ބަލިވެފަ އެވެ. ޔުނައިޓެޑުން ރޭގެ މެޗުން މޮޅުވެ ފުރުސަތުގެ ފައިދާނެގީ އެވެ. ޔުނައިޓެޑް ދެ ވަނައިގައި އޮތީ 30 މެޗުން 60 ޕޮއިންޓާ އެކު އެވެ. ދެ ވަނައިގައި އޮތް ލެސްޓާ ސިޓީ އަށް ވަނީ 30 މެޗުން 56 ޕޮއިންޓް ލިބިފަ އެވެ. ސިޓީ އެއް ވަނައިގައި އޮތް 31 މެޗުން 74 ޕޮއިންޓް ހޯދައިގެންނެވެ.
ޔުނައިޓެޑް ދަނޑުގައި ރޭ ކުޅުނު މެޗުގައި ބްރައިޓަން އިން ލީޑުނެގީ މެޗުގެ 13 ވަަނަ މިނިޓްގައި ޑެނީ ވެލްބެކް ޖެހި ގޯލުންނެވެ. ކުރިން ޔުނައިޓެޑާއި އާސެނަލަށް ކުޅުނު ވެލްބެކް ބޮލުން ޖެހި ބޯޅަ ޔުނައިޓެޑްގެ ގޯލުގައި ހުރި ޑީން ހެންޑަސަން ވަނީ މަތަކޮށްފަ އެވެ. އެކަމަކު އެ ބޯޅަ ރީބައުންސް ވެގެން އައުމުން ވެލްބެކް ވަނީ ދެ ވަނަ ފަހަރު އެ ބޯޅަ ގޯލުގެ ތެރެއަށް ފޮނުވާލައިފަ އެވެ.
ފުރަތަމަ ހާފުގައި ނަތީޖާ ހަމަހަމަކުރަން ޔުނައިޓެޑުން މަަސައްކަތްކުރި ނަމަވެސް އެކަން ކާމިޔާބެއްނުވި އެވެ. ޔުނައިޓެޑުން އެއްވަރުކުރީ މެޗުގެ 62 ވަނަ މިނިޓްގައި މާކަސް ރަޝްފޯޑް ޖެހި ގޯލުންނެވެ. ރަޝްފޯޑް މި ގޯލު ޖެހީ ބްރޫނޯ ފެނާންޑޭސް ދިން ބޯޅައަކުންނެވެ. ޔުނައިޓެޑް މޮޅުވި ގޯލު ޖެހީ މެޗު ނިމެން ހަތް މިނިޓަށް ވެފައި ހުއްޓައި މޭސަން ގްރީންވުޑް އެވެ. އޭރިއާތެރެއިން ލިބުނު ބޯޅައެއް ގްރީންވުޑް ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ. ގޯލު ރޮނގުމަތިން އެ ބޯޅަ ސަލާމަތްކުރަން ބްރައިޓަންގެ ބެން ވައިޓް ކުރި މަސައްކަތް ކާމިޔާބެއްނުވި އެވެ.
ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނީ ބްރައިޓަންއާ ދެކޮޅަށް ކުޅުމަކީ އަބަދުވެސް އުނދަގޫ ކަމެއް ކަމަށާއި މި މެޗުގައި އެ ޓީމުން ކުރިން ގޯލު ޖެހުމުން އަދި އިތުރަށް އުނދަގޫވި ކަމަށެވެ. ގައުމީ ޓީމުގެ މެޗުތަކަށް ފަހު އައިސް ފުރަތަމަ ކުޅޭ މެޗު ފަސޭހަނުވާނެކަން ކުރިން ވެސް އެނގޭ ކަމަށް ސޯލްޝެއާ ބުންޏެވެ.
ލީގުގައި ރޭ ހޯސޭ މޮރީނިއޯގެ ޓޮޓެންހަމް ހޮޓްސްޕާސް ކުޅުނު މެޗުން ވަނީ ނިއުކާސަލް ޔުނައިޓެޑް ދަނޑުގައި 2-2 އިން އެއްވަރުވެފަ އެވެ. ބްރެޒިލްގެ ފޯވާޑް ޖޮއެލިންޓަންގެ ގޯލުން ނިއުކާސަލް ލީޑުނަގާފައިވަނިކޮށް ހަތަރު މިނިޓް ތެރޭ ދެ ގޯލު ޖަހައި ހެރީ ކޭން ވަނީ ޓޮޓެންހަމް ކޮޅަށް ނަތީޖާ އަނބުރާލައިފަ އެވެ. އެކަމަކު މެޗު ނިމެން ފަސް މިނިޓަށް ވެފައި ހުއްޓައި ޖޯ ވިލޮކް ވަނީ ގޯލެއް ޖަހައި ނިއުކާސަލަށް އެއްވަރުކޮށްދީފަ އެވެ.
ރެލިގޭޝަންގައި އޮތް ފުލަމް އިން އަލެކްސަންޑަ މިޓްރޮވިޗްގެ ގޯލުން ލީޑުނަގާފައިވަނިކޮށް އެސްޓަން ވިލާ ވަނީ ފަހަތުން އަރައި 3-1 އިން މޮޅުވެފަ އެވެ. މެޗުގެ ފަހު 15 މިނިޓް ތެރޭގައި އެސްޓަން ވިލާ އިން ޖެހި ތިން ގޯލުގެ ތެރެއިން ދެ ގޯލު ކާމިޔާބުކުރީ މިސްރުގެ ވިންގް މަހުމޫދު ޓްރެޒެގޭ އެވެ. އަނެއް ގޯލު ޖެހީ އޮލީ ވަޓްކިންސް އެވެ.
