މޫސުމަށް އަންނަ ބަދަލުތަކާ ގުޅޭ ގޮތުން އެމެރިކާއިން އިސްނަގައިގެން ބާއްވާ ބައްދަލުވުމަކަށް ދައުވަތު ނުދިނުމުން ޕާކިސްތާނުން ހިތްހަމަނުޖެހުން ފާޅުކޮށްފި އެވެ.
އެމެރިކާގެ ވައިޓް ހައުސްއިން ވަނީ މި މަހު 22 ގައި އޮންނަ ވާޗުއަލް ބައްދަލުވުމަށް ރައީސް ޖޯ ބައިޑެންގެ ދައުވަތު ލިބިވަޑައިގަންނަވާނެ 40 ލީޑަރުންގެ ނަން ހާމަކޮށްފަ އެވެ. ނަމަވެސް އެ ލިސްޓުގައި ޕާކިސްތާނުގެ ބޮޑުވަޒީރު އިމްރާން ހާން ހިމެނިވަޑައި ނުގަންނަވަ އެވެ.
ވައިޓް ހައުސްއިން ނެރުނު ބަޔާނެއްގައި ބުނީ ދައުވަތު ލިބޭ ވެރިންގެ ތެރޭގައި ހިމެނެނީ ތިމާވެއްޓާއި ދުނިޔޭގެ އޯޒޯން ފަށަލައަށް އެންމެ ބޮޑަށް ގެއްލުން ލިބޭ ގޮތަށް އަމަލު ކުރާ ގައުމުތަކާއި، މޫސުމަށް އަންނަ ބަދަލުގެ މައްސަލާގައި ލީޑަރުންގެ ގޮތުގައި މަސައްކަތް ކުރާ ގައުމުތައް ކަމަށެވެ.
އެ ލިސްޓުގައި އިމްރާން ހާން ހިމެނިވަޑައި ނުގަންނަވާތީ އެމަނިކުފާނު އެކަމާ ހިތްހަމަނުޖެހި އިއްޔެ ވަނީ ޓްވީޓު ކުރައްވާފަ އެވެ.
"މޫސުމަށް އަންނަ ބަދަލާ ބެހޭ ކޮންފަރެންސްގައި ބައިވެރިވާން ޕާކިސްތާނަށް ދައުވަތު ނުލިބުމުން އަޅުގަނޑު ހައިރާންވޭ! އަޅުގަނޑުގެ ސަރުކާރުގެ ތިމާވެއްޓާ ބެހޭ ސިޔާސަތު ބިނާވަނީ އަންނަން އޮތް ޖީލުތަކަށް ސާފު އަދި ފެހި ޕާކިސްތާނެއް ޔަގީންކޮށްދިނުމަށް،" އިމްރާން ހާން ވިދާޅުވި އެވެ.
އިމްރާން ހާން އެހެން ވިދާޅުވެފައި ވާއިރު، އެމެރިކާގެ ސްޓޭޓް ޑިޕާޓްމަންޓުން މިދިޔަ ހަފްތާގައި ބުނީ މޫސުމަށް އަންނަ ބަދަލުތަކުގެ މައްސަލާގައި ތަފާތު ލެވެލްތަކުގައި ޕާކިސްތާނާއެކު މަސައްކަތް ކުރަން އެމެރިކާއިން ތައްޔާރަށް އޮތް ކަމަށެވެ.
އެމެރިކާއިން ދައުވަތު ދިން ގައުމުތަކުގެ ލިސްޓުގައި ޕާކިސްތާނު ހިމެނިފައި ނުވާއިރު، ރަޝިއާ އަދި ޗައިނާއަށް ދައުވަތު ދީފައި ވެއެވެ.
ދުނިޔެ ވަށައިގެންވާ އޯޒޯން ފަށަލައަށް ގެއްލުންދޭ ނުރައްކާތެރި ވިހަ ގޭހުގެ 80 ޕަސަންޓު ބޭރު ކުރާ 17 ގައުމެއް އެ ބައްދަލުވުމުގައި ބައިވެރިވާނެ އެވެ.
