ބާމިންހަމް (އޭޕްރީލް 1) - އެސްޓަން ވިލާގެ ކެޕްޓަން ޖެކް ގްރީލިޝް އަށް ބޮޑެތި ކްލަބްތަކުގެ ޑިމާންޑް ބޮޑުވެ އެ ކްލަބުން އޭނާ ވިއްކާލަން ކިޔާ އަގު 100 މިލިއަން ޑޮލަރަށް ބޮޑުކޮށްފި އެވެ.
އުމުރުން 25 އަހަރުގެ ގްރީލިޝް ހޯދަން މިދިޔަ ސީޒަނަށް ފަހު ކްލަބްތަކުން މަސައްކަތްނުކުރީ ކޮވިޑް-19ގެ ސަބަބުން ކްލަބްތަކަށް ދިމާވެފައިވާ މާލީ ދަތިތަކުގެ ސަބަބުން އާ ކުޅުންތެރިން ހޯދަން މާ ބޮޑު އިންވެސްޓެއް ކުރަން ކްލަބްތަކުގެ ވެރިން ވެސް ބޭނުންނުވާތީ އެވެ. އެކަމަކު މި ސީޒަނުގައި ގްރީލިޝް ދައްކަމުން އަންނަ މޮޅު ކުޅުމުގެ ސަބަބުން އޭނާގެ ޑިމާންޑް ވަނީ ބޮޑުވެފަ އެވެ.
މިދިޔަ ސީޒަނަށް ފަހު ނަމަ ގްރީލިޝް ވިއްކާލަން އެސްޓަން ވިލާ އިން ކިޔާ އަގު އުޅުނީ 70 މިލިއަން ޑޮލަރުގަ އެވެ. ގްރީލިޝް ވަނީ މި ސީޒަން ފެއްޓުމުގެ ކުރިން އެސްޓަން ވިލާއާ އެކު އިތުރު ފަސް އަހަރަށް ކޮންޓްރެކްޓް އާ ކޮށްފަ އެވެ.
އެކަމަކު ފަހަކަށް އައިސް އެސްޓަން ވިލާގެ އިތުރުން އިންގްލެންޑް ގައުމީ ޓީމުގައި ވެސް ގްރީލިޝް ދައްކަމުން އަންނަ މޮޅު ކުޅުމުގެ ސަބަބުން އޭނާގެ ސޮއި ހޯދަން ކްލަބްތަކުން ވަނީ ކިޔޫ ދަމާލައިފަ އެވެ. އަދި މި ސީޒަނަށް ފަހު އެސްޓަން ވިލާ އިން ބޭނުން ވިޔަސް ގްރީލިޝް އެ ޓީމުގައި މަޑުކުރުވުން ވާނީ ވަރަށް ބޮޑު ޗެލެންޖަކަށެވެ. ސަބަބަކީ ގްރީލިޝް އިންގްލެންޑް ގައުމީ ޓީމުގެ މަގާމު ދަމަހައްޓަން ބޭނުންނަމަ ޗެމްޕިއަންސް ލީގު ފަދަ ބޮޑެތި މުބާރާތްތަކުގައި ކުޅުން މުހިއްމުވާއިރު, އެސްޓަން ވިލާގައި ހުރެގެން އެކަން ކުރެވޭނެ ގޮތެއް ނެތުމެވެ.
ރިޕޯޓްތައް ބުނާގޮތުން ގްރީލިޝްގެ ސޮއިހޯދަން މަސައްކަތްކުރާ ކްލަބްތަކުގެ ތެރޭގައި މެންޗެސްޓާ ސިޓީ އާއި މެންޗެސްޓާ ޔުނައިޓެޑްގެ އިތުރުން ލިވަޕޫލް ހިމެނެ އެވެ. ގްރީލިޝް އަކީ މިނިޓަށް ބަލާއިރު މި ސީޒަނުގައި އެންމެ ބޮޑަށް ލަނޑު ޖަހާނެ ފުރުސަތު އެންމެ ގިނައިން ތަނަވަސްކޮށްދިން ކުޅުންތެރިޔާ އެވެ. ގްރީލިޝް އަކީ ދުނިޔޭގެ ކޮންމެ ޓީމެއްގެ ފުރަތަމަ އެގާރައިގައި ވެސް ކުޅެވޭނެ ކުޅުންތެރިއެއް ކަމަށް ސިޓީގެ ކޯޗު ޕެޕް ގާޑިއޯލާ ވަނީ ދާދި ފަހުން ބުނެފަ އެވެ.
ދެހާސް ބާރަ ވަނަ އަހަރުން ފެށިގެން އެސްޓަން ވިލާ އަށް ކުޅެމުން އަންނަ ގްރީލިޝް ވަނީ 2013/2014 ވަނަ އަހަރުގެ ސީޒަނުގައި ލޯން އެއްބަސްވުމެއްގެ ދަށުން ނޮޓްސް ކައުންޓީ އަށް ކުޅެފަ އެވެ. އޭނާ އެސްޓަން ވިލާގެ ކެޕްޓަނަކަށް ހަމަޖެއްސީ 2019 ވަނަ އަހަރުގެ މާޗް މަހުން ފެށިގެންނެވެ. އަނިޔާގެ ސަބަބުން މިދިޔަ ހަފްތާތަކުގައި ކުޅުމާ ދުރުގައި ހުރި ގްރީލިޝް ވަނީ ފިޓްވެގެން އައިސް ރަނގަޅު ކުޅުމެއް ދައްކައިފަ އެވެ.
