މިއުނިކް (އޭޕްރީލް 1) - ވޯލްޑް ކަޕް ކޮލިފައިންގައި ނޮދަން މެސެޑޯނިއާ އަތުން 2-1 އިން ބަލިވެ 2014 ވަނަ އަހަރުގެ ދުނިޔޭގެ ޗެމްޕިއަން ޖަރުމަނު މިދިޔަ 20 އަހަރު ތެރޭ ފުރަތަމަ ފަހަރަށް ވޯލްޑް ކަޕް ކޮލިފައިން މެޗަކުން ބަލިވެއްޖެ އެވެ.
ޖަރުމަނު އެންމެ ފަހުން ވޯލްޑް ކަޕް ކޮލިފައިން މެޗަކުން ބަލިވީ 2001 ވަނަ އަހަރު އިންގްލެންޑް އަތުންނެވެ. އިންގްލެންޑުން ޖަރުމަނު ދަނޑުގައި އެ ފަހަރު މޮޅުވީ 5-1 އިންނެވެ. އޭގެ ފަހުން ކޮލިފައިންގައި ކުޅުނު 35 މެޗުން ޖަރުމަނު ބަލިވެފައިނުވެ އެވެ.
ރޭގެ މެޗުގައި ނޮދަން މެސެޑޯނިއާ އަށް ލީޑުނަަގައިދިނީ ފުރަތަމަ ހާފުގެ އިތުރު ވަގުތުގައި ކުރިން އިންޓަ މިލާނާއި އިޓަލީގެ ގިނަ ކްލަބްތަކަށް ކުޅެފައިވާ ގޯރާން ޕަންޑޭވް އެވެ. ދެ ވަނަ ހާފްގެ ކުޅުން ފަށައިގެން 63 ވަނަ މިނިޓްގައި ޖަރުމަނަށް ނަތީޖާ ހަމަހަމަކޮށްދިނީ މެންޗެސްޓާ ސިޓީ އަށް މި ސީޒަނުގައި މޮޅު ކުޅުމެއް ދައްކަމުން އަންނަ އިލްކާއި ގުންޑޮގާން އެވެ. މިއީ ލެރޯއި ސާނޭ އަށް ކުރި ފައުލަކަށް ރެފްރީ ދިން ޕެނަލްޓީ އަކުން ގުންޑޮގާން ޖެހި ޕެނަލްޓީ އެކެވެ.
ޖަރުމަނަށް ލީޑުނަގައިދޭން ޓިމޯ ވާނާ އަށް ލިބުނު ރަނުގެ ފުރުސަތު އޭނާ އަތުން ގެއްލުނުއިރު, ދުނިޔޭގެ ރޭންކިންގެ 65 ވަނައިގައި އޮތް މެސެޑޯނިއާ މެޗުން މޮޅުވީ 85 ވަނަ މިނިޓްގައި އެލްމާސް އެވެ. މި މެޗުގައި ޖަރުމަނު ކޮޅަށް ވަން ގޯލުތަކަކީ މި ފަހަރުގެ ކޮލިފައިންގައި އެ ޓީމު ކޮޅަށް ވަން ފުރަތަމަ ގޯލުތަކެވެ.
ރޭގެ ނަތީޖާއާ އެކު ޖަރުމަނު ވަނީ ކޮލިފައިން ގްރޫޕް ޖޭގެ ތިން ވަނަ އަށް ވެއްޓިފަ އެެވެ. ގްރޫޕްގެ އެއް ވަނައިގައި އޮތީ ރޭ ރުމޭނިއާ އަތުން 3-2 އިން މޮޅުވެ, ކޮލިފައިންގައި މިހާތަނަށް ސައްތަ އިން ސައްތަ ރެކޯޑެއް ދަަމަހައްޓަމުން އަންނަ އާރްމީނިއާ އެވެ. އެ ޓީމަށް ވަނީ ތިން މެޗުން ނުވަ ޕޮއިންޓް ލިބިފަ އެވެ. ދެ ވަނައިގައި އޮތީ ރޭގެ މެޗުން މޮޅުވި ނޮދަން މެސެޑޯނިއާ އެވެ. ނޮދަން މެސެޑޯނިއާ އާއި ތިން ވަނައިގައި އޮތް ޖަރުމަނަށް ތިން މެޗުން ހަ ޕޮއިންޓް ލިބިފައިވާއިރު, ނޮދަން މެސެޑޯނިއާ އަށް ކުރި ލިބެނީ ލަނޑުގެ ތަފާތުންނެވެ.
ޔޫރަޕްގެ ގަދަބާރުތަކުން ރޭ ކޮލިފައިންގައި ކުޅުނު މެޗުތަކުގެ ނަތީޖާ އަށް ބަލާއިރު އަނިޔާގެ ސަބަބުން ދުނިޔޭގެ މޮޅު ކުޅުންތެރިޔާ ރޮބަޓް ލެވަންޑޯސްކީ ނުލައި ކުޅުނު ޕޮލެންޑް އަތުން އިންގްލެންޑް ވަނީ 2-1 އިން މޮޅުވެފަ އެވެ. ކޮސޯވޯ އަތުން 3-1 އިން ސްޕެއިން މޮޅުވިއިރު, ރަށުންބޭރުގައި ކުޅުނު މެޗުން ފްރާންސް ވަނީ 1-0 އިން ބޮސްނިއާ އަތުން މޮޅުވެފަ އެވެ. އަދި އިޓަލީން ލިތުއޭނިއާގެ މައްޗަށް 2-0 އިން ކުރިހޯދިއިރު, ޑެންމާކް ވަނީ ރަށުންބޭރުގައި އޮސްޓްރިއާ އަތުން 4-0 އިން މޮޅުވެފަ އެވެ.
