އިދިކޮޅު ކޯލިޝަން، ޕީޕީއެމް/ޕީއެންސީއިން މާލޭގެ މޭޔަރު ކަމަށް މި ފަހަރު ކުރިމަތިލައްވާ ޑރ. މުހައްމަދު މުއިއްޒުއަކީ ކުރީގެ ސަރުކާރުގައި ހަތް އަހަރު ދުވަހު ހައުސިން މިނިސްޓަރުކަން ކުރެއްވި ތަޖުރިބާކާރު ބޭފުޅެކެވެ. އެކަމަކު، މަރުކަޒީ ސިޔާސަތެއްގެ ނިވަލުގައި އޭރުގެ ސަރުކާރުން ކައުންސިލްތަކުގެ ބާރުތައް ހަނިކޮށް، މައި ސަރުކާރުގެ ދަށަށް ގެންނަން ކުރި މަސައްކަތްތަކުގެ ހިޔަނި އެންމެ ބޮޑަށް އެޅުނު ބޭފުޅަކީ ޑރ. މުއިއްޒު އެވެ.
އޭނާ ތަމްސީލު ކުރެއްވި ސަރުކާރާ ބީރަށްޓެހި، އަދި ފާޅުގައި ދެކޮޅު ހެދި ލާމަރުކަޒީ ނިޒާމެއްގެ އެންމެ އިސް ސަފުން، އާބާދީ އެންމެ ބޮޑު ސިޓީ ހިންގުމުގެ ލަގަނު ހަވާލުކުރަން، ވާދަވެރި ފަރާތްތަކުން އަމާޒުކުރާ ފާޑުކިއުންތަކުގެ އިތުރުން މާލޭ ރައްޔިތުންގެ މެދުގައި އޮތް ކަންބޮޑުވުން ބޮޑެވެ.
މިއީ އެފަދަ ކަންބޮޑުވުންތަކާއި ސުވާލުތަކުގެ އިތުރުން މާލެ ސަރަހައްދަށް ކުރިމަތިވެފައިވާ މައްސަލަތައް ހައްލުކުރަން މުއިއްޒު ގެންގުޅުއްވާ ތަސައްވުރާއި ވިސްނުން އެނގެން ބޭނުންވާ މާލޭ ރައްޔިތުންނަށް ހާއްސަ އިންޓަވިއުއެކެވެ.
މައި ސަރުކާރަށް ބާރު ޖަމާކުރުމުގެ ބަދަލުގައި, ރަށްތަކަށް, އަތޮޅުތަކަށް, ސިޓީތަކަށް ދޫކޮށްލާ ލާމަރުކަޒީ ނިޒާމަކީ އެމްޑީޕީން ގެނައި ނިޒާމެއް ކަމަށް އަަބަދުވެސް ވަކާލާތުކުރޭ. ޑރ. މުއިއްޒު ޕީޕީއެމްގެ ޓިކެޓުގައި, މި ނިޒާމުގެ މޭޔަރަކަށް ވާދަކުރައްވާ އިރު، ޕީޕީއެމްގެ ލީޑަރުގެ ރިޔާސީ ބަހުސެއްގައި ވެސް އެބައޮތް ވިދާޅުވެފައި، އެއީ ރާއްޖެ އަށް އެންމެ ކަމުދާ ނިޒާމެއް ނޫނޭ. މި ވާހަކަފުޅަށް ބާރު ލިބޭ ފަދަ އަމަލުތަކެއް ހަތް އަހަރު ހައުސިން މިނިސްޓަރުކަން ކުރެއްވި އިރު މަނިކުފާނުގެ ފަރާތްޕުޅުން ވެސް ފެނުނު. މިސާލަކަށް ދަރުބާރުގެ ވެސް ސިޓީ ކައުންސިލް ދަށުން ހައުސިން މިނިސްޓްރީގެ ދަށަށް ގެނައުމާއި، ކައުންސިލަރުންގެ މުސާރަ ކުޑަކުރުން ފެށިގެން ސިޓީ ކައުންސިލްގެ ހިންގުމާއި ބާރުތައް ވަރަށް ބޮޑަށް ހަނިކުރެވިގެން ދިއަ މަންޒަރު ފެނުނު. މިކަންކަން މިހެން އޮތް އިރު، ލާމަރުކަޒީ ނިޒާމެއްގެ ތެރެއިން ރާއްޖޭގެ އާބާދީ އެންމެ ބޮޑު ސިޓީގެ މޭޔަރުކަން މުއިއްޒުއަށް ދޭން ރައްޔިތުން އިތުބާރުކުރަންވީ ކީއްވެގެންތޯ؟
ތީ އޭރުގެ ސަރުކާރުގެ ސިޔާސަތުތަކެއް ދެއްތޯ. އަދި އެކަން ކަން ދިމާވި ގޮތް ވެސް އަޅުގަނޑުމެން ޖެހޭނެ ބަލާލަން. އަޅުގަނޑު އެންމެ ފުރަތަމަވެސް ދަންނަވާލަން ބޭނުންވަނީ، އަޅުގަނޑު ކުރިއަށް ގެންގޮސްފައި ނޫނީ ކޮށްފައި ހުރި މަސައްކަތްތަކަކީ، އަޅުގަނޑުގެ މައްޗަށް ހުންނެވި ބޭފުޅަކު ނޫނީ ވެރިއަކަށް ހުންނަވާ ބޭފުޅެއް، އެއީ ރައީސުލްޖުމްހޫރިއްޔާ، އަޅުގަނޑު ދެ ރައީސުންނާއެކީ މަސައްކަތް ކުރިން. ރައީސުލްޖުމްހޫރިއްޔާ އަޅުގަނޑާ ހަވާލުކުރައްވާ މަސައްކަތެއް ނޫނީ ސަރުކާރުގެ ސިޔާސަތު ކަނޑައަޅުއްވާފައި ތަންފީޒުކުރަން އަޅުގަނޑާ ހަވާލުކުރައްވާ މަސައްކަތެއް. އެކަން ކުރެވޭތޯ އަޅުގަނޑު މަސައްކަތް ކުރީ. އެއީ އަޅުގަނޑަށް ކުރެވުނު އެންމެ ރަނގަޅަކަށް. އެހެންވީމަ، އެ ނޫން ގޮތަކަށް އަޅުގަނޑު މަސައްކަތްކޮށްފަ އެއް ނުހުންނާނެ.
އަޅުގަނޑުގެ އަމިއްލަ ކަމެއް، އަޅުގަނޑު މިވެނި ގޮތަކަށް ކަން ކުރަން ބޭނުންވެގެން ކޮށްފައި ހުރި މަސައްކަތެއް ނުހުންނާނެ. އަޅުގަނޑާ ހަވާލުކުރާ މަސައްކަތެއް ކުރުން، އެއީ އަޅުގަނޑުގެ ޒިންމާއަކަށް ވާނީ.
ދެން ތި ވިދާޅުވި ކަންތަކަށް ބަލާއިރު، ތި ހުރިހާ ކަމަކަށް ބަލާއިރު ވެސް ތަފްސީލަށް ވަޑައިގެންފިއްޔާ އެނގިވަޑައިގަންނަވާނެ، އެކަން ކުރަން ދިމާވި ސަބަބުތައް. އެހެންވީ ކީއްވެގެންކަން. އޭރުގެ ސިޓީ ކައުންސިލްގެ މަސައްކަތްތައް ނުހިނގާ. ކަންކަން ދިޔައީ ބޮއްސުންލަމުން. މާލޭގެ މަގުތަކެއް ސާފެއް ނުކުރޭ. ކާނުތައް ބެދޭ. ތަންތަން މަރާމާތެއް ނުކުރޭ. މިސްކިތްތަކެއް ނުބަލަހައްޓާ. މިހެން ގޮސް ވަރަށް ބޮޑަށް ބޮއްސުންލާފައި މާލެ ތެރެ އޮތީ.
އެހެންވީމާ، މި ހުރިހާ ކަމެއް މިގޮތަށް ދަމުން ދިޔައިމަ، މާލޭގެ މަގުތައް އަނދިރިކަން ދުވަހެއް ދުވަހަކަށް ދިޔައީ އިތުރުވަމުން. މިހެން ގޮސް މުނިސިޕަލް ހިދުމަތްތަކެއް ނުދެއްވައޭ ރަނގަޅަކަށް. ބަޖެޓާއި މުވައްޒަފުންނާ ހަމަ ހަމަޖެހިފައި އޭރު ހަމަ އޮތް ގޮތަށް އޮތޭ. ދެން އެކަން ކަން ތަންފީޒުނުވެ ދިގުލައިގެންދާތީވެ، ގާތްގަނޑަކަށް ދޮޅު އަހަރެއްހާ ދުވަސް ވަންދެން އެކަން ކަމަށް މަސައްކަތްކޮށް ދިނުމަށް ސަރުކާރުން އެދި، ކޮންމެވެސް ސަބަބަކާ ހެދި އެކަން ކަމެއް ނުއެއް ހިނގާ މާލޭގައި.
އަޅުގަނޑު އެއްވެސް މީހެއްގެ ބޮލުގައި މި ޒިންމާ އަޅުވާކަށް ނޫން. ކަންކަން ނުހިނގާ ވާހަކަ. އެއީ ދެން ފެންނަން އޮތް ކަމެއް. ދެން އެ ހިސާބުން، އޭރުގެ ސަރުކާރުން ނިންމަވާފައި، އަޅުގަނޑާ ހަވާލުކުރީ މަސައްކަތެއް ވިއްޔާ އަޅުގަނޑު ކުރީ. އޭރުގެ ސަރުކާރުގެ ސިޔާސަތެއްގެ ގޮތުގައި އޭރު ކަނޑައެޅީ. އެހެންވީމާ ދެނެއް މިގޮތަށް މާލޭގެ ރައްޔިތުންނެއް މިއިން އެއްވެސް ހިދުމަތެއް ނުލިބި ދޫކޮށްލެވިފައި. މާލޭގެ ރައްޔިތުންނަށް ތަރައްގީ ނުގެނެވި، މާލޭގެ މަގުތައް ނުބެލެހެއްޓި، ވީރާނާވާން ދޫކޮށްލާފައި ނުބޭއްވޭނެއޭ. އެހެންވީމާ ދެން އޮތް ހަމައެކަނި އޮޕްޝަނަކީ އެ ކަންކަން އެކި މިނިސްޓްރީތަކަށް ބަހާލައިގެން މަސައްކަތްތައް ކުރުމޭ. އެގޮތަށް ނިންމަވާފައި، އަޅުގަނޑާ ހަވާލުކުރެއްވި މަސައްކަތެއް ވިއްޔާ އަޅުގަނޑު ކުރިން.
އަޅުގަނޑު ބޭނުންވެގެން، ލާމަރުކަޒީ ނިޒާމު ފުނޑާލާކަށް ނޫނީ އެހެން ކަމެއް ކުރާކަށް ކުރި އެއްވެސް ކަމެއް ނޯންނާނެ. އަޅުގަނޑު އަބަދުވެސް ގަބޫލުކުރަނީ، ރައްޔިތުންނާ ހިސާބުންކަން ބާރު އަންނަނީ. ރައްޔިތުންނާ ގުޅިގެންކަން މަސައްކަތް ކުރަންވާނީ. ރައްޔިތުންގެ އަޑު އަހައިގެންކަން މަސައްކަތް ކުރަންޖެހޭނީ. އެހެންވީމާ، އެ ވިސްނުމަކަށް ބަދަލެއް ނާދެ އެއްވެސް ކަމެއް ކުރި އިރަކު. އެހެން ނަމަވެސް އަޅުގަނޑާ މަސައްކަތެއް ހަވާލުކުރީމަ، އެއީ ތި ވިދާޅުވި ކަންކަން ކަމުގައި ވިޔަސް އަދި އެހެން ބައިވަރު މަސައްކަތްތައް ކުރިޔަސް. މާލޭގެ ތަރައްގީއަށްޓަކައި ބައިވަރު މަސައްކަތް ކުރިއަށް ގެންދެވުނު. މިއިން ކޮންމެ ކަމެއްގަވެސް އަޅުގަނޑު ބަލާފަ ހުންނާނީ އެންމެ ރަނގަޅަކަށް އެ މަސައްކަތެއް، އެ ޕްރޮޖެކްޓެއްގެ ގޮތުގައި ބަލައިގެން، އެ މަސައްކަތް، އެ ޕްރޮޖެކްޓެއް ޑެލިވާ ކުރެވޭތޯ ބަލާފައި ހުންނާނީ. އަޅުގަނޑަކީ އިންޖިއަނިރިން ދާއިރާއިން ކިޔާފަ ހުރި، ޕްރޮޖެކްޓު މެނޭޖްމަންޓުގެ ދާއިރާގެ މީހަކަށްވެ، މަޝްރޫއުއެއް ގޮތަށް ހަވާލުކުރާ ކަމެއް ޑެލިވާ ކުރަން، ނަތީޖާ ނެރެން މަސައްކަތް ކުރަނީ. އެހެންވީމާ އިރާދަކުރެއްވިއްޔާ ހުރިހާ މަސައްކަތެއް ވެސް އެ ގޮތަށް ކޮށްފައި ހުންނާނީ. އެއްވެސް ހާލެއްގައި، އަޅުގަނޑު ވަކި ގޮތަކަށް ގަބޫލުކޮށްގެން، ލާމަރުކަޒީ ނިޒާމާ އަޅުގަނޑު އިދިކޮޅު ވެގެން ކުރި އެއްވެސް ކަމެއް ނޯންނާނެ.
މުއިއްޒުގެ ހައުސިން މިނިސްޓަރު ކަމުގެ ދަށުގައި, އޭރުގެ ސަރުކާރުގެ ތާއީދާ އެކު މާލެ ސިޓީ ކައުންސިލްގެ ބާރުތައް ހަނިކުރި މައިގަނޑު ސަބަބަކީ މާލޭ ސިޓީ ކައުންސިލުގެ ސާފު އަޣުލަބިއްޔަތު އެމްޑީޕީއަށް އޮތުމާ މެދު ހިތްހަމަޖެހިވަޑައިނުގެން ކަމަށް ބުނުމަށް ޖާގަ ލިބޭ. މާލެއަކީ އަބަދުވެސް އެމްޑީޕީގެ މެޖޯރިޓީ އޮންނަ ތަނަކަށްވާ އިރު، މި އިންތިހާބުގައި ވެސް އެމްޑީޕީގެ ގިނަ ކެންޑިޑޭޓުން ހޮވުމުގެ ފުރުސަތު އެބައޮތް. މި ކެންޑިޑޭޓުންނާ އެކު މޭޔަރަކަށް މުއިއްޒު ހޮވިވަޑައިގެންފި ނަމަ މި ސަރުކާރުން ވެސް ކުރީގެ މާޒީ ތަކުރާރުކޮށް، ބާރުތައް ހަނިކޮށްފާނެ ކަމުގެ ބިރު އެބައޮތް. އެއީ ލާމަރުކަޒީ ގާނޫނަށް މި ސަރުކާރުން ގެނައި ބާރުތަކާ އެކު ކައުންސިލް މިނިވަންކޮށް ހިންގައި އާމަދަނީ ވެސް ހޯދެން އޮތަތީވެ. އެމްޑީޕީގެ ގިނަ ކެންޑިޑޭޓުންނާ އެކު މުއިއްޒު މޭޔަރަކަށް ހޮވިވަޑައިގެންފި ނަމަ, ރައްޔިތުންނަށް މިހާރު ތި ވިދާޅުވާ ވައުދުތައް ފުއްދަވަން ޖާގަ ނުދެއްވައިފި ނަމަ ދެން ކަންކަން ކުރައްވާނެ ގޮތަކީ ކޮބައިތޯ؟
އަޅުގަނޑު އެއްވެސް ކަމެއް, އެމްޑީޕީގެ ކެންޑިޑޭޓުން, އެމްޑީޕީގެ ކައުންސިލަރުން, އެމްޑީޕީގެ މޭޔަރެއް ހުރެގެން އެ ވިސްނުމުގައި ކުރި އެއްވެސް ކަމެއް ނޯންނާނެ. އަޅުގަނޑުމެންގެ ވިސްނުމަކަށްވެފައި އޮތީ، އަޅުގަނޑާ މަސައްކަތެއް ހަވާލުކުރެވުނީމަ، އެކަން ކުރުން. ކުރެވޭތޯ ބެލުން. ދެން ތި ވިދާޅުވި ގޮތަށް މިހާރު ކުރިމަތިލާފައި ތިބި ކެންޑިޑޭޓުންނާ އަދި ޕީޕީއެމްގެ ކެންޑިޑޭޓުން ނެތް ދާއިރާތަކެއް އެބަހުރި. އެހެންވީމާ، ވަރަށް ލައިކްލީ އެމްޑީޕީގެ ގިނަ ކައުންސިލަރުންތަކެއް ހޮވިގެން ދިއުން. އަޅުގަނޑަށް އެއްވެސް ވަރެއްގެ މައްސަލައެއް ނޫން އެއީކީ.
އަޅުގަނޑު ކުރިން ވެސް މަސައްކަތް ކޮށްފައި ހުންނާނީ، އަޅުގަނޑާ އެކީގައި މަސައްކަތް ކުރާ އެންމެންނަކީ އަޅުގަނޑުގެ ޓީމުގެ ގޮތުގައި ބަލައިގެން. ކޮންމެ މީހަކަށް ޒިންމާއެއް ހަވާލުކުރަން. އަޅުގަނޑު ހައުސިން މިނިސްޓްރީގައި މަސައްކަތް ކުރިއިރު ވެސް، އެންމެ ބޮޑަށް ޓީމު ބޮޑުވެގެން ދިޔައިރު، 33 ޕޮލިޓިކަލް ބޭފުޅުން ތިއްބެވި ކަންނޭނގެ އެ ޓީމުގައި. ކޮންމެ ބޭފުޅަކު ވަޑައިގަތީމަ ކޮންމެ ބޭފުޅަކާވެސް އަޅުގަނޑު މަސައްކަތެއް ހަވާލުކުރަން.
މިސާލަކަށް ދަންނަވަންޏާ އެކި ބޭފުޅުންނަށް މަސައްކަތް ބަހާލާފައި އޮއްވާ، އިތުރުވި ބޭފުޅެއް. އެ ބޭފުޅާއާ އަޅުގަނޑު ހަވާލުކުރީ މިނިސްޓްރީގެ ސިޓީތަކަށް ޖަވާބު ދިނުން އަވަސްކުރުން. ތިން ދުވަހުން ޖަވާބު ދޭން އޮންނާތީ. އަދި ފޯނުތަކަށް ޖަވާބު ދިނުން ލަސްވާތީ ފޯނުތަކަށް ޖަވާބު ދޭ ގޮތާއި ސިޓީތަކަށް ޖަވާބު ދިނުން އަވަސް ކުރުން، މިކަން ބަލައި ދިނުމަށް. މަސައްކަތެއް ހަވާލުނުކޮށް ނުބަހައްޓަން އެކަކު ވެސް. އަދި އެކަން ކުރޭތޯ ވެސް ބަލަން.
ވާހަކައަކީ އަޅުގަނޑަށް އެއްވެސް މައްސަލައެއް ނޫނޭ އަޅުގަނޑެއް ނުބަލާނަން ކައުންސިލަށް އަންނަ 18 ބޭފުޅުންނަކީ ޕީޕީއެމް، ނޫނީ އެމްޑީޕީ ނޫނީ ޖޭޕީތޯ. ޕާޓީއަކީ މުހިއްމު އެއްޗެއް ނޫން. މި އަންނަނީ ރައްޔިތުންނަށް ހިދުމަތްކުރަން. އޭގެން ކޮންމެ ބޭފުޅަކަށް މަސައްކަތް ހަވާލުކުރާނަން، އަޅުގަނޑާ ރައްޔިތުން މިކަން ހަވާލު ކޮށްފިއްޔާ. އެއިން ކޮންމެ ބޭފުޅަކު ކުރާ ހިތުން ކުރާނެ. އަދި އެއިން ކޮންމެ ބޭފުޅަކުވެސް، އެ ބޭފުޅާ އެ ވަޑައިގެންނެވި ދާއިރާއަށް ހިދުމަތްތަކެއް ކުރަން. އެހެންވީމާ، އެ ބޭފުޅުންވެސް އެއީ ކާމިޔާބު ބަޔަކަށް ހަދަން އަޅުގަނޑު މަސައްކަތް ކުރާނީ. އެއިން ކޮންމެ ބޭފުޅަކުވެސް ބޭނުންވާނެ ކާމިޔާބު ބަޔަކަށްވާން، ދައުރު ނިމޭއިރު ދައްކަން ބޭނުންވާނެ، ތިމަންނާއަކީ ވެސް ވަރަށް ޕްރޮޑަކްޓިވް މަސައްކަތްތަކެއް ކޮށްފަ ހުރި މީހެއްކަން. ނަމެއްގައި އެތާ ހުރި ބޮލަކަށް ވާން ބޭނުމެއް ނުވާނެ. އެހެންވީމާ، ޓީމެއްގެ ގޮތުގައި އެންމެން ގޮވައިގެން، އެންމެންނަކީ މުހިއްމު ބަޔަކަށް ހަދައިގެން، އެމީހުންގެ މަސައްކަތް ވެލިޔުކޮށްގެން، އެއްކޮށް މަސައްކަތް ކުރާނީ.
އަޅުގަނޑަކަށް ގަބޫލެއް ނުކުރެވޭ، ސަރުކާރުން ހުރަސްއަޅުއްވާނެއެކޭ. އެޅުއްވިޔަސް، އެވެސް އޯވާކަމް ކުރެވޭނެ. އެންމެން ގޮވައިގެން މަސައްކަތް ކުރާނަމަ، ރަނގަޅު ނިޔަތުގަ މަސައްކަތް ކުރަންޏާ، އަޅުގަނޑަކަށް ގަބޫލެއް ނުކުރެވޭ، ގިރާނުކުރުވޭނެ އެއްވެސް ހުރަހެއް އަންނާނެ ކަމަކަށް.
މާލެއަކީ މައްސަލަ ފުންޏެއް. ތޮއްޖެހި ދިރިއުޅޭ ކުދި ގޮޅިތަކުން ކާރުބާރުބޮޑު މަގުތަކަށް އަޅާ ފިޔަވަޅާ އެކު ވެސް އެތައް ތަކުލީފަކާއި ހާސްކަން ކުރިމަތިވޭ. ކުރުކޮށް ދަންނަވަންޏާ މާރުކޭޓުތަކުގެ މައްސަލަ. ޓްރެފިކްއާ ޕާކިންގެ މައްސަލަ. ނުރައްކާބޮޑު ގަރާޖްތަކާ ވޯކްޝޮޕްތަކުން މާލޭގެ މަގުތައް ވަނީ އިންތިހާއަށް ތޮއްޖެހިފައި. މި މައްސަލަތަކަށް ހައްލު ހޯދާނެ ގޮތްތަކެއް، މުއްދަތުތަކެއް ވިދާޅުނުވެ, ކެންޑިޑޭޓުންގެ ފަރާތުން އިވެނީ، ބޮޑެތި ވައުދުތަކެއްގެ އަޑު. މާލެއަށް ބޭނުންވަނީ ތޮއްޖެހުން ނައްތާލުން, އަމާންކަން, ހިތްފަސޭހަކަމާ އެކު ދިރިއުޅެވޭނެ ގޮތެއް. މި ހާސްކަމުން އަރައިގަނެ، މާލެ ލިވަބަލް ތަނަކަށް ހަދަން ގެންގުޅުއްވާ ވިސްނުމަކީ، ނުވަތަ ތަރުތީބަކީ ކޮބައިތޯ؟
އަޅުގަނޑު ކެމްޕޭނު ލޯންޗު ކުރަމުން ވެސް އިއުލާނުކުރިން މައިގަނޑު ހަތަރު އަމާޒެއް އޮންނާނެ ވާހަކަ. ގެދޮރުވެރިކަން ހާސިލުކޮށްދިނުމަށްޓަކައި މަސައްކަތްކޮށް އެ އަމާޒަށް ވާސިލުވުމަށް ކައުންސިލުން އިސްނަގައިގެން މަސައްކަތްތައް ކުރުން. ދެވަނަ އަމާޒަކީ ފުދުންތެރި ރައްޔިތެއް އުފެއްދުމަށް މަސައްކަތްތަކެއް ކުރުން.
ވަޒީފާނެތިފައި ތިބި ފަރާތްތައް، ފުދުންތެރިކަން ނެތް އެތައް އާއިލާތަކެއް އެބަ ތިބި. ވޭތުވެދިޔަ ކޮވިޑުގެ ލޮކްޑައުން ފެށުނު ހިސާބުން ފެށިގެން މިއަދާ ހަމައަށް އައިއިރުގައި ދިރިއުޅުން އެއްކޮށް ހަލާކުވެފަ އައިލާތަކެއް އެބަ ތިބި އާމްދަނީ ނެތިގެން. އޭގެ އިތުރުންވެސް ވަޒީފާ ނުއުފެދޭތީ މާލެ ތެރޭގައި ވަޒީފާ އަދާނުކޮށް ބަޔަކު އެބަ ތިބި. އެހެންވީމާ، މިކަމަށް މަސައްކަތްތަކެއް ކައުންސިލުން އިސްނަގައިފިއްޔާ އެބަހުރި ފުރުސަތުތަކެއް ހަގީގަތުގައިވެސް ހުޅުވޭނެ.
މާލެއަކީ ހިތްފަސޭހަ، ހިތްގައިމު ސިޓީއަކަށް ހަދަން ކުރަންޖެހޭ، ކުރެވޭނެ ކަންތައްތަކެއް އެބަހުރި. ކުރީގަ އަޅުގަނޑުމެން ކުރި މަސައްކަތްތައް އެހުރީ. ތަންތަން ހަދާފަ އެހުރީ. އެ ތަންތަން މިހާރު ނުއެއް ބަލަހައްޓާ. އެ ތަންތަން އެބަޖެހޭ ރީތި ކުރަން.
މިސްކިތްތަކަށް ބައްލަވާ, ނުބަލަހައްޓާ ނޫންތޯ. މިސްކިތްތައް ވެސް ހަމަ ފަންކާއެއް ވެސް ނުޖެހޭ ތަންތަން ހުރޭ، ބޮކި އަނދާފައި ހުންނަ ތަންތަން ހުރޭ. މިހާރު ދެން ރޯދަ މަސް އަންނާތީ ބައެއް މިސްކިތްތަކުގައި އެބަ ފެނޭ ރަނގަޅުކުރަން މަސައްކަތްކުރާތަން. އެހެންނެއް ނޫން. އަބަދުވެސް މިސްކިތްތައް ވާންޖެހޭނީ ރީތިކޮށް، ހިތްފަސޭހަ ތަނަކަށް. މިއީ ސަތޭކަ ޕަސަންޓް އިސްލާމް ގައުމެއް. އެހެންވީމާ، ވެރިކަންކުރާ ސިޓީ މިއީ، މިތަނުގެ އެންމެ ރީތި ތަންތަނަށް ވާންޖެހޭނީ މިސްކިތްތައް.
އެހެންވީމާ އެކަމަށް ދޭންޖެހޭ ސަމާލުކަން ދޭންޖެހޭނެ. މަގުތައް ސާފުކުރަންޖެހޭ. ސާފުތާހިރުވާންޖެހޭ. ރީތި، ހިތްގައިމު އޯޕަން ސްޕޭސް ނޫނީ ގްރީން އޭރިއާތައް، ޕާކުތައް އުފައްދަންޖެހޭ. ހަގީގަތުގައި ޖާގަ އެބަހުރި. ޖާގަ ޖެހޭނީ ކުރީގަ އަޅުގަނޑުމެން މަސައްކަތްކުރިއިރު އުފެއްދި ގޮތަށް އުފައްދަން. މިސާލަކަށް ފުޑްކޯޓު ކައިރީގައި އޮތް ޕާކާއި ފުޑް ކޯޓާ މިތަންތަން މިއީ ކުރީގަ ބޭކާރު ގޮތަކަށް، ގޮނޑެއްހެން ހުރި ތަންތަން ނޫންތޯ. ދެން މި ތަންތަން ބަދަލު ކުރީ ނޫންތޯ އަޅުގަނޑުމެން. ރީވައިޓަލައިޒް ކުރީ، ރީޖަނެރޭޓް ކުރީ. އެހެންވީމާ، އެގޮތަށް މަސައްކަތް ކުރަންޖެހޭ އެބަ. ޓްރެފިކް މައްސަލައަކީ ވަރަށް ބޮޑު މައްސަލައެއް. އެކަމަކު އެއީކީ ސިޓީ ކައުންސިލަށް އެކަނި ހައްލު ކުރެވޭނެ ކަމެއް ނޫން.
މާލެއަށް ވެހިކަލް އެތެރެކުރުން އިތުރުކުރާ އިތުރުކުރުން އެއީ، ކޮންމެ މީހަކުވެސް ކިރިޔާ ފުދުންތެރިކަމެއް ހުރިއްޔާ ކާރެއް ގެނެސްފާނެ. އެއީ އެމީހާގެ މައްސަލައެއް ނޫން. އެކަމަކު މުޅި ރާއްޖޭގައި މި އޮންނަ ވެހިކަލްތައް އެތެރެކުރުމާބެހޭ ސިޔާސަތަކީ މައި ސަރުކާރުން ނިންމާ ކަމެއް. ދެން މިސާލަކަށް ސަރުކާރަށް އެބައި ދޫކޮށްލަމާ. ދޫކޮށްލިޔަސް މާލެ ތެރޭގައި ހުރި ވެހިކަލްތައް މެނޭޖްކުރަން އެބަޖެހޭ. ސިޓީ ކައުންސިލް އެއީ އޭގެ އެއް ޕާޓްނަރު. ދެން ޓްރެފިކް ޕޮލިސް، ދެން ޓްރާންސްޕޯޓް އޮތޯރިޓީ. މިތިން ބައި މީހުން ގުޅިގެން ކުރެވޭނެ ބައިވަރު މަސައްކަތް އެބަހުރި.
މާލެ ތެރޭގައި ދޫކޮށްލާފައި ހުރި، ބާދަނގަޑަށް ވާން ދޫކޮށްލާފައި ހުރި ކާރުތަކާ އެއްޗެހިވެސް ވަރަށް ގިނަ މިހާރު. މި އެއްޗެހިވެސް އެބަޖެހޭތާ އޮންނަ އުސޫލަކުން ނެގެން. އެހެންގޮސް ބައިވަރު ކަންކަން އެބަހުއްޓޭ ކުރެވިދާނެ، ކުރަންޖެހޭ ކަންކަން. މިހާރު އެބަ ފެނޭ ވަރަށް ގިނައިން ބޮކި އަނދާފައި، އަނދިރިވެފައި ހުންނަ މަގުތައްވެސް. އޭގެ ސަބަބުން ކްރައިމް، ނޫނީ މާރާމާރީ އިތުރުވެދާނެ، ވައްކަން އިތުރުވެދާނެ. އެހެންވީމާ ރައްކާތެރިކަމަށް ވެސް އެބަ ހުރަސް އެޅޭ. ޖެނެރަލް މުނިސިޕަލް ކަންކަން މިހުރީ. މިހުރިހާ ކަމަކަށް ސަމާލުކަންދީގެން، ބޮޑު ޓީމެއް މި ހޮވަނީ 18 ކައުންސިލަރުންގެ. މިއިން ކޮންމެ ކައުންސިލަރަކަށް ކޮންމެވެސް ޒިންމާއެއް އޭގެ ތެރެއިން ހަވާލުކޮށްގެން، އެކަންކަން ދާގޮތް ރެގިއުލާކޮށް ބަލަހައްޓަންޏާ، އަދި މަސައްކަތް ކުރަން ތިބި މުވައްޒަފުން މޯޓިވޭޓްކޮށްގެން، އެ މީހުން ކުރާ ކަންކަމަށް ރަނގަޅަށް މަގުފަހިކޮށްދީގެން ކުރަން އުޅެފިއްޔާ މިއީ މާ އުނދަގޫ ކަންކަމެއް ނޫން ހަގީގަތުގައި.
އަޅުގަނޑު ކުރީގައި މަސައްކަތް ކުރިއިރު، ހުރިހާ ޕޮލިޓިކަލް ބޭފުޅުންނާ ދުވާލަކު އެއް ފަހަރު އަޅުގަނޑު ބައްދަލުވާނެ. މަސައްކަތް ފަށަނީ އެ މީހުންނާ އެކީގައި. ހެނދުނު 8:30 އެއީ ޕޮލިޓިކަލް ބޭފުޅުން ގަޑިޖެހޭ ގަޑިއަކީ. އެކަމަކު އަޅުގަނޑުމެން މަސައްކަތް ފަށަނީ 8:10 ގައި. ހުރިހާ ސިޔާސީ މީހުންނާ އެކީގައި އޮންނާނެ ބައްދަލުވުމެއް، ނުރަސްމީކޮށް. އެންމެން އެކީގައި ތިބެގެން، ވާހަކަ ދައްކާނެ އެކަކު އަނެކަކު ކުރާ މަސައްކަތުގައި ހުރި ދަތިތައް، އަނެކަކާ އެކީގައި ހައްލުކުރަންޖެހޭ ކަންކަން. މި ގޮތަށް މި ޓީމްވާކު، މި ރޫހު އިރާދަކުރެއްވިއްޔާ ގެންނާނަން އަޅުގަނޑު.
އެހެންވީމާ ޓިމެއްގެ ގޮތުގައި، ވަރުގަދަ މަސައްކަތްތަކެއް ކޮށްފިއްޔާ، އިރާދަކުރެއްވިއްޔާ މާލޭގެ ރައްޔިތުން އުފާވާނެ.
މާލޭގެ ރައްޔިތުންނަށް ކުރިމަތިވެފައިވާ އެންމެ ބޮޑު ގޮންޖެހުމަކީ ބޯހިޔާވަހިކަން. މިއީ 2008 ވަނަ އަހަރުން ފެށިގެން ތިން ވެރިކަމެއް އަދި ތިން ކައުންސިލެއްގެ ދައުރު މި އިންތިހާބާ އެކު ނިމޭއިރު ވެސް ހައްލު ނުހޯދި އޮތް މައްސަލައެއް. މިކަމުން އަރައިގަތުމަށް ގެންގުޅުއްވާ ވިސްނުމަކީ ކޮބައިތޯ؟ ދެން އަދި މުއިއްޒުގެ ވެސް ބޯހިޔާވަހިކަމުގެ ވައުދުގެ ތެރެއިން މާލެ ސަރަހައްދުން ގޯތި ދޫކުރަން އެބަ ވައުދުވޭ. އެކަމަކު މާލޭ ރައްޔިތުންނަށް ގޯތި ދޫނުކުރާތާ މިހާރު އެތައް އަހަރެއް ވެއްޖެ. މިހާރު ތި ވައުދުވެވަޑައިގަންނަވަނީ ކޮންމެވެސް އެއް ބަޔަކަށް ގޯތި ދީފައި ނިންމާާލާ ވާހަކަތޯ؟ ދެމެހެއްޓެނެވި ގޮތެއްގައި އެކަން ކުރުމުގެ ޕްލޭންކީ ކޮބައިތޯ؟ ނޫނީ ހަމަ ހަގީގަތުގައި ވެސް ކުރެވެން ނެތް އެކަމަކު ތާއީދު ހޯދަން ދައްކަވާ ވާހަކައެއްތޯ؟
ހުސް ވާހަކައެއް ނުދައްކާނަން އަޅުގަނޑެއް. މިހާރު ތި ކުރެއްވި ސުވާލުގައި ވެސް އެބައުޅޭ ކުޑަކުޑަ އޮޅުންތަކެއް ވެސް ހަގީގަތުގައި. އަޅުގަނޑު މިދަންނަވާ ވާހަކައަކީ ގޯތި ދޭނެ ބިން އުފެއްދޭނެ ފުރުސަތުތައް އެބަހުއްޓޭ މާލެ ކައިރީގައި. އަޅުގަނޑުމެން އޭރުގަ ސަރުކާރުގައި ތިބިއިރު، ފުރަތަމަ ކުރިއަށް ގެންދިޔައީ ހުޅުމާލެ ދެވަނަ ފިޔަވަހީގެ މަސައްކަތް. ހުޅުމާލެ ދެވަނަ ފިޔަވަހި ހިއްކައި، އެތަނުން ފްލެޓު އެޅުމުގެ މަސައްކަތްތަކެއް ފެށުނު. ދެން ގުޅިފަޅު. ގުޅިފަޅަކީ ކުރީގެ ރައީސް [މުހައްމަދު] ނަޝީދު ސަރުކާރު ފެށިގެން އައިރު، އެތަނުން ބިންކޮޅެއް ހިއްކާފައި، ހައުސިން މަސައްކަތް ފެށި ތަނެއް. އަޅުގަނޑުމެން ދެން އެކަމުގައި ފަހުން މި ދަންނަވާ ވާހަކައަކީ އެތަނަކީ އޭރުގަ ކައިރީގައި ތިލަފުށީގައި [ކުނި] އެންދުމުގެ މައްސަލަ އެއްވެސް ގޮތަކަށް ހައްލުނުވެ އޮތް ކަމެއް ވީމަ ރެޒިޑެންޝަލް މަސައްކަތަކަށް ރަނގަޅު ތަނަކަށް ނުވެއޭ. އެހެން ނަމަވެސް، 2017 ގެ ފަހުކޮޅު, 2018 ފެށުނު ހިސާބުގައި އޭޑީބީ [އޭޝިއަން ޑިވެލޮޕްމަންޓް ބޭންކް] ގްރާންޓް އެއިޑެއް ސަރުކާރަށް ލިބިގެން، އެންވަޔަރަމަންޓް މިނިސްޓްރީން ތިލަފުށީގެ [ކުނި] އެންދުމުގެ ކަންކަން ނިމުމަކަށް ގެނައުމުގެ މަސައްކަތް ފެށީ. މިހާރު އެކަން ގޮއްސަ އޮތް ހިސާބެއް ނޭނގެ. އެހެން ނަމަވެސް އެއީ ދާއިމަށް ހައްލުވާ ކަމަކަށް ވެގެން ދިއަ. ހައްލެއް އަދި ނުކުރޭ ކަންނޭނގެ. އެކަމަކު ހައްލުކުރެވޭނެ މަގު، ހުރިހާ ކަމެއް ފަހިވެގެން ގޮސް އެއީ ކުނި ނާންދާ، ކުނި ނައްތާލެވޭނެ ގޮތް، މެނޭޖުކުރެވޭނެ ގޮތް، ރޭވޭނެ ގޮތް ނިންމި.
އެ ހިސާބުން ދެން ސަރުކާރުން ނިންމީ ދެން ގުޅިފަޅު ހިއްކަން ވިއްޔޭ. އެއީ ކުންޏަށް ސޮލިއުޝަނެއް ހޯދިއްޖެއޭ. ދެން ގުޅިފަޅު ހިއްކުމަށް ވުރެ ރަނގަޅު ގޮތެއް ނެތޭ މާލޭގެ ރައްޔިތުންނަށް. އެއީ އެންމެ ކައިރީގައި އޮތް ފަޅޭ. އެހެންވީމާ އެއީ ކުރިން މި ދެއްކި ވާހަކައަކާ، ފަހުން ދެއްކި ވާހަކައަކާ ދިމާ ނުވުމެއް ނޫނޭ. ކުރިން އޮތް ހާލަތު ފަހުން، އޭގެ އަސްލު ސަބަބަށް ހައްލެއް ގެނެވުނީމަ، ދެން ސިޔާސަތަށް އަންނަ ބަދަލެއް އެ އައީ. އެހެންވީމާ، ގުޅިފަޅު ހިއްކާފައި އެ ތަނުން ގޯއްޗާއި ފްލެޓު ދިނުމުގެ ޕްރޮޖެކްޓެއް ކުރިއަށް ގެންދިއުމުގެ ވާހަކަ އިއުލާނުކުރެވިގެން ދިޔައީ. އަޅުގަނޑު މިދަންނަވާ ވާހަކައަކީ މިހާރު މިއޮތް ސަރުކާރުން އެ މަޝްރޫއު ކުރިއަށް ގެންދަވަންވީއޭ. އެޔޭ އެންމެ ރަނގަޅު ގޮތަކީ.
އަޅުގަނޑުމެން އިއުލާނުކުރި ކަމަކަށް އޭރުގެ ސަރުކާރު އިއުލާނު ކުރިޔޭ ކިޔާފައި އެކަން ނުކުރައްވާނެ ކަމެއް ނެތޭ. ހަގީގަތުގައި ވެސް މާލޭގެ ރައްޔިތުން ވަރަށް ބޭނުންވެޔޭ ގުޅިފަޅު އެއްކޮށް ހިއްކާފައި، އެތަނަކީ ހައުސިންއަށް ގެދޮރުވެރިކަމުގެ ތަނަކަށް ހަދައިދޭށޭ. އެއީ އެތަނުގެ މައިގަނޑު ޔޫސްއަކަށް ވާންވީ ހައުސިން ހައްލުކުރުމޭ. ޝައްކެއް ނެތް ހައުސިންނާ އެކީގައި، ގުޅޭ އެމްނިޓީސް އަންނަންޖެހޭނެ. އެހެންވީމާ ސިޓީއަކަށް ހަދާދޭށޭ، އެތަނަކީ ރެޒިޑެންޝަލް ތަނަކަށްވާން އެބަޖެހޭ. އެހެންވީމާ، އެކަމަށް އަޅުގަނޑު ވަކާލާތުކޮށްދޭނަމޭ، ރައްޔިތުން ބޭނުންވާ ގޮތަށް ހަމަ އެކަން ބަދަލުކޮށްދެވޭތޯ، މުޅި މާލޭގެ ރައްޔިތުން ހޮވާ މީހަކު އަދި ޓީމަކުން އެކަމަށް މަސައްކަތް ކުރައްވައިފިނަމަ ހައްލު އަންނާނެކަމަށް އަޅުގަނޑު ގަބޫލުކުރަނީ.
މާލެ ސަރަހައްދަށް ބަލާއިރު، ތިން ކައުންސިލެއްގެ ދައުރު މި ނިމުނީ. މާލޭގައި ހުރި މައްސަލަތަކަށް ހައްލެއް ނުލިބޭ. ދެން ކައުންސިލްގެ ބެލެނިވެރިކަމުގެ ދަށުގައި އޮތް ވިލިމާލޭގެ ހާލަތު އެހާ ނިކަމެތި. އެކަށީގެންވާ ތަރައްގީއެއް އައި ތަނެއް ނުފެނޭ. އެކަށީގެންވާ ހިދުމަތެއް ނުދެވޭ. ކަން މިހެން އޮތްއިރު، ކައުންސިލްގެ އިހުތިސާސްގެ ތެރެއަށް މި ވަނީ ހުޅުމާލެ ވެސް އިތުރުކުރަން ނިންމާފައި. މެންޑޭޓް އާއި މަސައްކަތްތައް ފުޅާވެފައި މިވަނީ. މާލެ އާއި ހާއްސަކޮށް ވިލިމާލެއަށް އެކަށީގެންވާ ހިދުމަތް ނުދެވުނުއިރު، ހުޅުމާލޭގެ ބުރަ މި ކައުންސިލަށް އުފުލޭނެކަމަށް ގަބޫލު ކުރައްވަންތޯ؟ އަދި، މާލެ، ވިލިމާލެ، އަދި ހުޅުމާލެއަށް ފޯރުކޮށްދޭންޖެހޭ ހިދުމަތްތައް މެނޭންޖްކުރަން މުއިއްޒު ގެންގުޅުއްވާ ވިސްނުންފުޅަކީ ނޫނީ ޕްލޭނަކީ ކޮބައިތޯ؟
ޝައްކެއް ނެތް ގޮތުގައި ހަމަ ތިން ތަން ވެސް ހިންގޭނެ އިނގޭތޯ. ހަމަ މީގަ ބޭނުންވަނީ އެކަމަށް އިހުލާސްތެރިކަމާ އެކީގައި، ރޭވުންތެރިކަމާ އެކީގައި މަސައްކަތް ކުރުން. އަދި ރަނގަޅު ޓީމެއް ގޮތުގައި ޓީމުގެ ބޭނުން ހިފައިގެން މަސައްކަތް ކުރުން. ތި ވިދާޅުވި ގޮތަށް ވިލިމާލޭގެ ހިދުމަތްތައް ވަރަށް ދަށް. ވިލިމާލެ އަކީ ހަގީގަތުގައި މާލޭގެ އެހެން އަވަށްތަކުގެ ފެންވަރަކަށް ޑިވެލޮޕް އެއް ނުވެ ހަގީގަތުގައި. ދެން ކޮންމެގޮތަކަސް އެތަނުގެ ކޮންސެޕްޓަކީ ވަރަށް ހިތްގައިމު ފެހި ރަށެއް ގޮތުގައި އޮތުން. އެހެން ނަމަވެސް އެ ތަނުގެ ހިދުމަތް ރަނގަޅުވާން ޖެހޭނެ. އެހެންވީމަ އެތަނުގަ ދޭ ހިދުމަތް މާލެއާ ކިތަންމެ ކައިރި ނަމަވެސް އެ ތަނުގައި ރަނގަޅަށް ހިދުމަތް ދެވެން ހުންނަންޖެހޭނެ. އެހެންވީމަ އެކަން އިރާދަކުރެއްވިއްޔާ ކުރަން އަޅުގަނޑުމެން އިސްނަގާނަން. ދެން ހަމަ ހައުސިން މައްސަލަ ވެސް އެތާ ހައްލުކުރަން ޖެހޭ.
އެއް ކަމަކަށް ސަރުކާރުގެ ސިޔާސަތު ބަދަލުކުރުމަށް އަޅުގަނޑު އެދޭނަން، ގަވާއިދު ބަދަލުކުރަން. އެއީ އިމާރާތްކުރުމުގެ ހުއްދަ މިހާތަނަށް މި ދެނީ 6 ބުރިއަށް އެތަނުގަ ހަދާ. އެހެންނަމަވެސް ވިލިމާލޭގަ މިހާރު އާއިލާތައް އިތުރުވަމުން އިތުރުވަމުން ގޮސް ގޭގޭގަ ކުދި ކުދި ކޮޓަރިކޮޓަރީގައި ބޮޑެތި އާއިލާ އުޅެމުން ގޮސް ވަރަށް ނިކަމެތިކޮށް ރައްޔިތުން އުޅެނީ. އެހެންވީމަ މި ރައްޔިތުންނަށް ވިލަމާލޭ ރައްޔިތުންނަށް އެބަ ޖެހޭ އެތަނުގަ ބޭންކުން ލޯނު ނަގައިގެންނާ އެކި ގޮތްގޮތުން އިމާރާތް ހެދޭނެ ގޮތެއްވާން. މިހާރު ބޭންކު ލޯނެއް ނުދޭ ފަސޭހަ ގޮތަކަށް 6 ބުރިއަށް ހަދާކަށެއް. އެހެންނަމަވެސް 10 ބުރިއަށް ހެދެންޏާ ބޭންކަށް ވެސް އޭގެ ފީސިބިލިޓީ އެބަ ފެނޭ. އެހެންވީމަ 10 ބުރިއަށް ހަދަން ފުރުސަތު ދިނީމާ އެބަ ލިބޭ ރައްޔިތުންނަށް ކޮންމެސް ކަހަލަ އުންމީދެއް އެ މީހެއްގެ އަމިއްލަ ގޭގައި ދިރިއުޅުމުގެ ހިތްފަސޭހަ ދިރިއުޅުމެއް އުޅެން. އެހެންވީމަ އެ ގަވާއިދަށް އެ ބަދަލުގެންނަން، ޕްލޭނިންގ ގަވާއިދަށް ބަދަލުގެންނަން އަޅުގަނޑު ހަމަ ހުށަހަޅާނަން ކައުންސިލްގެ ކަމެއްގެ ގޮތުގައި އިރާދަކުރެއްވިއްޔާ.
ދެން ދެ ވަނަ ކަމަކަށް ހައުސިން މަޝްރޫއުތައް ހިންގާނެ ބިންތައް ހަމަ ހުންނާނެ ވިލިމާލޭގަ ވެސް. ވިލިމާލެ ޕްލޭން ކުރުމުގައި ވެސް ކަން ދިމާކުރިގޮތުން އުޅެވުނު މީހެއް ވަރަށް ކުރީގައި، 2002 ހިސާބުގައި. އެހެންވީމަ، ވިލިމާލޭގެ ޕްލޭން، އޭރު އެތަން އާބާދު ކުރާކަށް ނުވެސް ފަށާ. ހުންނާނެ ހައުސިން މަޝްރޫއު ހިންގާނެ ޖާގަ. އެހެންވީމަ މާލޭގެ ބިމުގައި ހައުސިން މަޝްރޫއު ހިންގަން ހުށަހަޅާ ގޮތަށް ވިލިމާލޭގައި ވެސް އެ ހުރި ޖާގަ ތައް އެގޮތަށް ހުށަހަޅާނީ. އެހެން ނަމަވެސް މީގަ މުހިންމު ތަންކޮޅަކީ ވިލިމާލޭގަ ވަކިން ހާއްސަކޮށް އަދި މާލޭގަވެސް މި އިތުރު ކުރެވޭ ހައުސިން ޔުނިޓްތައް ވާންޖެހޭނީ މިހާރުވެސް މިދެތަނުގައި މި އުޅޭ ރައްޔިތުންގެ ތަންތަނަށޭ. އެހެން މީހުން އައިސް އާބާދު ކުރާ ތަން ތަނަށް ވެއްޖެއްޔާ މައްސަލަ ހައްލެއް ނުވޭ. އެހެންވީމަ އެގޮތަށް އެކަން ބައްޓަންކުރަން މަސައްކަތްކުރާނީ އިރާދަކުރެއްވިއްޔާ.
ދެން ހުޅުމާލެއަކީ ތިޔަ ވިދާޅުވި ގޮތަށް ސިޓީ ކައުންސިލްގެ މެންޑޭޓުގައި ގާނޫނީ ގޮތުން އޮންނަ ތަނެއް. އެހެންނަމަވެސް ހިދުމަތް ދެނީ އެޗްޑީސީން. ދެން އެއަށް ގެނެވޭނެ ހައްލެއް އޮތިއްޔާ އެ ހައްލެއް ގެންނަން މަސައްކަތް ކުރާނަމޭ. ދެން ދެމެހެއްޓެނިވި ހައްލެއް ގެންނަންޖެހޭނީ. މިސާލަކަށް އެޗްޑީސީން މިހާރު އެކަން ކުރަނީ އެއީ ކުންފުންޏަކަށް ވާތީ، ކުންފުންޏަށް އާމްދަނީ ލިބޭނެގޮތެއް ހޯދާފަ ގެއްލުން ނުވާ ގޮތަށް އެމީހުން އެކަން ކުރާނީ ދެއްތޯ. ސިޓީ ކައުންސިލަށް މިސާލަކަށް ޒިންމާ ހަވާލުކޮށްފިއްޔާ އަޅުގަނޑުގެ ވިސްނުމަކީ އެތަނުން އާމްދަނީ ސިޓީ ކައުންސިލަށް ލިބޭނެ މަގެއް ވެސް ފަހިވެގެންނޭ އެ ތަނުގެ މަސައްކަތާ ހަވާލުވާން ޖެހޭނީ. އެހެންވީމަ އެކަހަލަ ވިސްނުމެއްގަ އިރާދަކުރެއްވިއްޔާ މަސައްކަތް ކުރާނީ.
