ވެންޓިލޭޓަރުތަކުގެ މައްސަލާގެ ތަހުގީގު ގޮސްފައިވާ ގޮތާމެދު ހިތްހަމަނުޖެހޭތީ، އެންޓި ކޮރަޕްޝަން ކޮމިޝަން (އޭސީސީ)ގެ ރައީސް މަރިޔަމް ޝިއުނާގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ވެއްދުމަށް ކުރި މަސައްކަތް ނާކާމިޔާބު ވެއްޖެ އެވެ.
ކޮވިޑްގެ އެންމެ ގޯސް ހާލަތަށް ތައްޔާރުވުމަށް ސަރުކާރުން ހޯދަން އުޅުނު ވެންޓިލޭޓަރުތަކުގެ މައްސަލާގައި އިހުމާލުވި މީހުންނަށް ދައުވާ ކުރެވެން ނެތް ކަމަށް ޕްރޮސިކިއުޓާ ޖެނަރަލް ހުސެއިން ޝަމީމް ނިންމަވާފައިވާތީ، މަޝްރަހު ވަނީ ހޫނުވެފަ އެވެ. އެކަމުގެ ހޫނުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ޝަމީމާއި ޝިއުނާގެ އިތުބާރު ނެތް ކަމުގެ މައްސަލަ ވެއްދުމަށް ފެންނަ ކަމަށް ވިދާޅުވެފަ އެވެ. އެކަމަށް އެމްޑީޕީގެ ބައެއް މެންބަރުން ތާއިދު ކުރައްވާފައިވެ އެވެ.
އެމްޑީޕީގެ ޕީޖީ ގްރޫޕެއް އެކަމާ ގުޅޭ ގޮތުން ބޭއްވި އެވެ. އެ ބައްދަލުވުމުގައި ޝިއުނާގެ އިތުބާރު ނެތް ކަމުގެ މައްސަލަ ހުށަހެޅުމާމެދު ވޯޓަށް ދިޔައިރު ޝަމީމްގެ ވާހަކައެއް ނެތެވެ.
ޝިއުނާގެ އިތުބާރު ނެތް ކަމުގެ މައްސަލަ ވެއްދުމަށް ހުށަހެޅުއްވީ އުނގޫފާރު ދާއިރާގެ މެމްބަރު މުހައްމަދު ވަހީދެވެ. އޭނާގެ އެ ހުށަހެޅުއްވި ހުށަހެޅުމަށް 13 ވޯޓު ލިބުމުގެ ސަބަބުން އެކަން އެގޮތަށް ކުރެވޭ ގޮތެއް ނުވި އެވެ.
އެކަމާ ގުޅޭ ގޮތުން ވާހަކަ ދައްކަވަމުން ޝިއުނާ ވިދާޅުވެފައިވަނީ، މައްސަލައެއް ނިމޭ ގޮތަކުން ކޮންމެ ފަހަރަކު އިތުބާރު ނެތް ކަމުގެ މައްސަލަ ވެއްދުމުގެ ވާހަކަ ފެންމަތިވާނަމަ މިނިވަންކަމާއެކު މަސައްކަތް ކުރުމުގެ މާހައުލު ގެއްލިގެންދާނެ ކަމަށެވެ. ވެންޓިލޭޓަރުތަކުގެ މައްސަލަ އޭސީސީއިން ދޫނުކުރާނެ ކަމަށާއި އޭގައި ޒިންމާވާ މީހުންނަށް ފިޔަވަޅު އެޅުމުގައި ކާމިޔާބު ހޯދުމަށް މަސައްކަތް ކުރައްވާނެ ކަމަށް ވަނީ ވިދާޅުވެފަ އެވެ.
ވެންޓިލޭޓަރުތަކުގެ މައްސަލާގައި ދައުވާ ކުރެވެން ނެތްކަން ޕީޖީ ޝަމީމް ވަނީ ދެވަނަ ފަހަރަށް އޭސީސީއަށް އަންގާފަ އެވެ. ނަމަވެސް އޭސީސީއިން އަނެއްކާވެސް ވަނީ މައްސަލަ ރިވިއު ކުރުމަށް އެދިފަ އެވެ. އެ ހުށަހެޅުމާ ގުޅޭ ގޮތުން ޕީޖީ އަދި ގޮތެއް ނުނިންމަވަ އެވެ. ނަމަވެސް އެ މައްސަލައާ ގުޅިގެން އިސްތިއުފާ ދެއްވަން ޖެހިއްޖެނަމަ އެކަން ވެސް ކުރައްވާނެ ކަމަށް ޝަމީމް ވަނީ ވިދާޅުވެފަ އެވެ.
ޝަމީމްގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމަށް އިދިކޮޅު، ޕީޕީއެމް/ޕީއެންސީ ކޯލިޝަނުން ވަނީ ނިންމާފަ އެވެ. މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ ވެންޓިލޭޓަރުތަކުގެ މައްސަލާގައި ބޮޑު ހިޔާނާތެއް ހިންގާފައިވާއިރު އެކަމުގައި ޒިންމާވާނެ މީހަކު ނެތުމަކީ ސީރިއަސް ކަމެއް ކަމަށެވެ. އެހެންވެ، ޝަމީމްގެ އިތުބާރު ނެތް ކަމުގެ މައްސަލަ ވެއްދުމަށް ނިންމާފައިވާ ކަމަށެވެ.
ޝަރީފް ވިދާޅުވި ގޮތުގައި ވެންޓިލޭޓަރުތަކުގެ މައްސަލަ ބެލުމަށް އެމްޑީޕީގެ ގިނަ މެންބަރުން ވެސް ބޭނުންވާއިރު ޝަމީމްގެ އިތުބާރު ނެތް ކަމަށް އެ މެންބަރުންގެ ތާއިދު ލިބޭނެ ކަމަށް ގަބޫލު ކުރައްވާ ކަމަށެވެ. މައްސަލަ ވީއެންމެ އަވަހަކަަށް ހުށަހެޅުމުގެ ގޮތުން މާދަމާ މަޖިލީހަށް އިތުބާރު ނެތް ކަމުގެ ޕެޓިޝަން ވައްދާނެކަން އާދަމް ޝަރީފް ފާހަގަ ކުރެއްވި އެވެ.
