މިއުނިކް (މެއި 7) - ޔުއެފާ ޗެމްޕިއަންސް ލީގުގެ ފައިނަލުގަައި އާސެނަލާ ދެކޮޅަށް ކުޅޭ މެޗު ވެގެންދާނީ ޕީއެސްޖީ އަށް އުނދަގޫ އިމްތިހާނަކަށް ކަމަށް އެ ޓީމުގެ ކޯޗު ލުއިސް އެންރީކޭ ބުނެފި އެވެ.
ރޭ ބަޔާން މިއުނިކް ދަނޑުގައި އެއްވަރުކޮށް، އެ ޓީމު ކަޓުވާލުމަށް ފަހު، ޗެމްޕިއަންސް ލީގުގެ އެންމެ ފަހުގެ ޗެމްޕިއަން، ޕީއެސްޖީން މި ފަަހަރުގެ މުބާރާތުގެ ފައިނަލަށް ދަތުރުކޮށްފި އެވެ. މިދިޔަ ހަފްތާގައި ޕީއެސްޖީ ދަނޑުގައި 5-4 އިން މޮޅުވިއިރު، މިރޭ ބަޔާން ދަނޑުގައި 1-1 އިން އެއްވަރުވެ، ޕީއެސްޖީން ކުރިހޯދީ 6-5 ގެ އެގްރިގޭޓުންނެވެ.
ބަޔާން ކަޓުވާލައި ޗެމްޕިއަންސް ލީގުގެ އެންމެ ފަހުގެ ޗެމްޕިއަން ޕީއެސްޖީ ފައިނަލަށް
ބަޔާން މިއުނިކް ދަނޑުގައި އެއްވަރުކޮށް، އެ ޓީމު ކަޓުވާލުމަށް ފަހު، ޗެމްޕިއަންސް ލީގުގެ އެންމެ ފަހުގެ ޗެމްޕިއަން، ޕީއެސްޖީން މި ފަަހަރުގެ މުބާރާތުގެ ފައިނަލަށް ވަނީ ދަތުރުކޮށްފައި، މިދިޔަ ހަފްތާގައި ޕީއެސްޖީން އަމިއްލަ ދަނޑުގައި 5-4 އިން މޮޅުވިއިރު، މިރޭ ބަޔާން ދަނޑުގައި 1-1 އިން ވީ އެއްވަރު، ޕީއެސްޖީން ކުރިހޯދީ 6-5 ގެ އެގްރިގޭޓުން.
މިދިޔަ އަހަރުގެ ފައިނަލުގައި އިންޓަ މިލާން 5-0 އިން ބަލިކޮށް ޗެމްޕިއަންސް ލީގުގެ ތަށި ފުރަތަމަ ފަހަރަށް އުފުލާލި ޕީއެސްޖީން މި ފަހަރުގެ މުބާރާތުގައި ތަށި ދިފާއުކުރަން ފައިނަލުގައި ކުޅޭނީ މި މަހު 30 ވަނަ ދުވަހު އާސެނަލާ އެެވެ.
މި ފަަހަރުގެ ފައިނަލަށް އާސެނަލް ދަތުރުކުރީ މެޗަކުން ބަލިނުވެ އެވެ. އާސެނަލް، ޗެމްޕިއަންސް ލީގުގައި އެންމެ ފަހުން ބަލިވީ ޕީއެސްޖީ އަތުން މިދިޔަ އަހަރުގެ މުބާރާތުގެ ސެމީ ފައިނަލުގަ އެވެ.
ކުރިން ބާސެލޯނާއާ އެކު ވެސް ޗެމްޕިއަންސް ލީގު ކާމިޔާބުކުރި އެންރީކޭ ބުނީ، ޔަގީނުން ވެސް ފަސޭހަ މެޗަކަށް ފައިނަލް ނުވާނެ ކަމަށެވެ.
"ވަރަށް އުނދަގޫ އިމްތިހާނަކަށްވާނީ. ވަރަށް އުނދަގޫކޮށް ކުޅެން ޖެހޭ މެޗަކަށްވާނެ. އެކަމަކު، އަހަރެމެންނަށް އޮތް އިތުބާރަކީ ޕީއެސްޖީން މި ކުޅޭ ފުޓްބޯޅަ." އެންރީކޭ ބުންޏެވެ.
އާސެނަލްގެ ކޯޗު މިކޭލް އާޓެޓާ އާއި އެންރީކޭ ވަނީ 1990 ގެ އަހަރުތަކުގައި ކުުޅުމުގެ ކެރިއަރުގައި އެކުގައި ބާސެލޯނާގައި ހޭދަކޮށްފަ އެވެ. އެންރީކޭ ވަނީ އާސެނަލްގައި އާޓެޓާ ކުރަމުން އަންނަ ކޯޗިންގެ މަސައްކަތަށް ތައުރީފުކޮށްފަ އެވެ.
"އަހަރެން މިކެލީޓޯ (އާޓެޓާ) ވަރަށް ބަަލައިގަންނަން. ކުޑައިރު އަހަރެމެންނަކީ އެކުގައި ކުޅުނު ކުޅުންތެރިން. ދެން، ކޯޗިން އަށް ބަލާއިރު، އޭނަ (އާޓެޓާ) އެ އަންނަނީ އާސެނަލްގައި ވަރަށް ރަނގަޅު މަސައްކަތެއް ކުރަމުން،" އެންރީކޭ ބުންޏެވެ.
މިދިޔަ ސީޒަނުގެ ޗެމްޕިއަންސް ލީގުގެ ލީގު ބުރުގައި އާސެނަލުން 2-0 އިން ޕީއެސްޖީ ބަލިކުރި އެވެ. އެކަމަކު، ސެމީ ފައިނަލުގައި ދެ ލެގުގައި ވެސް މޮޅުވީ ޕީއެސްޖީ އެވެ. އެ ގޮތުން، އާސެނަލް ދަނޑުގައި 1-0 އިން ފުރަތަމަ ލެގުގައި ޕީއެސްޖީން މޮޅުވިއިރު، ދެ ވަނަ ލެގުގައި ޕީއެސްޖީ ދަނޑުގައި އެ ޓީމު މޮޅުވީ 2-1 އިންނެވެ. އަނެއްކޮޅުން، އިނގިރޭސި ޓީމުތަކާ ދެކޮޅަށް މިދިޔަ ތިން ސީޒަނަށް ބަލާއިރު، ޗެމްޕިއަންސް ލީގުގައި ޕީއެސްޖީގެ ރެކޯޑް ރަނގަޅެވެ.
އާސެނަލުން އެ ކްލަބްގެ ތާރީހުގައި ދެ ވަނަ ފަހަރަށް ޗެމްޕިއަންސް ލީގުގެ ފައިނަލުގައި ކުޅޭއިރު، މިއީ، ޕީއެސްޖީން ކުޅޭ ތިން ވަނަ ފައިނަލެވެ.
ޗެމްޕިއަންސް ލީގުގެ މި ފަހަރުގެ ފައިނަލް މެޗު ކުޅޭނީ ހަންގޭރީގެ ބުޑަޕެސްޓުގެ މަޝްހޫރު ސްޓޭޑިއަމް، ޕުސްކަސް އެރީނާގަ އެވެ.
