ލަންޑަން (މެއި 5) - ޔުއެފާ ޗެމްޕިއަންސް ލީގުގެ ސެމީ ފައިނަލް ދެ ވަނަ ލެގުގައި މިރޭ އެތުލެޓިކޯ މެޑްރިޑާ ދެކޮޅަށް ކުޅޭ މެޗުގައި އާދަޔާހިލާފު ކަމެއް އާސެނަލަށް ހާސިލްކުރެވޭނެ ކަމުގެ އުންމީދު އެބައޮތް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
މިިދިޔަ ހަފްތާގައި އެތުލެޓިކޯ ދަނޑުގައި ކުޅުނު ފުރަތަމަ ލެގުގެ މެޗު ނިމުނީ 1-1 އިން އެއްވަރުވެގެންނެވެ. އެހެންކަމުން، މިރޭ އާސެނަލް ދަނޑުގައި ކުޅޭ ދެ ވަަނަ ލެގުގެ މެޗުން މޮޅުވާ ޓީމަކަށް ފައިނަލުގެ ޖާގަ ލިބޭނެ އެވެ.
މިއީ، ޗެމްޕިއަންސް ލީގުގެ ސެމީ ފައިނަލުގައި އާސެނަލުން ވާދަކުރާ ހަތަރު ވަނަ ފަހަރެވެ. އާސެނަލުން މިދިޔަ އަހަރުގެ ސެމީ ފައިނަލުގައި ކުޅުނީ 2009 ވަނަ އަހަރުގެ ފަހުން ފުރަތަމަ ފަހަރަށެެވެ. ސޯޅަ އަހަރުގެ މެދުކެނޑުމަކަށް ފަހު އެވެ. އޭގެ ކުރިން، އާސެނަލުން 2006 ވަނަ އަހަރުގެ ޗެމްޕިއަންސް ލީގުގެ ފައިނަލަށް ވެސް ދަތުރުކޮށް، ފައިނަލުގައި ބާސެލޯނާ އަތުން ބަލިވީ އެވެ. އަނެއްކޮޅުން، މި ފަހަރަކީ، އާސެނަލްގެ ތާރީހުގައި ވެސް އެ ޓީމުން ޗެމްޕިއަންސް ލީގު ސެމީ ފައިނަލުގައި ޖެހިޖެހިގެން ދެ އަހަރުގައި ކުޅޭ ފުރަތަމަ ފަަހަރެވެ.
މިރޭގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އާޓެޓާ ބުނީ، ޓީމުން އޮތީ ސެމީ ފައިނަލް ދެ ވަނަ ލެގަށް ވަރަށް ފުރިހަަމަ އަށް ތައްޔާރުވެފައި ކަމަށެވެ. އަދި، އާސެނަލްގައި މިހާރު އޮތް ޓީމުން އެކުގައި ގިނަ މަސައްކަތްތަކެއް ކޮށްފި ކަމަށާއި މި ވަރުގެ ބޮޑު މެޗަކަށް ނުކުންނައިރު، ޓީމު ފެންނަނީ. ވަރަށް އެއްބަައިވަންތަކޮށް ކަަމަށް އާޓެޓާ ވަނީ ބުނެފަ އެވެ.
"މި ކަހަލަ ރެޔަކަށް އިންތިޒާރުކުރާތާ އެތައް ޒަމާނެއް ވެއްޖެ، އުންމީދަކީ އާދަޔާހިލާފު ކަމެއް ހާސިލްކުރުން،" އާޓެޓާ ބުންޏެވެ.
އިނގިރޭސި ޕްރިމިއާ ލީގުގައި ފުލަމް އަތުން އާސެނަލް 3-0 އިން މޮޅުވި، މެޗުގައި އަނިޔާގެ ސަބަބުން ކައި ހަވާޓްޒް އާއި މާޓިން އޮޑެގާޑް ކުޅެފައިނުވެ އެވެ. އެކަމަކު، އާޓެޓާ ބުނީ، އެތުލެޓިކޯއާ ދެކޮޅަށް ކުޅޭ މެޗަށް އެ ދެ ކުޅުންތެރިން ވެސް ފިޓް ކަމަށެެވެ.
މި ފަހަރުގެ ޗެމްޕިއަންސް ލީގުގެ ލީގު ބުރުގައި އާސެނަލް ދަނޑުގައި އެ ޓީމު އަތުން އެތުލެޓިކޯ ވަނީ 4-0 އިން ބަލިވެފަ އެވެ. އެތުލެޓިކޯގެ ކޯޗު، ޑިއޭގޯ ސިމިއޯނީ ބުނީ، ކުރިން ކުޅުނު މެޗު ކުޅުނު ހާލަތާއި މިހާރު އެ ޓީމު ކުޅެމުން އަންނަ ލެވަލް ތަފާތު ކަމަށެވެ.
"އޮކްޓޫބަރު މަހަށް ވުރެން މިހާރު އަހަރެމެން މި ތިބީ މާ ރަނގަޅަށް. މި ފަަހަރު ތިބޭ ހޮޓާ ވެސް ތަންކޮޅެއް އަގުހެޔޮ، އެއީ ވެސް ރަނގަޅު ބަދަލެއް،" ސަމާސާ ގޮތަކަށް ސިމިއޯނީ ބުންޏެވެ.
ފުރަތަަމަ ލެގުގައި އަނިޔާވެގެން ބަދަލުކުރި، އެތުލެޓިކޯގެ އާޖެންޓީނާގެ ފޯވާޑް، ޖޫލިއަން އަލްވަރޭޒަށް މިރޭ އާސެނަލާ ދެކޮޅަށް ކުޅޭ މެޗުގައި ކުޅެވޭނެ ކަމަށް ސިިމިއޯނީ ވަނީ ބުނެފަ އެވެ. އަދި، މި ސީޒަނުގައި 48 މެޗުން 20 ލަނޑު ޖަހައި، ނުވަ ލަނޑު ޖަހަން، ފުރުސަތު ތަނަވަސްކޮށްދިން އަލްވަރޭޒަކީ އިނގިރޭސި ފުޓްބޯޅަ ދަންނަ ކުޅުންތެރިއަކަށް ވުމުން އޭގެ ފައިދާނެގޭނެ ކަމަށް އާޓެޓާ ގަބޫލުކުރެ އެވެ.
