ކްލަބް އެމްޓީސީސީގެ މައްޗަށް ކުރިހޯދައި ކްލަބް ވެމްކޯ އިން ޖެހިޖެހިގެން ފަސް ވަނަ ފަހަރަށް ގައުމީ ވޮލީބޯޅަ މުބާރާތުގެ އަންހެން ޑިވިޝަނުގެ ތަށި އުފުލައިފި އެވެ.
މި ފަހަރުގެ ގައުމީ ލީގުގެ ޗެމްޕިއަންކަމާއި ގައުމީ މުބާރާތުގެ ޗެމްޕިއަންކަން ވެމްކޯ އިން ހޯދީ ކުޅުނު ހުރިހާ މެޗަކުން މޮޅުވެގެންނެވެ. ރޭގެ ފައިނަލުގައި ވެމްކޯ އިން ވަނީ 3-1 ސެޓުން، ކްލަބް އެމްޓީސީސީ ބަލިކޮށްފަ އެވެ. ވެމްކޯ އިން ފައިނަލަށް ދަތުރުުކުރީ ވެސް ސެމީގައި އެމްޓީސީސީ ބަލިކޮށްފަ އެވެ.
ޒުވާނުންގެ މަރުކަޒު އެތެރެ ކޯޓުގަައި ރޭ ކުޅުނު މެޗުގައި ވެމްކޯ އިން ފުރަތަމަ ދެ ސެޓު، 25-22، 25-16 އިން ގެންގޮސް މެޗުގެ ކޮންޓްރޯލް ނެގުމަށް މުހިންމު ފިޔަވަޅެއް ކުރިއަށް އެޅި އެވެ. އެކަމަކު، ސީދާ ތިން ސެޓުން ފައިނަލް މެޗު ކާމިޔާބުކުރަން ވެމްކޯ އިން ކުރި މަސައްކަތް ކާމިޔާބުނުވީ، އެމްޓީސީސީން ތިން ވަނަ ސެޓުގެ ފަހުކޮޅުގައި ހިތްވަރު ދައްކައި، 24-26 އިން މި ސެޓު ގެންދިއުމުންނެވެ.
އެކަމަކު، ހަތަރު ވަނަ ސެޓު، 25-15 އިން ގެންގޮސް ވެމްކޯ އިން ވަނީ މުބާރާތުގެ ޗެމްޕިއަންކަން ހޯދައިފަ އެވެ.
އެންމެ މޮޅު ކުޅުންތެރިންގެ މަގާމު ލިބުނީ، ވެމްކޯގެ ޖޫޒާން ޒަރީރު، ނަރީމާ އިދުރީސް (ނަންނި)ގެ އިތުރުން، އެމްޓީސީސީގެ މާޔާ ހުސެއިން ސޮލާހު އަށެވެ. އެންމެ މޮޅު ބިދޭސީ ކުޅުންތެރިޔާގެ މަގާމު އެމްޓީސީސީގެ ޑޭވިސް ޓޯމް ފެނާންޑާ އާއި ވެމްކޯގެ ވަރަންޏާ ސްރިލައޫން އަދި ކުތިކާ ކައެވްޕިން އަށް ވަނީ ލިބިފަ އެވެ. އަދި، އެންމެ އުންމީީދީ ކުޅުންތެރިއަކަަށް އެމްޓީސީސީގެ އައިމިނަތު ފަރާހަތު ވަނީ ހޮވިފަ އެވެ.
މުބާރާތުގެ އެންމެ މޮޅު ކޯޗަކީ ވެމްކޯގެ އަހުމަދު އަދީލް (ބޭބެ) އެވެ.
ގައުމީ މުބާރާތުގެ ތިން ވަނަ އަށް ދިޔައީ ހުރާ ކޮމިއުނިޓީ ކްލަބް އެވެ. އަދި، ހަތަރު ވަނަ ހޯދީ ޕޮލިސް އެވެ.
ވެމްކޯ އިން މި ސީޒަނުގެ ތިން މުބާރާތުގެ ތަށި ވެސް ހޯދިއިރު، އެ ޓީމުން ވަނީ ހަ އަހަރު ތެރޭ 13 ތަށި އަންހެން ވޮލީގައި ހޯދައިފަ އެވެ. އެސޯސިއޭޝަން ކަޕް ހަ ފަހަރު، ލީގު ދެ ފަހަރު އަދި ގައުމީ މުބާރާތް ފަސް ފަހަރެވެ.
