ރާއްޖޭގައި ބާއްވާ ކައިޓް ސާފިންގްގެ އެންމެ ބޮޑު މުބާރާތް "ރެޑްބުލް ވިންޑް ރައިޑާސް" އަންނަ މަހު ބ. ގޮއިދޫ ގައި ބާއްވަން ނިންމާ, މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.
މި މުބާރާތް ކުރިއަށްދާނީ ދެ ބަޔަކަށް ބަހާލައިގެންނެވެ. އެއީ ޓްވިން - ޓިޕް ރޭސިން އަދި ފްރީސްޓައިލް ބަޔެވެ.
މި މުބާރާތުގައި ރެޑްބުލް އެތުލީޓެއް ކަމަށްވާ ލުކާ ޕިޓާލް ވެސް ބައިވެރިވާނެ އެވެ. އަދި ލުކާ ޕިޓާލް އާއެކު ވިންޑް ސާފް ކުރުމުގެ ފުރުސަތު އެތުލީޓުންނަށް ލިބިގެންދާނެ އެވެ.
ރެޑްބުލް ވިންޑް ރައިޑާސް އެންމެ ފުރަތަމަ ބޭއްވީ 2022 ވަނަ އަހަރު ބ. ގޮއިދޫ ގަ އެވެ. މިއީ ރާއްޖޭގެ ކައިޓް ސާފަރުންނަށް އެ އެތުލީޓުންގެ ހުނަރު ދައްކާލުމަށް ލިބޭ ފަހި ފުރުސަތެކެވެ.
މި މުބާރާތުގެ އެންމެ ފަހުގެ ދެ މުބާރާތުގެ ޗެމްޕިއަންކަން ހޯދީ ބ. ގޮއިދޫގެ ހުނަރުވެރި ކައިޓް ސާފާ, ހަސަން މާހިރު, 18, އެވެ.
ރެޑް ބުލް އިން ވަނީ މި އަހަރު ފޯ ޓު ސްކޯ ނަމުގައި މުބާރާތެއް ބާއްވާފަ އެވެ. އެ މުބާރާތުގެ ޗެމްޕިއަންކަން ހޯދީ ދި ފުޓްސަލް ޓައުން (ޓީއެފްޓީ) އެވެ. އެއާއެކު, ޓީއެފްޓީ އަށް މި އަހަރު ޖަރުމަނުގައި ކުރިއަށްދާ މުބާރާތުން ފުރުސަތު ވަނީ ލިބިފަ އެވެ.
