މިދިޔަ ސަރުކާރުގެ ދުވަސްވަރު އިކޮނޮމިކް ކައުންސިލުން ދިން ލަފަޔަކާ ގުޅިގެން ތިމާވެށްޓާ ބެހޭ ކުރީގެ މިނިސްޓަރު، އާމިނަތު ޝައުނާ އެންޓި ކޮރަޕްޝަން ކޮމިޝަނަށް ހާޒިރުކޮށްފި އެވެ.
އެކްސްގައި ޝައުނާ ކުރެއްވި ޕޯސްޓެއްގައި ވިދާޅުވީ އިކޮނޮމިކް ކައުންސިލުން ދިން ލަފަޔަކާ ގުޅިގެން އޭސީސީއަށް ހާޒިރު ކޮށްފައިވާ ކަމަށެވެ. ނަމަވެސް، އޭނާގެ މިނިސްޓަރުކަމުގައި ދިވެހިރާއްޖޭގެ ގާނޫނުއަސާސީ އާއި ގާނޫނުތަކާ ހިލާފު އެއްވެސް ކަމެއް ކޮށްފައި ނުވާނެ ކަމަށް ޝައުނާ ވިދާޅުވި އެވެ.
"އަޅުގަނޑާ އިއްޔެ ސުވާލުކުރީ އިކޮނޮމިކް ކައުންސިލްގެ ލަފަޔަކާ ގުޅޭގޮތުން،" އެކަމާ ބެހޭގޮތުން އިތުރު މައުލޫމާތު ހޯދުމަށް އަދަދު އިން ސުވާލުކުރުމުން ޝައުނާ ވިދާޅުވި އެވެ.
އެނގިފައިވާ ގޮތުގައި އޭސީސީން ތަހުުގީގު ކުރަމުން ދަނީ ބަދަލު ދިނުމުގެ މައްސަލައެއްގައި އިކޮނޮމިކް ކައުންސިލުން ދިން ލަފައެއްގެ މައްސަލަ އެވެ.
ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ނަމުގައި އުސޫލެއް އެކުލަވައިލީ ނޮވެމްބަރު 28، 2022 ގަ އެވެ.
އެ އުސޫލުގެ ދަށުން ބަދަލު ދިނީ އެކަމަކާ ގުޅޭ އިދާރާއަކުން އެކަން ތަހުގީގު ކުރުމަށްފަހު، ސެޓްލްމެންޓް ކޮމިޓީއަށް ފޮނުވުމުން އެ ކޮމިޓީން ދިރާސާ ކުރުމަށްފަހު އިކޮނޮމިކް ކައުންސިލަށް ހުށަހެޅުމުން އެ ކައުންސިލުން ދޭ ލަފަޔަކާ ބެހޭގޮތުން ކެބިނެޓުގައި މަޝްވަރާ ކުރުމަށްފަހު އެވެ.
އޭސީސީން ތަހުގީގު ކުރަމުން ދަނީ ސީދާ ކޮން މައްސަލައެއްކަމެއް އަދި އެ ކޮމިޝަނުން ހާމައެއް ނުކުރެ އެވެ. ނަމަވެސް، އެއީ ބަދަލު ދިނުމުގެ މައްސަލައެއް ކަމަށް ވާތީ، ސެޓްލެމެންޓް ކޮމިޓީ އާއި އިކޮނޮމިކް ކައުންސިލުގެ އިތުރުން ކެބިނެޓުގައި ތިއްބެވި ވަޒީރުން ވެސް އޭސީސީއަށް ހާޒިރު ކުރާނެ ކަމަށް ބެލެވެ އެވެ.
