ކޮންމެ ދެ ދުވަހަކުން އެއް ދުވަހު ކަހަލަ ގޮތަކަށް ލޭ ހަދިޔާ ކުރުމުގެ ކޭމްޕްތައް ބާއްވައިގެންވެސް ޑިމާންޑާ އެއްވަރަށް އަދިވެސް ލޭ ނުލިބޭ ކަމަށް މޯލްޑިވިއަން ބްލަޑް ސާވިސަސް އިން ބުނެފި އެވެ.
މޯލްޑިވިއަން ބްލަޑް ސާވިސަސްގެ ޑިރެކްޓާ ޖެނެރަލް، އަހްމީމް ފާރިޝް އަދަދު އަށް ވިދާޅުވީ ނެޝަނަލް ބްލަޑް ސަޕްލައި އެމަޖެންސީއެއް ނެރުނު ފަހުން ކޮންމެވެސް ވަރަކަށް ޑޯނަރުން ލިބުނު ނަމަވެސް، ޑިމާންޑާ އެއްވަރަށް އަދިވެސް ލޭ ނުލިބޭ ކަމަށެވެ.
"މިހާރު އިއުލާން ޕޯސްޓުކުރަން ފެށި ފަހުން ވޮލަންޓިއާ ޑޯނާޒްއިންނާއި، ސަރުކާރުގެ މުއައްސަސާތަކާއި، އަމިއްލަ ފަރާތްތަކާއި ކުންފުނިތަކާއި، ޖަމިއްޔާ ޖަމާއަތްތަކުން ލޭ ދިނުމަށް ކޮންމެ ދެ ދުވަހަކުން އެއް ދުވަހަކު ކޭމްޕެއް އެބަ އޮވޭ،" އޭނާ ވިދާޅުވި އެވެ.
އަހްމީމް ވިދާޅުވީ ޑިމާންޑާ އެއްވަރަށް ލޭ ހޯދުމަށް އުނދަގޫތައް ދިމާވެގެން އުޅެނީ މިދުވަސްކޮޅު ބަލިވެ އުޅޭ މީހުންނާއި ކެންސަލްވާ މީހުން ވެސް ގިނަވުމުގެ ސަބަބުން ކަމަށެވެ. އޭނާ ވިދާޅުވީ ކުރިން ވެސް ދަތިތަކެއް ހުރި ކަމަށާއި ބޮޑަށް ދަތިތައް ދިމާވީ ސްކޫލް ބަންދާ ދިމާކޮށް ކަމަށެވެ.
"މިހާރު ކޮންމެވެސް ވަރަކަށް ރަނގަޅު އެކަމަކުވެސް ޑިމާންޑާ އެއްވަރަށް ކެޗްވުމަކީ ވަރަށް އުނދަގޫ ކަމެއް. ސަބަބަކީ މިދުވަސްކޮޅު ރޯނގާ ޖެހިފައި ތިބި މީހުންނާއި ކެންސަލްވާ މީހުން ތަންކޮޅެއް ގިނައީ. އައިސްފަވެސް ކްރައިޓީރިއާއަށް ފިޓްނުވުން އެކަހަލަ ކަންކަން އެބަ ހުރޭ." އޭނާ ވިދާޅުވި އެވެ.
ޑައިރެކްޓް ޑޯނާސްގެ އިތުރުން އެންމެ ގިނައިން ލޭ ލިބެނީ ރިސޯޓުތަކުގައި ބާއްވާ ކޭމްޕްތަކުން ކަމަށްވާއިރު، އަހްމީމް ވިދާޅުވީ ސްކޫލް ބަންދާއި ރިސޯޓުތަކުގެ އޮކިއުޕަންސީ މަތިވި ދުވަސްވަރާ ދިމާވުމުން ރިސޯޓުތަކުގައި ވެސް ކޭމްޕތައް ދިޔައީ ނުބޭއްވި ކަމަށެވެ.
އާންމު ގޮތެއްގައި ދުވާލަކު 220 އާއި 250 ޕޮއިންޓްގެ ލޭ ލިބޭއިރު، އޭގެއިން ދެބައިކުޅަ އެއްބައި ވެސް ގިނަ ފަހަރަށް ނުލިބޭކަން އަހްމީމް ފާހަގަކުރެއްވި އެވެ. އޭނާ ވިދާޅުވީ ލޭ އާންމުކޮށް ލިބެނީ ތެލެސީމިއާ ކުދިން ގުޅިފައި ތިބޭ ޑޯނަރުން މެދުވެރިކޮށް ކަމަށެވެ.
ލޭ ހަދިޔާ ކުރުމުގެ މައިގަނޑު ޝަރުތުތައް:
- 18 އަހަރު ފުރިފައިވުން
- ބަރުދަނުގައި 45 ކިލޯ ހަމަވުން
- ޖިސްމާނީ ގޮތުން އަދި ނަފުސާނީ ގޮތުން ދުޅަހެޔޮވުން
- ގައިންގަޔަށް އަރާ ބައްޔެއް ޖެހިފައި ނެތުން
- އެންމެ ފަހުން ލޭ ހަދިޔާ ކުރިތާ ތިން މަސްދުވަސް ފާއިތުވެފައިވުން
ލޭ މަދުވެ، އެމަޖެންސީ ހާލަތެއް އިއުލާންކުރީ އިމަޖެންސީކޮށް ލޭ ބޭނުންވާ މީހުންނާއި ވިހެއުމުގެ ތެރޭގައި ލޭ ބޭނުންވާ މީހުންނާއި ކެންސަރުގެ ފަދަ ބަލިތަކުގައި ލޭ ބޭނުންވާ މީހުންނާއި ގަވާއިދުން ލޭ އަޅަންޖެހޭ މީހުންނަށް ބޭނުންވާ މިންވަރަށް ލޭ ނެތުމުންނެވެ.
