ސިވިލް ސާވިސްގައި މަސައްކަތް ކުރާ މުވައްޒަފުންގެ މުސާރަތައް އެއްހަމަކުރުމަށް ޕޭ ފްރޭމްވޯކަށް ޕޭ ކޮމިޝަނުން ގެނައި ބަދަލުގެ ސަބަބުން ލީގަލް އޮފިސަރުންގެ މުސާރަ ކުޑަވި މައްސަލަ ނެޝަނަލް ޕޭ ކޮމިޝަނަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވައިފި އެވެ.
ކުޑޫ ހުށަހެޅުއްވި މައްސަލައިގައި ވިދާޅުވީ ސިވިލް ސާވިސްގެ އިދާރާތަކާއި ލޯކަލް ކައުންސިލްތަކުގެ ލީގަލް އޮފިސަރުންނަށް ލިބެންދިޔަ މުސާރައާއި އިނާޔަތްތައް ގެނައި ބަދަލުތަކާއެކު ނޮވެމްބަރު 1، 2025، ގެ ފަހުން ކުޑަވެފައިވުމުގެ ޝަކުވާ އެ މުވައްޒަފުން އޭނާއާ ހިއްސާކޮށްފައިވާ ކަމަށެވެ.
މިގޮތުން ނޮވެމްބަރު 1، 2025، ގެ ކުރިން މުސާރަ އާއި އިނާޔަތުގެ ގޮތުގައި އިތުރުގަޑީގެ ފައިސާ ނުލައި އަދި ޕެންޝަނަށް ކެނޑުމަށްފަހު މަހަކު 18،465ރ. ގެޔަށް ގެންދަން ލިބޭއިރު، އެ ތާރީހަށްފަހު ލިބޭ މުސާރައާއި އިނާޔަތްތައް ކުޑަވެގެން ގޮސްފައިވާކަން ކުޑޫ ފާހަގަކުރެއްވި އެވެ.
އޭނާ ވިދާޅުވީ މުސާރައަށް ގެނައި ބަދަލާއެކު ލީގަލް މުވައްޒަފުންނަށް 922ރ. ގެ މައިގްރޭޝަން އެލަވަންސް ހަމަޖެއްސުމަށް ހިސާބުކޮށްފައިވަނީ ހާޒިރީ އެލަވަންސް ހިމަނައިގެން ކަމަށްވާތީ ސަލާމް/ޗުއްޓީގައި ހުންނައިރު މިހާރު ކުރިން ލިބެމުންދިޔަ މުސާރަ އާއި އިނާޔަތް ލިބެމުން ނުދާ ކަމަށެވެ.
ލީގަލް މުވައްޒަފުންގެ މުސާރައަށް ގެނައި ބަދަލާއެކު ހުރި ޝަކުވާތައް ޕޭ ކޮމިޝަނަށް ހުށަހެޅިތާ ދެ މަހަށްވުރެ ގިނަ ދުވަސްވެފައިވާއިރު، އެ ޝަކުވާތަކަށް ޖަވާބު ނުދޭ ކަމަށް އޭނާ ވިދާޅުވި އެވެ.
"ބައެއް މުވައްޒފުންނަށް މައިގްރޭޝަން އެލަވަންސްގެ ނަމުގައި އެލަވަންސެއް ހަމަޖައްސައިދިން ކަމުގައިވީ ނަމަވެސް އެ މުވައްޒަފަށް މުސާރައިގެ ކުރިއެރުން ލިބޭހިނދު، މައިގްރޭޝަން އެލަވަންސްއަކީ އުނިކުރާ އެއްޗަކަށްވާތީ އެ މުވައްޒަފަށް ހަގީގީ މަންފާ ލިބިގެން ނުދޭ،" ކުޑޫ ވިދާޅުވި އެވެ.
މީގެއިތުރުން ކުޑޫ ވިދާޅުވީ ސަލާމް/ޗުއްޓީގައި ހުންނައިރު ކުރިން ލިބެމުންދިޔަ މުސާރައާއި އިނާޔަތް ބޮޑުތަނުން އުނިވުމަކީ މުވައްޒަފުންނަށް ލިބެމުންދާ ގެއްލުމެއް ކަމަށެވެ.
ކައުންސިލްތަކުގެ މުވައްޒަފުން ހިމެނޭހެން ސިވިލް ސާވިސްގެ ހުރިހާ މުވައްޒަފުންނާއި ޖުޑިޝަރީގެ މުވައްޒަފުންގެ ޕޭ ހާމަނައިޒް ކުރެވި މުސާރަ ބޮޑުކުރިއިރު، ދައުލަތުގެ ސިވިލް ސާވިސްގެ އިދާރާތަކާއި ލޯކަލް ކައުންސިލްތަކުގެ ލީގަލް އޮފިސަރުންނަކީ ވެސް އެބައިގައި ހިމެނޭ ބަޔަކަށްވާތީ އެ މުވައްޒަފުންގެ މުސާރަ އާއި އިނާޔަތަށް ވަނީ އުނިކަން އައިސްފައި ކަމަށް އޭނާ ވިދާޅުވި އެވެ.
ލީގަލް އޮފިސަރުންގެ މުސާރަ ކުޑަވުމާ ގުޅިގެން ކުޑޫ ސްޕޮންސާކޮށް ރައްޔިތުންގެ މަޖިލީހަށް ޕެޓިޝަނެއް ވެސް ވަނީހުށަހަޅާފަ އެވެ. އެ ޕެޓިޝަން ހުށަހެޅީ އެކި އިދާރާތަކުގައި މަސައްކަތްކުރާ 84 ލީގަލް އޮފިސަރުންގެ ސޮޔާއެކުގަ އެވެ.
