ހުޅުމާލޭގެ މަގުތައް މަރާމާތުކުރުމުގެ ބޮޑު މަޝްރޫއު، އެކަން ކުރުމުގެ ގާބިލްކަން ހުރި އެމްޓީސީސީ އާއި އާރުޑީސީއަށް ނުދީ، ޗައިނާގެ ކުންފުންޏަކާ ހަވާލުކުރީ އިންތިހާއަށް ބޮޑު އަގެއްގައިކަން އެނގިއްޖެ އެވެ.

ލޯކަލް ކައުންސިލް އިންތިހާބު ބޯމަތިވެފައި ވަނިކޮށް، އެޗްޑީސީން މި މަސައްކަތް ހަވާލުކޮށްފައިވަނީ ޗައިނާގެ "ރޯޓައިމް އިންޖިނިއަރިން އެންޑް ޓެކްނޮލޮޖީ" އާ އެވެ.

ބީލަމަކަށް ނުލައި ހަވާލުކުރި މި މަޝްރޫއުގެ މައުލޫމާތާއި ތަފްސީލީ އަގުތައް އެޗްޑީސީން ހާމަކޮށްފައި ނުވި ނަމަވެސް، އެ ކުންފުނީގެ މެނޭޖުމެންޓާއި ބޯޑާ ގާތް ގުޅުމެއް އޮންނަ އިތުބާރު ހުރި ފަރާތްތަކުން "އަދަދު" ނޫހަށް ބުނީ ރޯޓައިމްއާ މަސައްކަތް ހަވާލުކުރީ ގާތްގަނޑަކަށް 90 މިލިއަން ރުފިޔާ އަށް ކަމަށެވެ. އެ މަސައްކަތުގެ އަސްލު އަގަކީ ގާތްގަނޑަކަށް 30 މިލިއަން ރުފިޔާ ކަމަށް މަސްދަރުތަކުން ބުންޏެވެ.

"މި ހުންނަނީ ގޯސްކަންކަން. ބޯޑުން ފާސްކުރިޔަސް ބޯޑުގެ އެންމެން މިކަމާ ގަޔާވަނީއެއް ނޫން. އަދި އެޗްޑީސީގެ ކަންކަން ކުރިއަށް ވުރެ ވެސް ސިއްރުވެރި ގޮތެއްގައި ކުރިއަށް ގެންދަނީ،" މައުލޫމާތު ދިން މީހަކު ބުންޏެވެ.

މި މަޝްރޫއުގެ އަގާ ގުޅޭ ގޮތުން ސުވާލު ކުރުމުން، ޖަވާބެއް ދެއްވުމުގެ ބަދަލުގައި އެ ކުންފުނީގެ އިސްވެރިޔަކު ވިދާޅުވީ އޮންނަ އުސޫލުން ކުރިޔަށް ދިޔުމަށެވެ. އޭނާ މާނަކުރި ގޮތުގައި އެއީ މައުލޫމާތު ހޯދައި ލިބިގަތުމުގެ ގާނޫނު ނުވަތަ ލިޔެކިޔުމުން ޖަވާބު ދިނުމެވެ.

މި އެއްބަސްވުމުގެ ދަށުން ހުޅުމާލޭގެ މަގުތައް ހެދުމުގެ އިތުރުން ރެކްޓިފިކޭޝަން މަސައްކަތް ވެސް ހިމެނޭ ކަމަށް އެޗްޑީސީން ކުރިން ބުނެފައިވެ އެވެ.

މި އެއްބަސްވުމާ ގުޅޭ އިތުރު މައުލޫމާތެއް އެޗްޑީސީން ހާމަނުކުރާތީ އެ އެއްބަސްވުމުގެ ދަށުން ހަދަނީ ކޮން މަގުތަކެއް ކަމެއް އަދި މަރާމާތު ކުރަނީ ކޮން މަގުތަކެއް ކަމެއް ނޭނގެ އެވެ. އަދި، މިހާރު ހިއްކަމުން އަންނަ ފޭސް ތިނެއްގެ މަގުތައް ޕްރޮޖެކްޓުގައި ހިމެނޭ ކަމެއް ވެސް ސާފެއް ނުވި އެވެ.

މަގު ހެދުމުގެ މަސައްކަތް ހަވާލުކުރި ރޯޓައިމްއަކީ މިދިޔަ އަހަރުގެ ތެރޭގައި ހުޅުމާލޭގައި ސްމާޓް ވެއާހައުސް ކޮމްޕްލެކްސް އާއި އޭގެ ފަހުން ޗިލްޑްރަންސް ސެންޓަރާއި މާލޭގައި ތަރައްގީކުރާ ސާފިން ސްޓޭޑިއަމް ވެސް ތަރައްގީކުރަން ހަވާލުކުރި ކުންފުންޏެވެ.

ދެވަނަ ފިޔަވަހީގައި ހުންނަ، އަދި މިހާރު މަސައްކަތް ނިމުމަކާ ގާތްވެފައިވާ "ކޯ-ލިވިން" އިމާރާތް ވެސް ތަރައްގީކުރަނީ މި ކުންފުނިންނެވެ.

ރައްޔިތުންގެ މަޖިލީހުގެ އިންތިހާބު ގާތްވެގެން އައިއިރު ވެސް ބޮޑު އަގުގައި ޗައިނާ ކުންފުނިތަކާ މަޝްރޫއުތައް ހަވާލުކުރި އެވެ. އެ މަޝްރޫއުތަކުގެ ތެރެއިން މިހާރު ހިނގަމުން އަންނަ ހިޔާ ފްލެޓުތަކުގައި 32 ލިފްޓު ހަރުކުރުމުގެ އަގަކީ 18 މިލިއަން ޑޮލަރެވެ. ބްލެކްމާކެޓު ރޭޓުން ބަލާނަމަ އެއީ 360 މިލިއަން ރުފިޔާ އެވެ. އެތައް ގުނައެއް އަގުބޮޑުކޮށް މި މަޝްރޫއު ހަވާލުކުރުމަކީ ކޮރަޕްޝަން ކަމަށް ތުހުމަތުކުރެވެ އެވެ.

މަޖިލީހުގެ އިންތިހާބާ ދިމާކޮށް ހަވާލުކުރި މިފަދަ ބައެއް މަޝްރޫއުތައް އަދިވެސް ނުފެށި އެބަ ހުއްޓެވެ.