ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ރޭ ބޭއްވި ޖަގަހަ ޖަލްސާއަށް ދިޔުމަށް ސަރުކާރުގެ ކުންފުނިތަކުގެ މުވައްޒަފުންނަށް މަޖުބޫރު ކުރި ކަމަށާއި، ޖަލްސާއަށް ދިޔަ މުވައްޒަފުންގެ ހާޒިރީ ބެލިކަން އެނގިއްޖެ އެވެ.

ރޭގެ ޖަލްސާގައި ރައީސް މުހައްމަދު މުއިއްޒު އާއި ވަޒީރުން އަދި ޕީއެންސީއަށް ނިސްބަތްވާ ހުރިހާ މަޖިލިސް މެންބަރުން ހެން އަދި މާލެ ސިޓީގެ ކައުންސިލަރުން ބައިވެރިވި އެވެ. އާޓިފިޝަލް ބީޗު ކައިރި ހުންނަ ޖަގަހައިގައި ބޭއްވި ޖަލްސާގެ ބައިވެރިން ބޮޑުތަކުރުފާނު މަގާއި އާޓިފިޝަލް ބީޗު ތެރޭ ވެސް ތިއްބެވެ.

މި ނޫހަށް މައުލޫމާތު ދިން އެސްއޯއީތަކުގެ ބައެއް މުވައްޒަފުން ބުނި ގޮތުގައި މި ޖަލްސާއަށް ދާން ކުންފުނިތަކުގެ ވެރިން މި ހަފުތާ ފެށުމާއެކު އަންގަން ފެށި އެވެ. އެކަން އަންގަން ގްރޫޕުތަކަށް މެސެޖުކޮށް، ވަކި މީޓިންތަކެއް ބޭއްވި ކަމަށް އެ މުވައްޒަފުން ބުންޏެވެ.

އެގޮތުން، އެމްޕީއެލް، ސްޓެލްކޯ، އެމްއޭސީއެލް، އެސްޓީއޯ ފަދަ ކުންފުނިތަކުގެ މުވައްޒަފުންނަށް ރޭގެ ޖަލްސާއަށް ދާން އެންގި ކަމަށް އެ ކުންފުނިތަކުވެ މުވައްޒަފުން ބުންޏެވެ.

މައުލޫމާތު ލިބިފައިވާ ގޮތުގައި ރޭގެ ޖަލްސާއަށް ކުންފުނިތަކާއި ވުޒާރާތަކުގެ މުވައްޒަފުން ގެންދިޔައީ ގްރޫޕުތަކަކަށް ބަހައިގެންނެވެ. އެ ގްރޫޕުތަކުގެ ހާޒިރީ ބެލުމަށް ސުޕަވައިޒަރުންތަކެއް ވެސް ލާފައި ތިއްބެވެ. ހާޒިރީ ރިޕޯޓުކުރީ ކުންފުނިތަކާއި ވުޒާރާތަކުގެ ވެރިން އަދި ޕީއެންސީގެ ލީޑަޝިޕަށެވެ.

މިގޮތަށް މުވައްޒަފުން ގެންގޮސް ބޭއްވި ޖަލްސާއިން ފެންނަނީ މުއިއްޒު އާއި ޕީއެންސީއަށް އޮތް ތާއީދު ކަމަށް ބުނެ، އެ ޕާޓީގެ އެކްޓިވިސްޓުން ދަނީ ސޯޝަލް މީޑިއާގައި އަޑުފަތުރަމުންނެވެ. ރޭގެ ޖަލްސާގައި މާލޭގައި ހަރަކާތްތެރިވާ ގޭންގުތަކުން ބައިވެރި ކަމަށް ވެސް ސޯޝަލް މީޑިއާގައި ދަނީ އަޑުތައް ފެތުރެމުންނެވެ.

ޕީއެންސީގެ ޖަގަހައަށް މުއިއްޒު ވަޑައިގެންނެވީ ޖަލްސާގެ މެދުތެރެއިންނެވެ. ޖަލްސާއަށް ވަޑައިގެން އެމަނިކުފާނު ވަނީ މި އަހަރު ނިމުމުގެ ކުރިން މާލެ ސަރަހައްދުގައި އިތުރު 3000 ފްލެޓު އެޅުމުގެ މަސައްކަތް ފެށްޓެވުން ފަދަ އައު ގިނަ ވައުދުތަކެއް ވެފަ އެވެ.

ރޭގެ ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ އެމަނިކުފާނު އަމަލު ކުރައްވަމުން ގެންދަވަނީ ކުރިން ވައުދުވެވަޑައިގެންނެވި ގޮތަށް ކަމަށެވެ. އެގޮތުން މިދިޔަ ސަރުކާރުން ދިން ފްލެޓުތަކާއި ގޯތިތައް ވެސް އޭގެ ހައްގުވެރިންނަށް ވައުދުވެވަޑައިގެންނެވި ގޮތަށް ދެމުންދާ ކަމަށް މުއިއްޒު ވިދާޅުވި އެވެ.