ރިސޯޓެއް ތަރައްގީ ކުރުމަށް ކޯސްޓްލައިން ކުއްޔަށް ނަގާފައިވާ ބ. އަތޮޅު މާމަޑުއްވަރި އަތުލައި އެ އަތޮޅު ހިތާދޫއާ ހަވާލު ކުރާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅަށް ކުރެއްވި ދަތުރުގައި އިއްޔެ ހިތާދޫއަށް ވަޑައިގެން މުއިއްޒު ވިދާޅުވީ ޓޫރިޒަމް އެއްބަސްވުމެއްގެ ދަށުން ހަވާލުކޮށްފައި އޮތް އެރަށުގައި އެއްވެސް މަސައްކަތެއް ކުރިއަށް ނުދާތީ، އެ އެއްބަސްވުން ނިމުމަކަށް ގެނެސް ހިތާދޫއާ ހަވާލު ކުރަން ނިންމާފައިވާ ކަމަށެވެ.
"މި ދެންނެވި އެގްރިމަންޓް، ގާނޫނާއި ގަވާއިދުގެ ތެރެއިން، އޮންނަ އުސޫލުގެ ތެރެއިން، ނިމުމަކަށް ގެނެސް، އެރަށް، މާމަޑުއްވަރި، މި ރަށަށް، ހިތާދުއާ ހަވާލުކުރުމަށް އަޅުގަނޑު ނިންމާ ވާހަކަ ދަންނަވަން،" މުއިއްޒު ވިދާޅުވި އެވެ.
"އެހެންވީމާ، ޓޫރިޒަމް މިނިސްޓަރު، އެޓާނީ ޖެނެރަލާ ގުޅިވަޑައިގެން، އެ މަސައްކަތް ކުރިއަށް ގެންދަވާނެ. ނިމުނުހާ އަވަހަކަށް، ތިޔަ ބޭފުޅުންނާ އެ ރަށް، ހަވާލުކުރާނަން،"
މުއިއްޒު ވިދާޅުވީ ތާރީހީ ގޮތުން ބަލާއިރު ވެސް މާމަޑުއްވަރިއަކީ ހިތާދޫއާ ގުޅިފައި އޮތް ރަށެއް ކަމަށާއި، ފަން ހޯދުމާއި، ދަތުރުދިޔުން އަދި އިގްތިސާދީ މަސައްކަތް ކުރުމަށް ވެސް މާމަޑުއްވަރި ބޭނުންކުރި ކަމަށެވެ.
ޖުމްލަ 35.90 ހެކްޓަރު ހިމެނޭ މާމަޑުއްވަރި ރިސޯޓެއް ތަރައްގީކުރުމަށް ކޯސްޓްލައިނާ ހަވާލުކުރީ 2015 ވަނަ އަހަރުގެ ތެރޭގަ އެވެ. އޭގެ ކުރިން އެ ރަށް ބޭނުންކުރީ ދަނޑުވެރިކަމުގެ ބޭނުމަށެވެ.
ޓޫރިޒަމް އަށް ދޫކޮށްފައިވާ ރަށްތައް އަތުލާނަމަ ގާނޫނީ ބޮޑު މައްސަލަތަކެއް ކުރިމަތިވެ އެ މުއާމަލާތް ނިންމުމަށް ގިނަ ދުވަސްތަކެއް ނެގުން އެކަށީގެންވެ އެވެ.
މާމަޑުއްވަރީގެ އިތުރުން ވެސް ނުހެދި ގިނަ ދުވަސްވެފައިވާ ރަށްތައް އެބަ ހުއްޓެވެ.
އެހެންވެ، ހިތާދޫ މީހުންނަށް މާމަޑުއްވަރީ ލިބުމަކީ ކައިރި މުސްތަގުބަލެއްގައި ވާނެ ކަމެއް ކަމަށް ނުބެލެވެ އެވެ.
