ސިނގިރޭޓު ވިއްކާ މީހުން ސިޔާސީ ވާދަވެރިންގެ ގޮތުގައި ސިފަ ކުރައްވައި، ސިނގިރޭޓުގެ ވިޔަފާރި ހުއްޓާލަން ރައީސް މުހައްމަދު މުއިއްޒު ގޮވައިލެއްވުމުން ރާއްޖޭގައި ވިޔަފާރި ކުރާ ބޮޑެތި ބައެއް ކުންފުނިތަކުން ކަންބޮޑުވުން ފާޅުކޮށްފި އެވެ.

ސިނގިރޭޓު ވިޔަފާރި ހުއްޓާލައި "އެހެން ކަމަކައިގެން އުޅެން" ރައީސް ގޮވައިލެއްވުމުން ބައެއް ވިޔަފާރިތަކުން އެކަން ދެކުނީ ރައީސް މިނިވަން ވިޔަފާރިތަކަށް ދެއްވި އިންޒާރެއްގެ ގޮތުގަ އެވެ. ސިނގިރޭޓު ވިޔަފާރި ކުރަނީ ރާއްޖޭގައި މަދު ބަޔަކަށްވާއިރު އެ ވިޔަފާރިތައް "ސިންގަލް އައުޓް" ކުރުމަކީ ވެސް ވިޔަފާރިތަކުގެ ކަންބޮޑުވުމެކެވެ.

"ވަރަށް ދެރަވެއްޖެ އަޅުގަނޑުމެން. ވަރަށް މާޔޫސްވެއްޖެ. މާދަމާ ނުކުމެވަޑައިގެން ވިދާޅުވެފާނެ އެހެން ވިޔަފާރިތަކާ ދިމާލަށް ވެސް އެހެން. ދެން އަޅުގަނޑުމެން ހިތަށް އަރަނީ ސިނގިރޭޓު ވާހަކަ އެކަނި ކީއްވެތޯ ދައްކަނީ؟ ރަލާއި އޫރު މަސް ވިއްކުން ހުއްޓާލަންވީ ނޫންތޯ؟،" ސަރުކާރުން ދަތިކޮށްފާނެތީ ނޫހުގައި ނަން ނުޖެހުމަށް އެދި މި ނޫހާ ވާހަކަ ދެއްކި ބޮޑު ވިޔަފާރިވެރިއަކު ބުންޏެވެ.

ރައީސް އޮފީހުން ޕްރޮޑިއުސް ކުރާ ޕޮޑްކާސްޓެއްގައި ވާހަކަ ދައްކަވަމުން ރައީސް މުއިއްޒު މިއަދު ވިދާޅުވީ ސިނގިރޭޓު ވިޔަފާރިރި ކުރަނީ އެމަނިކުފާނާ "އިދިކޮޅު ފިކުރުގެ މީހުން ކަމަށެވެ.

"ދެން އަޅުގަނޑު ބަލައިލާއިރުގައި، ސިނގިރޭޓު ވެސް ވިއްކުމުގައި މިއުޅެނީ އަޅުގަނޑުމެންނާ އިދިކޮޅު ފިކުރުގެ މީހުންގެ މީހުން އިނގޭތޯ. އެ މީހުން މި މުޒާހަރާތަކަށް ވެސް އެބަ އެހީދޭ،" ރައީސް ވިދާޅުވި އެވެ.

ރައީސް އެހެން ވިދާޅުވި ނަމަވެސް ރާއްޖޭގައި ސިނގިރޭޓު ވިޔަފާރި ކުރާ މައިގަނޑު ދެ ކުންފުންޏަކީ އެއްވެސް ސިޔާސީ ޕާޓީއެއްގައި ހަރަކާތްތެރިވާ ބައެއް ނޫނެވެ.

ރާއްޖެއަށް ސިނގިރޭޓު އެތެރެ ކުރާ މައިގަނޑު ދެ ކުންފުންޏަކީ ސީޖީޓީ ޕްރައިވެޓް ލިމިޓެޑް އާއި ބްލެންކްސް ޕްރައިވެޓް ލިމިޓެޑެވެ. ސީޖީޓީ ކުންފުނީގެ ވެރިންނަކީ އެއްވެސް ސިޔާސީ ޕާޓީއެއްގައި ހަރަކާތްތެރިވާ ބައެއް ނޫނެވެ. ބްލެންކްސްގެ މައިގަނޑު އެއް ހިއްސާދާރުގެ އަނބިކަނބަލުންނަކީ ސޯޝަލް އެންޑް ފެމިލީ ވެލްފެއާ މިނިސްޓަރު އައިޝަތު ޝިހާމް އެވެ.

އޭގެ އިތުރުން މިއަދު ވާހަކަ ދައްކަވަމުން ރައީސް ގޮވައިލެއްވީ ސިނގިރޭޓު ވިއްކާ މީހުން އެ ވިޔަފާރި ހުއްޓާލުމަށެވެ.

"އަޅުގަނޑު އެދެން ސިނގިރޭޓު އެތެރެކޮށް ސިނގިރޭޓު ވިޔަފާރިކުރާ މީހުންނަށް އެ ވިޔަފާރި ދޫކޮށްލަން. އެހެން ކަމަކައިގެން އުޅެން. މިއީކީ ކުރާވަރުގެ ކަމެއް ނޫނޭ. މިއީ ކުޑަކުޑަ ގައުމެއް. މިއީކީ މިލިއަނުން މިލިއަނުން މީހުން އުޅޭ ތަނެއް ނޫން. ކީއްކުރަން މިތާނގައި އެކަން ކުރަންވީކީއެއް. އަޅުގަނޑުމެން ކުޑަ މުޖުތަމައު ސަލާމަތްކުރިއްޔާ މާ ރަނގަޅެއްނު މިކަމުން،" އެމަނިކުފާނު ވިދާޅުވި އެވެ.

އެއާއެކު ބައެއް ފަރާތްތަކުގެ ފާޑުކިޔުން ރައީސް މުއިއްޒަށް ވަނީ އަމާޒުވެފަ އެވެ. އޭގެ ތެރޭގައި ކުރީގެ ފައިނޭންސް މިނިސްޓަރު އިބްރާހިމް އަމީރު ހިމެނެ އެވެ.

"މަނިކުފާނާއި ސިޔާސީ ފިކުރު ތަފާތު ވާ މީހުން ދެން ވިޔަފާރި ވެސް ނުކުރަންވީ. ގާނޫނާއި ގަވާއިދުގެ ތެރެއިން، ސަރުކާރަށް ޓެކްސް ދައްކަމުންދާ ބަޔަކާއި މެދު ތިގޮތަށް ވާހަކަ ނުދެއްކޭނެ. ތީގެއިން ދައްކުވައިދެނީ މަނިކުފާނުގެ އަހްލާގީ ފެންވަރު. ކޮލިޓީއެއް ނެތްކަން. ގައުމުގެ އެންމެންނަށް ހަމަހަމަކޮށް، އިންސާފުވެރި ވެރިކަމެއް ކުރުމަށް މަނިކުފާނު ނުކުޅެދިފައިވާކަން. ސަރުކާރެއް ހިންގުމުގެ ގާބިލްކަމެއް މަނިކުފާނުގެ ނެތް! ރައީސްކަން ދޫކޮށްލާ އެހެންކަމަކާއި އުޅެންވީ،" އޭނާ ވިދާޅުވި އެވެ.