މި މަހު 12 ގައި އިފުތިތާހު ކުރަން ތައްޔާރުވަމުންދާ އުތުރު މެރިން ސާވިސަސް (ޔޫއެމްއެސް) އާއެކު މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރިން ނުދޭ އާ ހިދުމަތްތަކެއް ދޭން ފަށާނެ ކަމަށް އެ ކުންފުނިން ބުނެފި އެވެ.

އެމްޕީއެލްގެ ދަށުން ހިންގާ ޔޫއެމްއެސްގެ ރަސްމީ ވެބްސައިޓު މިހާރު ވަނީ ލޯންޗުކޮށްފަ އެވެ. އެ ވެބްސައިޓުގައި އިހަވަންދިއްޕޮޅު އަތޮޅުގައި މި މަހު ދޭން ފަށާ ހިދުމަތްތައް ތަފުސީލާއެކު ލިސްޓުކޮށްފައިވެ އެވެ.

އޭގެތެރެއިން ތެލުގެ ހިދުމަތް ފިޔަވައި އެހެން ހުރިހާ ހިދުމަތްތަކެއް ފޯރު ކޮށްދޭނީ އެމްޕީއެލް އިން ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު ވަޖީހު ސޯޝަލް މީޑިއާގައި ލިޔުއްވާފައިވެ އެވެ. ބަންކަރިން ހިދުމަތް ދޭނީ އެސްޓީއޯއާ ގުޅިގެން، އެކަމުގައި މުޅި ދުނިޔޭގައި ވެސް އެންމެ ފުންނާބު އުސް ކުންފުނިތަކުގެ ތެރޭގައި ހިމެނޭ ވިޓޯލްއިންނެވެ.

ޔޫއެމްއެސް އިން ދޭ ހިދުމަތްތައް

• ބަންކަރިން އަދި އެހެން ހިދުމަތްތައް ހޯދަން އަންނަ އުޅަނދުތަކަށް ޕައިލެޓޭޖް ސާވިސް ދިނުން
• ފަޅުވެރިން ބަދަލުކުރުމައި ދޭން ޖެހޭ ވިސާގެ ހިދުމަތްތައް
• އެއް އުޅަނދުން އަނެއް އުޅަނދަށް ކާގޯ ބަދަލުކުރުން
• ސްޕީޑް ބޯޓުގެ ހިދުމަތް
• ބޯފެން ފޯރުކޮށްދިނުން
• ކާބޯތަކެއްޗާއި މެޑިކަލް، ސްޕެއާ ޕާޓްސް އަދި ސޭފްޓީ އާލާތްތައް ފޯރުކޮށްދިނުން
• މަތީ ފެންވަރުގެ ލުބްރިކޭޝަން ހިދުމަތާއި ހައިޑްރޯލިކް ތެޔޮ ފޯރުކޮށްދިނުން
• ޔޮޓު ޑޮކިން
• މެއިންޓަނަންސް
• ފެނު އަޑީގެ ހިދުމަތްތައް - މީގެ ތެރޭގައި އިންސްޕެކްޓް ކުރުމާއި ގެއްލުން ވަޒަންކުރުމުގެ އިތުރުން އުޅަނދުން ފެހި ކެހުމާއި ބުރަފަތި ސާފުކުރުން ހިމެނޭ
• ޓަގު ކުރުން
• މެރިން ސެލްވޭޖު ހިދުމަތް
• އެކި ބާވަތްތަކުގެ ކުނި ބޭރުކުރުން

މީގެތެރެއިން ބައެއް ހިދުމަތްތަކަކީ ރާއްޖޭގައި އަމިއްލަ ފަރާތްތަކުން ދެމުންދާ ހިދުމަތްތަކެކެވެ. އެގޮތުން ފެނު އަޑީގެ ހިދުމަތް ފްރީލާންސްކޮށް ދޭ ގިނަ ޑައިވަރުންނާއި ޑައިވް ސެންޓަރުތައް އެބަހުއްޓެވެ.

"މިއީ 24 ގަޑި އިރުގެ އޮޕަރޭޝަނަކަށް ވާއިރު، މި ހިދުމަތް ދޭނެ މުވައްޒަފުން މިކަމަށް އަހުލުވެރިކުރުވާ މިކަމަށް ބޭނުންވާ ވަސީލަތްތައް ގާއިމު ކުރުމުގެ މަސައްކަތް އަޅުގަޑުމެން މިދަނީ ކުރަމުން،" އަލަށް ފަށާ ހިދުމަތްތަކުގެ ތައާރަފުގައި ވަޖީހުގެ ޕޯސްޓުގައި އިތުރަށް ލިޔުއްވާފައިވެ އެވެ.

އުތުރުގައި ބަންކަރިން ހިދުމަތް ދޭން ވިޓޯލް އިން ގެންނަނީ އެ ކުންފުނިން ސިންގަޕޫރުގައި ބޭނުންކުރަމުންދިޔަ "މެރިން ބެލާ" އަދި "މެރިން އޭންޖެލް" އެވެ. އެ ދެ ބޯޓުވެސް މި މަހު 12 ގެ ކުރިން ރާއްޖެ އަންނާނެ ކަމަށް ކަނޑުއުޅަނދުތައް ޓްރެކް ކުރާ ވަސީލަތްތަކުން ދައްކަ އެވެ.

އޭގެއިތުރުން، ޔޫއެމްއެސް އަށް ބޭނުންވާ ޕައިލެޓް ބޯޓާއި ޓަގު ބޯޓު މިހާރު ވަނީ އެ ސަރަހަށްދަށް ގެންގޮސްފަ އެވެ. މި ދެ ބޯޓަކީ ވެސް މީގެ ކުރިން އެމްޕީއެލްގެ އޮޕަރޭޝަންތަކުގައި ބޭނުންކުރަމުން އައި ބޯޓުތަކެކެވެ.

ޔޫއެމްއެސް ގެ ހިދުމަތް ފެށުމަށް އެންމެ ގިނަ މަސައްކަތްތައް ކުރަމުން އަންނަނީ ހއ. އުލިގަމުގަ އެވެ. އެރަށުގައި ކުރިއަށްދާ އެންމެ މުހިންމު މަސައްކަތަކީ އެ ތަނުގައި ސިފައިންނާއި އިމިގްރޭޝަނާއި ކަސްޓަމްސްގެ އިތުރުން ޕޯޓު ހެލްތުގެ މުވައްޒަފުން ތިބޭނެ ތަންތަން އިމާރާތްކުރުމެވެ.