ރާއްޖޭގައި ވަޒީފާ އަދާކުރާ ބިދޭސީންގެ ކަންކަން ބެލެހެއްޓުމަށް މިހާރު ބޭނުންކުރާ އޮންލައިން ޕްލެޓްފޯމް ދޫކޮށްލައި، އާ އެކްސްޕެޓު ސިސްޓެމްއެއް ހެދައި އެ ސިސްޓެމް ބެލެހެއްޓުން މަލޭޝިއާގެ ކުންފުންޏަކާ ހަވާލުކުރުމުގެ އެއްބަސްވުމެއްގައި ސަރުކާރުން ސޮއިކޮށްފި އެވެ.

އެ އެއްބަސްވުމުގައި ސޮއިކުރިކަން އަދި ސަރުކާރުން ހާމައެއް ނުކުރެ އެވެ. ނަމަވެސް "އަދަދު" ނޫހަށް މައުލޫމާތު ލިބިފައިވާ ގޮތުގައި ރާއްޖޭގެ އެކްސްޕެޓް ސިސްޓެމް ހަދައިން ހިންގަން ހަވާލުކުރަން ސޮއިކޮށްފައި ވަނީ މެލޭޝިއާގެ ބެސްޓިނެޓު ކުންފުންޏާ އެވެ. އެ ކުންފުންޏަށް ކޮންމެ ބިދޭސީއަކަށް 100 ޑޮލަރުގެ ރޭޓުން ފައިސާ ދައްކަން ޖެހޭނެ އެވެ.

އެންމެ ފަހުގެ ބޯހިމެނުން ދައްކާ ގޮތުން ރާއްޖޭގައި 132،000 އަށް ވުރެ ގިނަ ބިދޭސީން އުޅެ އެވެ. ގަވާއިދާ ހިލާފަށް ދިރިއުޅޭ މީހުންނާއެކު އެ އަދަދު ދެ ލައްކައަށްވުރެ މަތިވާނެ ކަމަށް އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އިން ލަފާކުރެ އެވެ.

ބިދޭސީންގެ އަދަދު 132،000 ބަލައިގެން، ހިސާބުކުރާ ނަމަ ބެސްޓިނެޓަށް އަހަރަކު 13.2 މިލިއަން ޑޮލަރު (203 މިލިއަން ރުފިޔާ) ދައްކަން ޖެހޭނެ އެވެ. އެ އަދަދު ދެ ލައްކައަށް ބަލާނަމަ އަހަރަކު 20 މިލިއަން ޑޮލަރު (308 މިލިއަން ރުފިޔާ) ދައްކަން ޖެހޭނެ އެވެ.

އެ އެއްބަސްވުމާ ގުޅޭ މައުލޫމާތު ސަރުކާރުން ރަސްމީކޮށް ހާމައެއް ނުކުރެ އެވެ. ނަމަވެސް, އެފަދަ އެއްބަސްވުމެއްގައި ސޮއިކޮށްފައިވާކަން ބައެއް މަސްދަރުތަކުން "އަދަދު" ނޫހަށް ކަށަވަރުކޮށް ދިނެވެ.

ރާއްޖޭގެ އެކްސްޕެޓު ސިސްޓަމް ހަދައި ހިންގަން ހަވާލުކުރާ ކުންފުންޏަކީ މެލޭޝިއާގައި ވަޒީފާ އަދާކުރާ އެހެން ގައުމުތަކުގެ މީހުންގެ ކަންކަން ބަލަހައްޓާ އޮންލައިން ސިސްޓެމް ހެދި ކުންފުންޏެވެ.

ރާއްޖޭގައި ބިދޭސީންގެ ކަންކަން ބަލަހައްޓާ ބައެއް ކުންފުނިތަކުން މި ނޫހަށް މައުލޫމާތު ދިން ގޮތުގައި މިހާރު ބޭނުންކުރާ ސިސްޓަމްގައި މައްސަލަތަކެއް ނެތެވެ. އަދި, މައްސަލަތަކެއް ހުރި ނަމަ އެ ސިސްޓަމް ފަރުމާކޮށްފައި ވަނީ އަޕްގްރޭޑު ކޮށް އެ މައްސަލަތައް ހައްލު ކުރެވޭނެ ގޮތަށް ކަމަށް ވެސް ވަނީ މައުލޫމާތު ލިބިފަ އެވެ.