ލަންޑަން (ޖުލައި 14) - މިދިޔަ އަހަރުގެ ފައިނަލެކޭ އެއްގޮތަށް، ސާބިއާގެ ނޮވަކް ޖޮކޮވިޗް ބަލިކޮށް، ސްޕެއިނުގެ ޒުވާން ތަރި، ކާލޯސް އަލްކަރާޒް، ވިމްބަލްޑަން ޗެމްޕިއަންކަން ހޯދައިފި އެވެ.

މި އަހަރުގެ ފްރެންޗް އޯޕަން ޓެނިސް މުބާރާތް ވެސް ކާމިޔާބުކުރި އަލްކަރާޒް، ވިމްބަލްޑަން މުބާރާތުގެ ފައިނަލުގައި މިރޭ ވަނީ ޖޮޮކޮވިޗް ކައިރިން މިދިޔަ އަހަރުގެ މުބާރާތަށް ވުރެ ރަނގަޅު ކުޅުމެއް ދައްކައިފަ އެވެ. އަލްކަރާޒް މި ފަަހަރުގެ ފައިނަލުން މޮޅުވީ، 6-2 6-2 7-6 (7-4) އިން ސެޓުތައް ގެންގޮސްގެންނެވެ.

މިދިޔަ އަހަރުގެ ފައިނަލް ފަސް ސެޓު ކުޅެން ޖެހުނު ނަމަވެސް، މި ފަހަރު އަލްކަރާޒް މޮޅުވީ، ޖޮކޮވިޗަށް މާ ބޮޑު ފުރުސަތެއް ނުދީ އެވެ.

"މި ތަށި ހޯދުމަކީ އަބަދުވެސް ހުވަފެނެއް. އުމުރުން 11 އަހަރުގައި އަހަަރެން ދީފައިވާނެ އިންޓަވިއުއެއް. އޭގައި ވެސް އަހަރެން ބުނިން، އެންމެ ބޭނުންވާ އެއް ކަމަކީ ވިމްބަލްޑަން ކާމިޔާބުުކުރުން ކަމަށް،" އަލްކަރާޒް ބުންޏެވެ.

ފައިނަލް މެޗުގެ ތެރެއިން އަލްކަރާޒް: ޕޮއިންޓެއް ހޯދުމަށް ފަހު އުފާފާޅުުކުރަނީ.

އެންމެ ގިނަ ގްރޭންޑް ސްލޭމް ޓެނިސް މުބާރާތް ކާމިޔާބުކޮށްފައިވާ، ޖޮކޮވިޗް، މި ފަހަރުގެ މުބާރާތަށް ނުކުތީ ވެސް ރޮޖާ ފެޑެރާގެ ވިމްބަލްޑަން ރެކޯޑާ ހަަމަކުރުމަށެވެ. ފެޑެރާ އަކީ އަށް ވިމްބަލްޑަންގެ ތަށި އަށް ފަހަރު ކާމިޔާބުކޮށް، އެ މުބާރާތުގެ ރެކޯޑް ހޯލްޑަރެވެ. ޖޮކޮވިޗަށް ވިމްބަލްޑަންގެ ހަތް ތަށި ކާމިޔާބުކުރެވުނުއިރު، ޖެހިޖެހިގެން ދެ ފައިނަލުން މި ވަނީ ބަލިވެފަ އެވެ.

އުމުރުން 21 އަހަރުގެ އަލްކަރާޒް މި ވަނީ އޭނާ މިހާތަނަށް ގްރޭންޑް ސްލޭމް މުބާރާތްތަކުގެ ފައިނަލުގައި ކުޅުުނު ހަތަރު ފައިނަލުން ވެސް މޮޅުވެފަ އެވެ. އަދި އަލްކަރާޒަކީ، އެއް އަހަރު ތެރޭ ފްރެންޗް އޯޕަން އާއި ވިމްބަލްޑަން ކާމިޔާބުކުރި އެންމެ ހަގު ކުޅުންތެރިޔާ އެވެ.

އަލްކަރާޒް ވަނީ މިރޭ އޭނާ އަށް ކާމިޔާބު ލިބުނު ގޮތަށް، ޔޫރޯ ފުޓްބޯޅަ މުބާރާތުގެ ފައިނަލުން ސްޕެއިން އަށް ވެސް ތަށި ލިބެން އެދޭ ކަމަށެވެ. ޖަރުމަނުގެ ބާލިން އޮލިމްޕިކް ސްޓޭޑިއަމްގައި މިރޭ ޔޫރޯގެ ފައިނަލުގައި އިންގްލެންޑާއި ސްޕެެއިން ވާދަކުރަނެ އެވެ.