މި ސަރުކާރުން ސްޕެޝަލް އިކޮނޮމިކް އެންޑް ފައިނޭންޝަލް ސާވިސަސް ޒޯނެއްގެ ގޮތުގައި ތަރައްގީ ކުރާ ކ. ފުނަދޫ އާއި ވެލާނާ އިންޓަނޭޝަނަލް އެއާޕޯޓު އަދި ވެރި ރަށް މާލެ މޮނޯރެއިލްއިން ގުޅާލުމަށް ކުންފުންޏަކާ ހަވާލުކޮށްފައިވާ ކަމަށް އިކޮނޮމިކް މިނިސްޓްރީން ހާމަކޮށްފި އެވެ.

ސަރުކާރަށް ހަމަސް ފުރުމާ ގުޅިގެން މިއަދު އެ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު މުހައްމަދު ސައީދު ވަނީ ފުނަދޫ ތަރައްގީ ކުރުމުގެ ގޮތުން އެ ރަށުގައި މިހާރު ހުރި ފިއުލް ފާމް ވެސް ބަދަލުކުރުމުގެ މަސައްކަތް މިހާރު ފަށާފައިވާ ކަމަށް ވިދާޅުވެ އެވެ.

އެ މަސައްކަތް 18 މަސް ދުވަހުގެ ތެރޭގައި ނިންމައި އެއާ އެކުއެކީގައި ފުނަދޫގެ އިމާރާތްތަކުގެ ކުރެހުންތަކާއި އެހެނިހެން މަސައްކަތްތައް ކުރިއަށްދާނެ ކަމަށް އޭނާ ވިދާޅުވި އެވެ.

"ފުނަދޫ މާލެ އާއި އަދި ހުޅުލެއާ މި ގުޅާލަނީ ސިންގަލް ޓްރެކް މޮނޯރެއިލްއަކުން. އެ މަސައްކަތަށް ފައިނޭންސް ކުރުމަށްޓަކައި ބަޔަކާ އެކު ވަނީ ސޮއިކުރެވިފައި," ސައީދު މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވި އެވެ.

އެ މަސައްކަތް ކުރިއަށް ގެންދިޔުމަށް ހަވާލުކުރީ މި ސަރުކާރުން ސްޕެޝަލް އިކޮނޮމިކް ޒޯން (އެސްއީޒެޑް) ގެ ގޮތުގައި ކަނޑައަޅާފައިވާ ސަރަހައްދުތައް ތަރައްގީކޮށް ހިންގުމަށް ވެސް ހަވާލުކުރި ދުބާއީގެ އިންޓަނޭޝަނަލް ފްރީޒޯން އޮތޯރިޓީ (އިފްޒާ) އާ އެވެ.

އެސްއީޒެޑަކަށް ފުނަދޫ ހާއްސަ ކުރުމުގެ ގޮތުން މި ސަރުކާރުން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ އިން އެސްޓީއޯއާއެކު ވަނީ ފަށާފަ އެވެ.

ސަރުކާރުން ހާމަކޮށްފައިވާ ގޮތުގައި މި ހުރިހާ މަސައްކަތަކަށް ފައިސާ ހަރަދުކުރާނީ އިފާޒްއިންނެވެ.