މޯލްޑިވްސް ޓުއަރިޒަމް ޑިވެލޮޕްމަންޓު ކޯޕަރޭޝަން (އެމްޓީޑީސީ) 22.4 މިލިއަން ރުފިޔާއަށް ހުޅުމާލެއިން 6،100 އަކަފޫޓަށްވުރެ ބޮޑު ބިމެއް ގަނެފި އެވެ.
ބިން ވިއްކުމުގެ މުއާމަލާތާ ގުޅިގެން ސިވިލް ކޯޓުން ކުރި ހުކުމުން އެނގޭ ގޮތުގައި އާބަންކޯއިން އެމްޓީޑީސީއަށް އެ ބިން ވިއްކީ އަކަފޫޓަކަށް 3،629 ރުފިޔާގެ ރޭޓުންނެވެ.
އެމްޓީޑީސީގެ މެނޭޖިން ޑިރެކްޓަރު އަހުމަދު ނިޔާޒު "އަދަދު" އަށް ވިދާޅުވީ ހުޅުމާލޭން ގަތް ބިމަކީ އެ ކުންފުނީގެ އޮފީސް އިމާރާތް ކުރުމަށް ގަނެފައިވާ ބިމެއް ކަމަށެވެ. މައުލޫމާތު ލިބިފައިވާ ގޮތުގައި އެ އިމާރާތުގައި ކޮމާޝަލް ބޭނުމަށް ކުއްޔަށް ދޭނެ ވަސީލަތްތައްވެސް ގާއިމުކުރާނެ އެވެ.
އެމްޓީޑީސީގެ އޮފީސް އެޅުމަށް އެ ކުންފުނިން ގަނެފައިވާ ބިން - ފޮޓޯ: ގޫގުލް އާތު
ނިޔާޒު ވިދާޅުވި ގޮތުން އެމްޓީޑީސީން ގަތީ ހުޅުމާލެ ސެންޓްރަލް ޕާކުގެ ދެކުނުން އޫރިދޫގެ އޮފީސް އިމާރާތާ ޖެހިގެން އިރަށް އޮންނަ ބިމެވެ.
އެ ކުންފުނީގެ އޮފީސް މިހާރު ހުންނަނީ ޕީއެސްއެމް ކައިރި ހުންނަ މަޓީ ބިލްޑިން އިމާރާތުގަ އެވެ. އެމްޓީޑީސީއަކީ މިއީ ދިވެހިރާއްޖޭގެ ފަތުރުވެރިކަމުގެ ސިނާއަތުގައި ވިޔަފާރި ކޮށްގެން ލިބޭ ފައިދާ ސީދާ ރައްޔިތުންގެ ޖީބަށް ވަންނާނެ މަގު ފަހި ކޮށްދިނުމުގެ މަގުސަދުގައި 2006 ވަނަ އަހަރު ކުރީގެ ރައީސް މައުމޫންގެ ވެރިކަމުގައި އުފެއްދި ކުންފުންޏެކެވެ.
އެ ކުންފުނީގެ އަހަރީ ރިޕޯޓުގައިވާ ގޮތުން މިދިޔަ އަހަރު އާމްދަނީގެ ގޮތުގައި 7.3 މިލިއަން ޑޮލަރު (113 މިލިއަން ރުފިޔާ) ލިބިފައިވާއިރު، ފައިދާ 2.5 މިލިއަން ޑޮލަރު (38.5 މިލިއަން ރުފިޔާ) އަށް އަރަ އެވެ.
