ބާސެލޯނާ (އޭޕްރީލް 11) - ސްޕެނިޝް ލީގުގެ ކުރީގައި ލީޑުފުޅާކުރަން ނުކުތް ބާސެލޯނާ އިން އަމިއްލަ ދަނޑުގައި ޖިރޯނާއާ ލަނޑެއް ނުޖެހި 0-0 އިން އެއްވަރުވެ، މި ހަފްތާގައި ރެއާލް މެޑްރިޑް ކުޅުނު މެޗުން ބަލިވުމުގެ ފުރިހަމަ ފައިދާނަގަން ނުކުތް ބާސެލޯނާ އަށް އެކަން ހާސިލްނުވެ ފަރުޖައްސާލަން ޖެހިއްޖެ އެވެ.
ޖިރޯނާ އަތުން މޮޅުވެގެން، ލީގުގެ އެއް ވަނައިގައި 15 ޕޮއިންޓުގެ ލީޑެއް ނެގުމުގެ ފުރުސަތު އޮތް ބާސެލޯނާ އަށް މޮޅެއްނުލިބި، މި ވަގުތު ލީގުގެ ކުރީގައި އޮތީ 13 ޕޮއިންޓުގެ ލީޑަކާ އެކު އެވެ. ބާސެލޯނާ އަށް 28 މެޗުން 72 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލްގެ އޮތީ 28 މެޗުން 59 ޕޮއިންޓެވެ.
ބާސެލޯނާ ދަނޑުގައި ކުޅުނު މެޗުގެ ހަތަރު ވަނަ މިނިޓްގައި އެ ޓީމުގެ ރޮބަޓް ލެވަންޑޯސްކީ އަށް އޭރިއާތެރެއިން ލިބުނު ފުރުސަތުން ޖެހި ބޯޅަ ދިޔައީ ހުރަސްދަނޑިމަތިންނެވެ. އޭގެ އިރުކޮޅެއް ފަހުން، ޖިރޯނާ ޑިފެންޑަރެއް ފަހަތަށް ޖައްސާލި ބޯޅައެއް ގޯލަށް ވަނުމުގެ ކުރިން އެ ޓީމުގެ ގޯލްކީޕަރު، ޕައޮލޯ ގަޒަނީގާ ވަނީ ކޯނަރަކަށް ބޭރުކޮށްލައިފަ އެވެ.
މެޗުގެ 35 ވަނަ މިނިޓްގައި ޖިރޯނާގެ ޑިފެންސް ފަހަތުން، އޭރިއާތެރެއިން ބާސެލޯނާގެ ރަފީނިއާ ޖެހި ޝޮޓާއި 36 ވަނަ މިނިޓްގައި ކޯނަރެއްގައި ހުރަސްވި ބޯޅައަކުން ބާސެލޯނާގެ ރޮނާލްޑް އަރައުހޯ ބޮލުން ފޮނުވާލި ހަމަލާ ވެސް ކީޕަރު ގަޒަނީގާ ވަނީ ހުއްޓުވައިފަ އެވެ.
ދެ ވަނަ ހާފުގެ ކުޅުން ފަށައިގެން ނުވަ މިނިޓް ތެރޭ ޖިރޯނާ އަށް ލީޑުނަގައިދޭން އެ ޓީމުގެ ފޯވާޑް، ޓާޓީ ކަސްޓެލާނޯސް އަށް މުޅިން ހުސް ފުރުސަތެއް ލިބުނެވެ. ބާސެލޯނާ ޑިފެންސް ފަހަތަށް ކުޅުނު ރަނގަޅު ބޯޅައަކަށް މުޅިން ހުސްކޮށް އަރައި، ކަސްޓެލާނޯސް ފޮނުވާލި ޝޮޓް ދިޔައީ ހުރަސްދަނޑިމަތިންނެވެ.
މެޗުގެ އިތުރު ވަގުތުގެ ގޮތުގައި ދެއްކި ފަސް މިނިޓްގެ ތެރެއިން ތިން ވަނަ މިނިޓްގައި ކޯނަރަކުން އޭރިއާތެރެއަށް ހުރަސްވި ބޯޅައެއްގައި ގަވީ ބޮލުން ފޮނުވާލި ބޯޅަ ވެސް ގޯލުގައި ހުރި ގަޒަނީގާ ވަނީ މަތަކޮށްފަ އެވެ.
ބާސެލޯނާގެ ކޯޗު ޒަވީ ހެނާންޑޭޒް ބުނީ މެޗަށް ނުކުތީ މޮޅުވާން ޓާގެޓެއް ކަނޑައަޅައިގެން ކަމަށެވެ. އެހެން ނަމަވެސް އެކަން ހާސިލްނުވުމުން ވެސް މާޔޫސްނުވާ ސަބަބަކީ ސީޒަން ފެށިއިރު، މިހާ ހިސާބުގައި 13 ޕޮއިންޓުގެ ލީޑެއް ލިބޭނެ ކަމަށް ހީނުކުރާތީ އާއި މި ވަގުތު އެ ވަރުގެ ލީޑެއް ލިބިފައި އޮތުމުން ކަމަށް ޒަވީ ވަނީ ބުނެފަ އެެވެ.
