ސިޑްނީ (ނޮވެމްބަރު 17) - އޮސްޓްރޭލިއާގެ ވިސާ ލިބޭގޮތަށް ހަމަޖެހި، އަންނަ އަހަރުގެ އޮސްޓްރޭލިއަން އޯޕަންގައި ވާދަކުރުމުގެ ފުރުސަތު ލިބުމަކީ ވަރަށް ބޮޑު އުފަލެއް ކަމަށް ސާބިއާގެ މަޝްހޫރު ކުޅުންތެރިޔާ، ނޯވަކް ޖޮކޮވިޗް ބުނެފި އެވެ.
ކޮވިޑް ވެކްސިން ނުަޖަހާތީ، އޮސްޓްރޭލިއާގެ އިމިގްރޭޝަނުން ޖޮކޮވިޗްގެ ވިސާ ކެންސަލްކޮށް، އޭނާ ޑީޕޯޓްކޮށްލުމާ އެކު މި އަހަރުގެ އޮސްޓްރޭލިއަން އޯޕަންގައި ވާދަކުރުމުގެ ފުރުސަތެއް އޭނާ އަށް ނުލިބުނެވެ.
މި މައްސަލައާ ގުޅިގެން، އޮސްޓްރޭލިއާގެ އިމިގްރޭޝަނުން މީގެ ކުރިން ނިންމީ ތިން އަހަރު ދުވަހުގެ މުއްދަތަކަށް ޖޮކޮވިޗަށް ވިސާ ނުދޭށެވެ. އެކަމަކު، އެ ނިންމުން ބަދަލުކޮށް، އޭނާ އަށް މިހާރު ވިސާ ދޭން ނިންމާފައިވާ ކަމަށް އޮސްޓްރޭލިއާގެ އިމިގްރޭޝަނުން ވަނީ އިއްޔެ ޖޮކޮވިޗަށް އަންގައިފަ އެވެ.
އެހެންކަމުން އަންނަ އަހަރު ޖެނުއަރީ މަހު ކުޅެން ޝެޑިއުލްކޮށްފައިވާ އޮސްޓްރޭލިއަން އޯޕަންގައި ޖޮކޮވިޗަށް ކުޅެވޭނެ އެވެ.
"މި އަށް ވުރެން ވަކި އުފާވެރި ހަބަރެއް މި ވަގުތުގައި ނުލިބޭނެ،" ނުވަ ފަހަރު އޮސްޓްރޭލިއަން އޯޕަން ކާމިޔާބުކޮށްފައިވާ ޖޮކޮވިޗް ބުންޏެވެ.
"އަހަރެންގެ ކެރިއަރުގައި އެންމެ ގިނަ ކާމިޔާބު ހޯދައިފައިވަނީ އޮސްޓްރޭލިއަން އޯޕަންގައި. ވަރަށް ގިނަ ހަނދާންތައް ވަނީ އެ މުބާރާތާ ގުޅިފައި."
މި އަހަރުގެ ޖެނުއަރީ މަހު އޮސްޓްރޭލިއަން އޯޕަންގައި ވާދަކުރުމަށް ޖޮކޮވިޗް އޮސްޓްރޭލިއާ އަށް ދިޔައިރު، އެ ގައުމުގެ ކޮވިޑް-19ގެ ހާލަތު ވަރަށް ގޯހެވެ.
އޭރު ގަވައިދު އޮތްގޮތުން، އޮސްޓްރޭލިއާ އަށް އެތެރެވެވެނީ ވެކްސިން ޖަަހައިގެނެވެ. ވެކްސިން ނުޖަހައި ހުރުމުން ޖޮކޮވިޗް ވިސާ އަށް ޝަރުތުހަމަނުވާތީ، އޮސްޓްރޭލިއާގެ އިމިގްރޭޝަނުން ނިންމީ ޖޮކޮވިޗްގެ ވިސާ ކެންސަލްކޮށް، 2025 ވަނަ އަހަރާ ހަމައަށް އޭނާ އަށް ވިސާ ނުދޭށެވެ.
އެކަމަކު މި މަހުގެ މެއި މަހު އިންތިހާބުވި އޮސްޓްރޭލިއާގެ އާ ސަރުކާރުގެ އިމިގްރޭޝަން މިނިސްޓަރ އެންޑްރޫ ގައިލްސް ވަނީ އެ ނިންމުން ބަދަލުކޮށް، ޖޮކޮވިޗް އަށް ވިސާ ދޭން ނިންމައިފައެވެ.
މިހާރު ކުރިއަށްދާ އޭޓީޕީ ފައިނަލްސްގައި އިއްޔެ އަންދްރޭ ރުބްލޭވް އަތުން މޮޅުވެ، ޖޮކޮވިޗް ވަނީ މުބާރާތުގެ ސެމީ ފައިނަލުން ޖާގަ ހޯދައިފަ އެވެ.
