ގައުމީ ވޮލީބޯޅަ ސްކޮޑުގައި ހިމެނިގެން މުބާރާތްތަކުގައި ވެސް ވާދަކޮށްފައިވާ ޒުވާން ވޮލީބޯޅަ ކުޅުންތެރިޔާ ޝަމާއިލް ހުސެއިން ކަކުލުގެ އޮޕަރޭޝަނެއް ކޮށްފި އެވެ.
ޝަމާއިލްގެ ކަކުލަށް އަނިޔާވެފައިވަނީ މިދިޔަ އަހަރުގެ ފެބްރުއަރީ މަހު ބޭއްވި މުބާރާތެއްގައި ހދ. ވައިކަރަދޫ ޓީމަށް ކުޅެނިކޮށެވެ. ވާތު ކަކުލުގެ ލިގަމެންޓަށް ލިބުނު އަނިޔާއިން ރަނގަޅުވާން ޝަމާއިލްގެ އޮޕަރޭޝަން ކުރިއަށްދިޔައީ އޭޑީކޭ ހޮސްޕިޓަލުގަ އެވެ. ކަކުލުގެ ލިގަމެންޓް އޮޕަރޭޝަނަށް ފަހު އާންމު ގޮތެއްގައި ކުޅުމަށް އެނބުރި އައުމަށް 6-9 މަސް ދުވަހުގެ މުއްދަތެއް ނަގާނެ އެވެ.
ފުޓްބޯޅަ ކުޅެމުން އައި ލ. މާވަށަށް އުފަން، ޝަމާއިލްގެ ޝައުގުވެރިކަން ވޮލީބޯޅަ އަށް ބަދަލުވީ ވޮލީބޯޅަ ކޯޗު މުހައްމަދު ސާޖިދު (ކާއްޓޭ)، ތ. ހިރިލަންދޫގައި ކުރިއަށްގެންދިޔަ ޓްރެއިނިން ކޭމްޕަކަށް ފަހު އެވެ.
އޭގެ ފަހުން ޝަމާއިލް ރަށުގައި ގަވާއިދުން ވޮލީ ކުޅެން ފެށި އެވެ. އެހެން ދުވަސްތައް ގުނަމުން ދަނިކޮށް، ހިރިލަންދޫގެ ވޮލީބޯޅަ ކުޅުންތެރިއެއް ކަމަށްވާ ސުޖާއު ކުރި މަސައްކަތުން ލިބުނު ފުރުސަތެއްގައި ޝަމާއިލަށް ވޮލީގައި ކުރިއަށްދާން ދޮރު ހުޅުވިގެންދިޔަ އެވެ. އެ ގޮތުން 2017 ވަނަ އަހަރު ރާއްޖޭގެ ވޮލީބޯޅަ ސީޒަނުގައި ކުޅުނު މޯލްޑިވިއަން ޓީމުން ޝަމާއިލް އަށް ފުރުސަތު ލިބިގެންދިޔައީ ކޯޗު އަބްދުﷲ ނަޝީދު (އަބުޅޯ) ހޯދައިދިން ފުރުސަތެއްގަ އެވެ.
އޭގެ އެއް އަހަރު ފަހުން ގައުމީ ވޮލީބޯޅަ ޓީމާ އެކު ޕްރެކްޓިސްކޮށް ޓީމުގެ ސްކޮޑުގައި ޝަމާއިލް ހިމެނުނެވެ. އެކަމަކު، ސްކޫލްގައި ކިޔަވަމުންދާތީ، އެކަށީގެންވާ ވަގުތު ޕްރެކްޓިހަށް ނުދެވި ފަހު ވަގުތު ސްކޮޑުން ބާކީވީ އެވެ. ސްކޮޑަށް އެރި ފުރަތަމަ އަހަރު އެގޮތަށް ދިމާވި ނަމަވެސް ޝަމާއިލް އަލުން ވަރުގަދަ އަޒުމެއްގައި މަސައްކަތްކޮށް، 2019 ވަނަ އަހަރު ގައުމީ ސްކޮޑުން ޖާގަ ހޯދައި ޓީމުން ފުރުސަތު ޔަގީންކުރި އެވެ.
އެ ގޮތުން 2019. ވަނަ އަހަރު ގައުމީ ވޮލީ ޓީމުން އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ސެެންޓްރަލް ޒޯން ވޮލީ ބޯޅަ މުބާރާތާއި ލަންކާއާ ދެކޮޅަށް ކުޅުނު އެކުވެރިކަމުގެ މެޗުތަކާއި ސައުތު އޭޝިއަން ގޭމްސްގައި ވާދަކުރިއިރު، އެ ފަހަރު ސްކޮޑުގައި ޝަމާއިލް ހިމެނުނެވެ.
